ಬಾರ್‌ಕೋಡ್‌ ಬದಲು ಬಿಲ್‌ ಭರ್ತಿ ನಕಾರಕ್ಕೆ ದಿಗಿಲು

ಕಲಾದಗಿ: ನಮ್ಮ ನಮ್ಮ ಲ್ಯಾಂಡ್‌ಫೋನ್‌ಗಳ ಬಿಲ್‌ನ್ನು ಅಂಚೆ ಕಚೇರಿಗಳಲ್ಲಿ ತುಂಬುವ ಕಳೆದ ಅನೇಕ ದಶಕಗಳ ಅತ್ಯುತ್ತಮ ಗ್ರಾಹಕ ಸ್ನೇಹಿ ಯೋಜನೆ ಸ್ಥಗಿತಗೊಂಡಿತೆ? ಇನ್ನು ಮುಂದೆ ನಮ್ಮ ಫೋನ್‌ಬಿಲ್‌ನ್ನು ತುಂಬಲು ಬ್ಯಾಂಕ್‌ಗಳಿಗೆ ಹೋಗಬೇಕೆ? ಈ ತಿಂಗಳ ಬಿಲ್‌ನ್ನು ಎಲ್ಲಿ ತುಂಬಬೇಕು?.

ಇಂಥಹ ಅನೇಕ ಗೊಂದಲದ ಪರದಾಟದ ಪ್ರಶ್ನೆಗಳು ಬರೀ ಗ್ರಾಮವೊಂದರಲ್ಲಷ್ಟೇ ಅಲ್ಲ ಜಿಲ್ಲಾದ್ಯಂತ್ಯ ಬಿಎಸ್‌ಎನ್‌ಎಲ್‌ನ ಲ್ಯಾಂಡ್‌ಫೋನ್‌ ಹೊಂದಿರುವ ಗ್ರಾಹಕರಲ್ಲಿ ಕೇಳಿಬರುತ್ತಿವೆ.

ತುಂಬಿಸಿಕೊಳ್ಳುತ್ತಿಲ್ಲ ಬಿಲ್‌:

ಪ್ರತಿತಿಂಗಳು ತಮ್ಮ ಲ್ಯಾಂಡ್‌ಫೋನ್‌ ಬಿಲ್‌ನ್ನು ತುಂಬುತ್ತಿದ್ದ ಅಂಚೆ ಕಚೇರಿಗಳಲ್ಲಿ ಬಿಲ್‌ ತುಂಬಿಸಿಕೊಳ್ಳುತ್ತಿಲ್ಲ ಎಂಬುದು ಗೊಂದಲ, ಪರದಾಟಕ್ಕೆ ಕಾರಣ. ಪ್ರತಿ ತಿಂಗಳಿನಂತೆ ತಮ್ಮ ಬಿಲ್‌ ಹಿಡಿದು ಅಂಚೆ ಕಚೇರಿಗೆ ಹೋದವರಿಗೆ ಅಂಚೆ ಕಚೇರಿ ಸಿಬ್ಬಂದಿಯಿಂದ ಎದುರಾಗುತ್ತಿರುವುದು 'ಬಿಲ್‌ನಲ್ಲಿರುವ ಬಾರ್‌ ಕೊಡ್‌ ಬದಲಾಗಿದೆ, ಹೀಗಾಗಿ ನಮ್ಮಲ್ಲಿ ತುಂಬಿಸಿಕೊಳ್ಳುವುದಿಲ್ಲ'ಎಂಬ ಮಾತು.

ಬದಲಾಗಿದೆ ಕೋಡ್‌:

ಈ ತಿಂಗಳು ಬಂದಿರುವ ಫೋನ್‌ ಬಿಲ್‌ಗಳಲ್ಲಿ ಏಕಾಏಕಿ ಬಾರ್‌ಕೋಡ್‌ ಬದಲಾಗಿರುವುದು ಅದರ ಕೆಳಗೆ ಬ್ಯಾಂಕ್‌ ಬಳಕೆಗೆ ಮಾತ್ರ ಎಂದು ಬರೆದಿರುವುದು ಅಂಚೆ ಕಚೇರಿಗಳಲ್ಲಿ ಬಿಲ್‌ ತುಂಬಿಸಿಕೊಳ್ಳದಂತೆ ಮಾಡಿದೆ.

ಮೊದಲಿನ ಬಿಲ್‌ಗಳಲ್ಲಿದ್ದ ಬಾರ್‌ಕೋಡನ್ನು ಸ್ಕ್ಯಾ‌ನ್‌ ಮಾಡುತ್ತಿದ್ದಂತೆ ಅದು ಸರಿಯಾಗಿ ಓಪನ್‌ಆಗಿ ಬಿಲ್‌ನ ಮೊತ್ತ ಅಂಚೆ ಕಚೇರಿಯ ಕಂಪ್ಯೂಟರ್‌ಗಳಲ್ಲಿ ಬರುತ್ತಿತ್ತು. ಆದರೆ ಈಗ ಸ್ಕ್ಯಾ‌ನ್‌ ಮಾಡಿದರೆ ಮೊತ್ತ ಬರದಿರುವುದು ಗೊಂದಲಕ್ಕೆ ಕಾರಣವಾಗಿ ಅಂಚೆ ಕಚೇರಿಯವರು ಬಿಲ್‌ ತುಂಬಿಸಿಕೊಳ್ಳುತ್ತಿಲ್ಲ. ಈ ಬಗ್ಗೆ ನಮಗೇನೂ ಗೊತ್ತಿಲ್ಲಾ ಎಂದು ತಮ್ಮ ಅಸಹಾಯಕತೆ ತೋರುತ್ತಿದ್ದಾರೆ.

ಅತ್ತ ಅವರಿಗೂ ಗೊತ್ತಿಲ್ಲಾ:

ಹೀಗೇಕಾಗಿದೆ? ಗ್ರಾಹಕರು ಬಿಲ್‌ನ್ನು ಮತ್ತೆಲ್ಲಿ ತುಂಬಬೇಕು? ಎಂಬ ಪ್ರಶ್ನೆಗಳಿಗೆ ಬಿಎಸ್‌ಎನ್‌ಎಲ್‌ ಅಧಿಕಾರಿಗಳ, ಸಿಬ್ಬಂದಿಗಳ ಬಳಿಯೇ ಸ್ಪಷ್ಟ ಉತ್ತರವಿಲ್ಲ, ಅವರು ಹೇಳಿದಂತೆ ಒಂದಿಷ್ಟು ಗ್ರಾಮದ ಗ್ರಾಹಕರು ಇಲ್ಲಿನ ಬಿಎಸ್‌ಎನ್‌ಎಲ್‌ ಸಿಬ್ಬಂದಿಗೆ ಬಿಲ್‌ನ ಹಣ ಕೊಟ್ಟಿದ್ದಾರೆ. ಹೀಗೆ ಬಂದಿರುವ ಬಿಲ್‌ನ ಹಣವನ್ನು ಅವರು ಬಾಗಲಕೋಟೆಗೆ ಹೋಗಿ ತುಂಬುತ್ತೇವೆ ಎನ್ನುತ್ತಾರೆ ಸ್ಥಳೀಯ ಸಿಬ್ಬಂದಿ.

ಗ್ರಾಹಕರು ಹೈರಾಣು:

ಯಾವುದೇ ಸ್ಪಷ್ಟ ಮಾಹಿತಿ ನೀಡದೆ ದಿಢೀರ್‌ ಆಗಿರುವ ಬದಲಾವಣೆಯಿಂದ ಈ ತಿಂಗಳು ಬಿಲ್‌ ತುಂಬಲು ಪರದಾಡುತ್ತಿದ್ದು, ಇದಕ್ಕೊಂದು ಸ್ಪಷ್ಟ ಮಾರ್ಗದರ್ಶನ ನೀಡುವ ಕೆಲಸ ಬಿಎಸ್‌ಎನ್‌ಎಲ್‌ ಹಾಗೂ ಅಂಚೆ ಕಚೇರಿಯ ಅಧಿಕಾರಿಗಳಿಂದ ಕೂಡಲೆ ಆಗಬೇಕಾಗಿದೆ ಎಂದು ಗ್ರಾಹಕರು ಒತ್ತಾಯಿಸಿದ್ದಾರೆ.

ಭಾಳ ಸಮಸ್ಸೆಯಾಗಿದೆ
ಅಂಚೆ ಕಚೇರಿಗಳಲ್ಲಿ ಆಗಿರುವ ಬದಲಾವಣೆಯಿಂದ ಫೋನ್‌ ಬಿಲ್‌ ತುಂಬಲಿಕ್ಕೆ ಭಾಳ ಸಮಸ್ಯೆಯಾಗಿದೆ. ಎಲ್ಲಿ ತುಂಬಬೇಕು ಎಂಬ ಬಗ್ಗೆ ಸಂಬಂಧಿಧಿಸಿದವರಿಂದ ಸ್ಪಷ್ಟ ಉತ್ತರ ಸಿಗುತ್ತಿಲ್ಲ. ಸಂಬಂಧಿಸಿದವರು ಕೂಡಲೇ ಇದನ್ನು ಸರಿಪಡಿಸಬೇಕು.

ವಿ.ಜಿ.ದೇಶಪಾಂಡೆ, ಬಿಎಸ್‌ಎನ್‌ಎಲ್‌ ಗ್ರಾಹಕರು, ಕಲಾದಗಿ.