ಬಾಗಲಕೋಟೆ: ಅಪಾಯದ ಮಟ್ಟ ತಲುಪಿದ ಕೃಷ್ಣೆ ನದಿ, ಕೈಯಲ್ಲಿ ಹಾಲಿನ ಕ್ಯಾನ್ ಹಿಡಿದು ಈಜಿದ ರೈತರು

ಬಾಗಲಕೋಟೆ: ಮುಳುಗಡೆ ನಾಡು ಎಂದೇ ಹೆಸರಾಗಿರುವ ಬಾಗಲಕೋಟೆಯಲ್ಲಿ ಮಳೆಯ ಅಬ್ಬರ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಲೇ ಇದೆ.

ವರುಣನ ಆರ್ಭಟದಿಂದಾಗಿ ಕೃಷ್ಣೆ ನದಿ ತುಂಬು ತುಳುಕುತ್ತಿದ್ದು, ರೈತರು ಹಾಗೂ ಜನರು ತೀವ್ರ ಸಂಕಷ್ಟಕ್ಕೀಡಾಗಿದ್ದಾರೆ.

ಬಾಗಲಕೋಟೆ ಜಿಲ್ಲೆಯ ಜಮಖಂಡಿ ತಾಲೂಕಿನ ತುಬಚಿ- ಮುತ್ತೂರು ನಡುಗಡ್ಡೆ ಸಂಪೂರ್ಣ ಜಲಾವೃತಗೊಂಡಿದೆ.

ಪರಿಸ್ಥಿತಿ ಹೀಗಿದ್ದರೂ ರೈತರು ಹಾಲು ಮಾರಲು ಮುಂದಾಗಿರುವುದು ಪರಿಸ್ಥಿತಿಗೆ ಹಿಡಿದ ಕನ್ನಡಿಯಾಗಿದೆ.

ಹರಿಯುವ ಕೃಷ್ಣೆಯ ಮಧ್ಯೆ ಈಜುತ್ತಲೇ ಹಾಲು ಮಾರಾಟಕ್ಕೆ ರೈತರು ತೆರಳಿದ್ದಾರೆ. ನಡುಗಡ್ಡೆಯಿಂದ ತುಬಚಿ ಗ್ರಾಮಕ್ಕೆ ಹಾಲು ಮಾರಾಟಕ್ಕೆ ರೈತರು ಮುಂದಾಗಿದ್ದಾರೆ.

ಕೃಷ್ಣಾ ನದಿಗೆ ಹರಿದು ಈಗಾಗಲೇ 2 ಲಕ್ಷ 17 ಸಾವಿರ ಕ್ಯುಸೆಕ್‌ ನೀರು ಹರಿದು ಬಂದಿದೆ. ಪ್ರತಿವರ್ಷ ಪ್ರವಾಹ ಭೀತಿ ಎದುರಾದರೂ ನಡುಗಡ್ಡೆಯಲ್ಲೇ 100ಕ್ಕೂ ಅಧಿಕ ಕುಟುಂಬಗಳು ವಾಸಿಸುತ್ತಿವೆ.

ನಡುಗಡ್ಡೆಯ ರೈತ ಕುಟುಂಬಗಳು ಹಾಲು ಮಾರಾಟದಿಂದಲೇ ಬದುಕು ಸಾಗಿಸುತ್ತಿದ್ದಾರೆ.

ನಡುಗಡ್ಡೆಯಿಂದ ತುಬಚಿ ಗ್ರಾಮಕ್ಕೆ ಎತ್ತರವಾಗಿ ಸೇತುವೆ ನಿರ್ಮಿಸುವಂತೆ ರೈತ ಕುಟುಂಬಗಳು ಮನವಿ ಮಾಡುತ್ತಿವೆ.