ಅನಕೊಂಡಾ ಸಂಶೋಧನೆ ತಂಡದಲ್ಲಿ ಬೆಳಗಾವಿಯ 17ರ ಪೋರ

ಬೆಳಗಾವಿ: ನಗರದ ಲವ್‌ ಡೆಲ್‌ ಕೇಂದ್ರೀಯ ವಿದ್ಯಾಲಯದಲ್ಲಿ ಪ್ರಾಥಮಿಕ ಶಿಕ್ಷಣ ಪಡೆದುಕೊಂಡಿದ್ದ ಸಾಯಿಶ್‌ ಸೋಲನಕರ್‌ 17ನೇ ವಯಸ್ಸಿನಲ್ಲಿಯೇ ಹಸಿರು ಅನಕೊಂಡಗಳ ಬಗ್ಗೆ ಅಧ್ಯಯನ ಮಾಡುವ ಸಂಶೋಧನಾ ತಂಡದಲ್ಲಿ ಸ್ಥಾನ ಪಡೆಯುವ ವಿಶೇಷ ಸಾಧನೆ ಮಾಡಿದ್ದಾರೆ.

ಅತಿ ಕಿರಿಯ ವಯಸ್ಸಿನಲ್ಲಿ ಹರ್ಪಟಲಾಜಿಸ್ಟ್‌ (ಸರೀಸೃಪಗಳು ಮತ್ತು ಉಭಯಚರಗಳನ್ನು ಅಧ್ಯಯನ ಮಾಡುವ ವ್ಯಕ್ತಿ) ಆಗಿ ಅವರು ತಂಡದಲ್ಲಿ ಸ್ಥಾನ ಪಡೆದುಕೊಂಡಿದ್ದಾರೆ. ಇಂಥದೊಂದು ಉತ್ಕೃಷ್ಟ ಸಂಶೋಧನಾ ತಂಡದಲ್ಲಿ ಸ್ಥಾನ ಪಡೆದ ವಿಶ್ವದ ಅತಿ ಕಿರಿಯ ಸಂಶೋಧಕ ಸಾಯಿಶ್‌ ಎಂದು ಹೇಳಲಾಗುತ್ತಿದೆ.

ಅನಕೊಂಡ ಜಗತ್ತಿನ ಅತಿ ದೊಡ್ಡ ತಳಿಯ ಹಾವು ಎಂದು ಒಪ್ಪಲಾಗಿದೆ. ಈ ಹಾವು ಮತ್ತು ಸಣ್ಣ ಕಿವಿಯ ನಾಯಿ ಪೆರು ಹಾಗೂ ದಕ್ಷಿಣ ಅಮೆರಿಕಾದ ಅಮೆಜಾನ್‌ ಮಳೆಕಾಡುಗಳಲ್ಲಿ ಹೆಚ್ಚಾಗಿ ಇರುತ್ತವೆ. ಪೆರುವಿನ ಮ್ಯಾಡ್ರೆ ಡಿ ಡಿಯೋಸ್‌ ಪ್ರದೇಶದ ಟಾಂಬೊಪಾಟಾ ನದಿ ತೀರದ ಟಾಂಬೊಪಾಟಾ ಜೈವಿಕ ಸಂಶೋಧನಾ ಕೇಂದ್ರದ ಮೂಲಕ ಈ ತಂಡ ಸಂಶೋಧನೆ ಕೈಗೊಳ್ಳಲಿದೆ. ನ್ಯಾಷನಲ್‌ ಜಿಯಾಗ್ರಫಿ ಖ್ಯಾತಿಯ ಪೌಲ್‌ ರೊಸೋಲಿ ನೇತೃತ್ವದಲ್ಲಿ ತಂಡ ಕಾರ್ಯನಿರ್ವಹಿಸಲಿದೆ.

ಸಾಯಿಶ್‌ ಅವರು ಪ್ರಾಥಮಿಕ ಶಿಕ್ಷಣದೊಂದಿಗೆ ತಮ್ಮ ಬಾಲ್ಯದ ದಿನಗಳನ್ನು ಬೆಳಗಾವಿಯಲ್ಲಿಯೇ ಹೆಚ್ಚು ಕಳೆದಿದ್ದಾರೆ ಎನ್ನುವುದು ವಿಶೇಷ. ಸದ್ಯ ಅವರು ಪುಣೆಯ ನಾವ್ರೊಝಿ ವಾಡಿಯಾ ಕಾಲೇಜಿನಲ್ಲಿ ವ್ಯಾಸಂಗ ಮಾಡುತ್ತಿದ್ದಾರೆ. ಇವರು ಶಿಕ್ಷಣದ ಜತೆಯಲ್ಲಿಯೇ ಅನೇಕ ಸಾಕ್ಷ್ಯಚಿತ್ರ ತಯಾರಿಕೆ, ಸಂಶೋಧನಾತ್ಮಕ ಅಧ್ಯಯನಗಳನ್ನು ನಡೆಸಿ ಗಮನಸೆಳೆದಿದ್ದಾರೆ.