ಡೆಂಘೆಯಿಂದ ಬಾಲಕಿ ಸಾವು?

ಬೆಳಗಾವಿ: ಕಂಗ್ರಾಳಿ ಖುದ್‌ರ್‍ ಗ್ರಾಮದ ಬಾಲಕಿಯೋರ್ವಳು ಮಂಗಳವಾರ ಅನಾರೋಗ್ಯದಿಂದ ಮೃತಪಟ್ಟಿದ್ದು, ಡೆಂಘೆ ಕಾಯಿಲೆಯಿಂದ ಮೃತಪಟ್ಟಿರಬಹುದು ಎಂದು ಶಂಕಿಸಲಾಗಿದೆ.

ಗ್ರಾಳಿ ಗ್ರಾಮದ ಐಶ್ವರ್ಯ ವಿನೋಭಾ ಗೋಲಭಾವಿ (16) ಮೃತ ಬಾಲಕಿ. ಏ.13 ರಂದು ಎಸ್‌ಎಸ್‌ಎಲ್‌ಸಿ ಪರೀಕ್ಷೆ ಮುಗಿಸಿ ಸಂತೋಷದಲ್ಲಿದ್ದ ಬಾಲಕಿಗೆ ಏಕಾಏಕಿ ಏ.16ರಂದು ಜ್ವರ ಕಾಣಿಸಿಕೊಂಡಿತ್ತು. ಪ್ರಾಥಮಿಕ ಚಿಕಿತ್ಸೆ ಪಡೆದರೂ ಗುಣವಾಗದಿದ್ದಾಗ ನಗರದ ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಚಿಕಿತ್ಸೆಗೆ ಸ್ಪಂದಿಸದೆ ಮಂಗಳವಾರ ಮೃತಪಟ್ಟಿದ್ದಾಳೆ.

ಡೆಂಘೆ ಜ್ವರದಿಂದ ಮೃತಪಟ್ಟಿದ್ದಾಳೆ ಎಂದು ಶಂಕಿಸಿರುವ ಆರೋಗ್ಯ ಇಲಾಖೆ ಮಲೇರಿಯಾ ಅಧಿಕಾರಿ ಮೃತ್ಯುಂಜಯ ಪಲ್ಲೇದ ಬುಧವಾರ ಗ್ರಾಮಕ್ಕೆ ಭೇಟಿ ನೀಡಿ ಚಿಕಿತ್ಸಾ ವರದಿ ಪರಿಶೀಲಿಸಿದ್ದಾರೆ. ಮುಂಜಾಗ್ರತಾ ಕ್ರಮ ಕೈಗೊಳ್ಳಲಾಗಿದ್ದು, ಕುಡಿಯುವ ನೀರನ್ನು ಶುದ್ಧ ಮತ್ತು ಸುರಕ್ಷತೆಯಿಂದ ಬಳಸಲು ಆದ್ಯತೆ ನೀಡಿ ಎಂದು ಡಾ.ಪಲ್ಲೇದ ಸಾರ್ವಜನಿಕರಲ್ಲಿ ಮನವಿ ಮಾಡಿದ್ದಾರೆ.