ರಾಷ್ಟ್ರಪಕ್ಷಿ ರಕ್ಷಿಸಿದ ಅಧಿಕಾರಿಗಳು

ಬಾಗಲಕೋಟ : ಅನಾರೋಗ್ಯಪೀಡಿತವಾಗಿದ್ದ ರಾಷ್ಟ್ರಪಕ್ಷಿ ನವಿಲಿಗೆ ಚಿಕಿತ್ಸೆ ಒದಗಿಸಿ ಜೀವ ರಕ್ಷಿಸುವಲ್ಲಿ ಜಿಲ್ಲೆಯ ಅಧಿಕಾರಿಗಳು ಯಶಸ್ವಿಯಾಗಿದ್ದಾರೆ.

ಜಿಲ್ಲೆಯ ಬಾದಾಮಿ ತಾಲೂಕಿನ ಕೆರಕಲಮಟ್ಟಿ ಬಳಿ ಅನಾರೋಗ್ಯದಿಂದ ಬಳಲಿದ್ದ ನವಿಲನ್ನು ರಕ್ಷಿಸಲಾಗಿದೆ. ಕೆರಕಲಮಟ್ಟಿಯ 220 ಕೆವಿ ವಿದ್ಯುತ್‌ ಕೇಂದ್ರದ ಬಳಿ 20ಕ್ಕೂ ಹೆಚ್ಚು ನವಿಲುಗಳಿವೆ. ಈ ಪೈಕಿ ನವಿಲೊಂದು ತೀವ್ರವಾಗಿ ಅಸ್ವಸ್ಥಗೊಂಡು ಕೇಂದ್ರದ ಹಿಂಭಾಗದ ಗಿಡದಲ್ಲಿ ಆಶ್ರಯ ಪಡೆದಿತ್ತು. ನವಿಲಿನ ಸ್ಥಿತಿ ಗಮನಿಸಿದ ಕಾವಲುಗಾರ ಸಂತೋಷ ಪಡಸಲಗಿ ಈ ಕುರಿತು ವಿಜಯ ಕರ್ನಾಟಕಕ್ಕೆ ಮಾಹಿತಿ ನೀಡಿದರು.

ನವಿಲಿಗೆ ಚಿಕಿತ್ಸೆ ಒದಗಿಸುವಂತೆ ಜಿಲ್ಲಾಧಿಕಾರಿ ಕೆ.ಜಿ.ಶಾಂತಾರಾಂ ಅವರಿಗೆ ಮಾಹಿತಿ ನೀಡಿದಾಗ ಅವರು ತಕ್ಷಣ ಅರಣ್ಯ ಇಲಾಖೆ ಅಧಿಕಾರಿಗಳಿಗೆ ಸೂಚನೆ ನೀಡಿದರು. ಡಿಎಫ್‌ಒ ಬಸವರಾಜಯ್ಯ ಮಾರ್ಗದರ್ಶನದಲ್ಲಿ ಎಸಿಎಫ್‌ಒ ರಘುನಾಥ, ಬಾದಾಮಿಯ ಅರಣ್ಯ ಅಧಿಕಾರಿಗಳು ಸ್ಥಳಕ್ಕೆ ಧಾವಿಸಿದರು. ಈ ಮಧ್ಯೆ ಪಶುಸಂಗೋಪನೆ ಇಲಾಖೆ ಉಪನಿರ್ದೇಶಕ ಡಾ.ಪ್ರಕಾಶ ಜೋಶಿ ನವಿಲಿಗೆ ಚಿಕಿತ್ಸೆ ಒದಗಿಸಲು ವೈದ್ಯರಿಗೆ ಸೂಚನೆ ನೀಡಿದರು. ಕೆರಕಲಮಟ್ಟಿಯಿಂದ ನವಿಲು ತಂದ ಅಧಿಕಾರಿಗಳು ಬಾಗಲಕೋಟದಲ್ಲಿ ಚಿಕಿತ್ಸೆ ಒದಗಿಸಿದರು. ಸದ್ಯ ನವಿಲನ್ನು ಬಾದಾಮಿಯ ಅರಣ್ಯ ಇಲಾಖೆಯ ನರ್ಸರಿಯಲ್ಲಿ ಆರೈಕೆ ಮಾಡಲಾಗುತ್ತಿದೆ. ನಂತರ ಅರಣ್ಯಕ್ಕೆ ಬಿಡಲಾಗುತ್ತದೆ ಎಂದು ಅರಣ್ಯ ಇಲಾಖೆ ಅಧಿಕಾರಿಗಳು ತಿಳಿಸಿದ್ದಾರೆ.