ಬಾಗಲಕೋಟ ಜಿಲ್ಲೆಯಲ್ಲಿ ಭರ್ಜರಿ ಮಳೆ

ಬಾಗಲಕೋಟ : ನಗರ ಸೇರಿದಂತೆ ಜಿಲ್ಲೆಯೆಲ್ಲೆಡೆ ಶುಕ್ರವಾರ ಸಂಜೆ ಅವಧಿಯಲ್ಲಿ ಭರ್ಜರಿ ಮಳೆ ಆಗಿದೆ.

ನಗರದ ಹಳೆ ಬಾಗಲಕೋಟ, ವಿದ್ಯಾಗಿರಿ, ನವನಗರ ಸೇರಿದಂತೆ ಜಿಲ್ಲೆಯ ಹುನಗುಂದ, ಇಳಕಲ್‌, ಶಿರೂರು, ಅಮೀನಗಡ, ಕಮತಗಿ, ಬೀಳಗಿ, ಲೋಕಾಪೂರ, ಸಾವಳಗಿ ಭಾಗದಲ್ಲಿ ಮಳೆ ಆಗಿದೆ.

ಕಳೆದೆರಡು ದಿನದಿಂದ ಬಿಸಿಲು ಹೆಚ್ಚಾಗಿ ಮಳೆಗಾಗಿ ಜನತೆ ಕಾಯುವಂತಾಗಿತ್ತು. ರೈತರೂ ಸಹ ಮಳೆಯಿಲ್ಲದೆ ಕಂಗಾಲಾಗುವಂತಾಗಿತ್ತು. ಒಂದೆರಡು ದಿನದಲ್ಲಿ ಮಳೆ ಬರುಬಹುದೆಂಬ ಜನತೆಯ ನಿರೀಕ್ಷೆ ಹುಸಿಯಾಗಲಿಲ್ಲ. ಶುಕ್ರವಾರ ಬೆಳಗ್ಗೆಯೇ ಸಂಪೂರ್ಣ ಮೋಡ ಕವಿದ ವಾತಾವರಣವಿದ್ದು ಬೆಳಗ್ಗೆಯೇ ಜಿಲ್ಲೆಯ ಕೆಲ ಭಾಗದಲ್ಲಿ ತುಂತುರು ಮಳೆ ಸುರಿಯಿತು.

ಸಂಜೆ ಜಿಲ್ಲೆಯ ಬಹುತೇಕ ಭಾಗದಲ್ಲಿ ಒಂದು ಗಂಟೆಗೂ ಹೆಚ್ಚು ಕಾಲ ಮಳೆ ಸುರಿದ ಪರಿಣಾಮ ಭೂಮಿ ಮತ್ತೆ ತಂಪು ಕಾಣುವಂತಾಯಿತು. ಸಂಜೆ ಸುರಿಯುತ್ತಿರುವ ಮಳೆಯಲ್ಲೇ ಕೃಷಿ ಕಾರ್ಮಿಕರು ಮನೆಗೆ ತೆರಳುತ್ತಿರುವ ದೃಶ್ಯ ಕಂಡು ಬಂದಿತು. ಮುಧೋಳ, ಬಾದಾಮಿ ಸೇರಿದಂತೆ ಹಲವೆಡೆ ಮೋಡ ಕವಿದ ವಾತಾವರಣವಿದ್ದು ರಾತ್ರಿ ಮಳೆ ಮುನ್ಸೂಚನೆ ಇತ್ತು. ನಗರದ ಪ್ರದೇಶದಲ್ಲಿ ವಿದ್ಯುತ್‌ ಕೈಕೊಟ್ಟು ತೊಂದರೆ ಅನುಭವಿಸುವಂತಾಯಿತು.