ಹೃದಯಾಘಾತ, ಜೆಡಿಎಸ್‌ ಕಾರ್ಯಕರ್ತ ಸಾವು

ಬಾಗಲಕೋಟ : ಹೃದಯಾಘಾತಕ್ಕೊಳಗಾಗಿದ್ದ ಜೆಡಿಎಸ್‌ ಕಾರ್ಯಕರ್ತನೊಬ್ಬ ಆಸ್ಪತ್ರೆಗೆ ಸಾಗಿಸುವಾಗ ಮಾರ್ಗ ಮಧ್ಯದಲ್ಲಿ ಸೋಮವಾರ ಮೃತಪಟ್ಟಿದ್ದಾನೆ.

ಜಿಲ್ಲೆಯ ಬಾದಾಮಿ ತಾಲೂಕಿನ ಕೆರೂರ ಗ್ರಾಮದ ದಾವಲ್‌ಸಾಬ್‌ ಕೊಣ್ಣೂರ (55) ಮೃತಪಟ್ಟವರು. ಕೆರೂರ ಗ್ರಾಮದಲ್ಲಿದ್ದ ದಾವಲ್‌ಸಾಬ್‌ ಅವರಿಗೆ ಹೃದಯದಲ್ಲಿ ತೀವ್ರ ನೋವು ಕಾಣಿಸಿಕೊಂಡ ಕಾರಣ ಸಂಬಂಧಿಕರು ಖಾಸಗಿ ಆಸ್ಪತ್ರೆಗಳ ವೈದ್ಯರು ಮುಷ್ಕರದಲ್ಲಿದ್ದ ಕಾರಣ ಬಾಗಲಕೋಟದ ಜಿಲ್ಲಾಸ್ಪತ್ರೆಗೆ ಕರೆತಂದರು. ಅಷ್ಟರಲ್ಲಿ ದಾವಲ್‌ಸಾಬ್‌ ಮೃತಪಟ್ಟಿದ್ದಾರೆ ಎಂದು ವೈದ್ಯರು ಘೋಷಿಸಿದರು. ಅಸ್ತಮಾ, ಕಫದಿಂದ ಬಳಲುತ್ತಿದ್ದ ದಾವಲ್‌ಸಾಬ್‌ ಎರಡು ದಿನಗಳ ಹಿಂದೆ ಖಾಸಗಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆದು ಮನೆಗೆ ವಾಪಸ್ಸಾಗಿದ್ದರು. ಖಾಸಗಿ ವೈದ್ಯರ ಮುಷ್ಕರದ ಹಿನ್ನೆಲೆಯಲ್ಲಿ ಸೂಕ್ತ ಚಿಕಿತ್ಸೆ ದೊರಕದ ಕಾರಣ ದಾವಲ್‌ಸಾಬ್‌ ಮೃತಪಟ್ಟಿದ್ದಾರೆ ಎಂದು ಜನರು ಆರೋಪಿಸಿದ್ದಾರೆ. ಆದರೆ ಕುಟುಂಬ ವರ್ಗದವರು ಈ ಆರೋಪವನ್ನು ಖಚಿತಪಡಿಸಿಲ್ಲ.