ವಿಕೃತ ಮನಸ್ಸು ಕ್ಷಮಿಸುತ್ತೇವೆ: ಎಂ.ಬಿ.ಪಾಟೀಲ

ಬಾಗಲಕೋಟ: 'ಮಾತೆ ಮಹಾದೇವಿಯವರ ನಿಧನದ ಸಂದರ್ಭದಲ್ಲಿ ಸಾಮಾಜಿಕ ಜಾಲತಾಣದಲ್ಲಿ ವಿಕೃತಿ ಮೆರೆದ ಮನಸ್ಸುಗಳನ್ನು ನಾವು ಕ್ಷಮಿಸುತ್ತೇವೆ' ಎಂದು ಗೃಹ ಸಚಿವ ಎಂ.ಬಿ.ಪಾಟೀಲ ಹೇಳಿದರು.

ಜಿಲ್ಲೆಯ ಕೂಡಲಸಂಗಮದಲ್ಲಿ ಶನಿವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು 'ಕೆಲವರು ಸಾಮಾಜಿಕ ತಾಣಗಳಲ್ಲಿ ವಿಕೃತಿ ಮೆರೆದಿರುವುದು ಗಮನಕ್ಕೆ ಬಂದಿದೆ, ಇಂತಹ ಮನಸ್ಸುಳ್ಳವರಿಗೆ ಏನೂ ಹೇಳುವಂತಿಲ್ಲ. ಬಸವಣ್ಣ, ಯೇಸು ಹಾಗೂ ಗೌತಮ ಬುದ್ಧರಂತಹವರನ್ನೂ ಇವರು ಬಿಟ್ಟಿಲ್ಲ. ಬಸವ ಧರ್ಮದಲ್ಲಿ ಇಂತಹ ವಿಕೃತ ಕೃತ್ಯಕ್ಕೆ ಕ್ಷಮೆಯಿರಲಿ ಎಂದು ಹೇಳಲಾಗಿದೆ, ಹೀಗಾಗಿ ನಾವು ಇಂತಹವರನ್ನು ಕ್ಷಮಿಸುತ್ತೇವೆ'ಎಂದು ತಿಳಿಸಿದರು.

'ಐದು ದಶಕಗಳ ಕಾಲ ಬಸವ ಧರ್ಮಕ್ಕೆ ವಿಶಿಷ್ಟವಾದ ಕೊಡುಗೆಯನ್ನು ಮಾತಾಜಿ ನೀಡಿದ್ದಾರೆ. ಕೂಡಲಸಂಗಮದ ಉಳಿವು, ಅಭಿವೃದ್ಧಿ ಹಾಗೂ ಜಗತ್ತಿನಾದ್ಯಂತ ಕೂಡಲಸಂಗಮ ಪ್ರಚಾರಗೊಳ್ಳಲು ಮಾತಾಜಿ ಕಾರಣರಾಗಿದ್ದಾರೆ. ಬಸವಣ್ಣನವರ ವಚನಗಳನ್ನು ಜನಸಾಮಾನ್ಯರಿಗೆ ಮಾತಾಜಿ ತಲುಪಿಸಿದ್ದಾರೆ. ಬಸವ ಧರ್ಮ ಹಾಗೂ ಸಂಸ್ಕೃತಿ ಜಾಗತಿಕ ಮಟ್ಟದಲ್ಲಿ ಬೆಳಗಬೇಕು ಎಂಬುದು ಅವರ ಆಸೆಯಾಗಿತ್ತು. ಅವರು ಲಿಂಗೈಕ್ಯರಾಗಿದ್ದರೂ ಸದಾ ನಮ್ಮೊಂದಿಗಿರುತ್ತಾರೆ' ಎಂದರು.