ಬೆಳಗಾವಿಯಲ್ಲಿ 17ನೇ ಶಿಶುವಿಗೆ ಜನ್ಮ ನೀಡಿದ 38 ವರ್ಷದ ಮಹಾರಾಷ್ಟ್ರ ಮಹಿಳೆ

ಔರಂಗಾಬಾದ್‌: ಕೆಲಸ ಹುಡುಕಿಕೊಂಡು ಮಹಾರಾಷ್ಟ್ರದಿಂದ ಕರ್ನಾಟಕಕ್ಕೆ ವಲಸೆ ಬಂದಿದ್ದ 38 ವರ್ಷದ ಮಹಿಳೆಯೊಬ್ಬಳು ಕಬ್ಬಿನ ಗದ್ದೆಯಲ್ಲಿಯೇ 17ನೇ ಶಿಶುವಿಗೆ ಜನ್ಮ ನೀಡಿದ ಘಟನೆ ಬೆಳಗಾವಿ ಜಿಲ್ಲೆಯಲ್ಲಿ ಸಂಭವಿಸಿದೆ ಎಂದು ಸುದ್ದಿಸಂಸ್ಥೆ ವರದಿ ಮಾಡಿದೆ.

ಲಂಕಾಬಾಯಿ ಎಂದು ಮಹಿಳೆಯನ್ನು ಗುರುತಿಸಲಾಗಿದ್ದು, ಹೆಣ್ಣು ಶಿಶುವು ಜನ್ಮ ತಳೆದ ಕೂಡಲೇ ಮೃತಪಟ್ಟಿದೆ. ''ಬೀಡ್‌ ಜಿಲ್ಲೆಯ ಮಜಲ್‌ಗಾಂವ್‌ ತಾಲೂಕಿನ ನಿವಾಸಿ ಲಂಕಾಬಾಯಿ ಬಗ್ಗೆ ಮಾಹಿತಿ ಕಲೆ ಹಾಕುತ್ತಿದ್ದೇವೆ. ಆಕೆ ಅಲೆಮಾರಿ ಸಮುದಾಯಕ್ಕೆ ಸೇರಿದವಳು ಎಂದು ತಿಳಿದುಬಂದಿದೆ. ಸ್ಥಳೀಯ ಅಧಿಕಾರಿಗಳು ಆಕೆಯನ್ನು ನವೆಂಬರ್‌ನಲ್ಲಿ ಕಂಡಿದ್ದಾಗಿ ತಿಳಿಸಿದ್ದಾರೆ.

ನ.8ರಂದು ಆಕೆ ತಪಾಸಣೆಗಾಗಿ ಪ್ರಾಥಮಿಕ ಆರೋಗ್ಯ ಕೇಂದ್ರಕ್ಕೆ ಭೇಟಿ ನೀಡಿದ್ದಳು. 20ನೇ ಬಾರಿಗೆ ಗರ್ಭ ಧರಿಸಿದ್ದ ಆಕೆಗೆ ಈಗಾಗಲೇ 11 ಮಕ್ಕಳಿದ್ದು, ಆ ಪೈಕಿ 9 ಹೆಣ್ಣುಮಕ್ಕಳು,'' ಎಂದು ಆರೋಗ್ಯಾಧಿಕಾರಿ ಡಾ. ಪವಾರ್‌ ತಿಳಿಸಿದ್ದಾರೆ. ನ.21ರಂದು ಆರೋಗ್ಯ ವಿಚಾರಿಸಲು ಅಧಿಕಾರಿಗಳು ಲಂಕಾಬಾಯಿ ಮನೆಗೆ ಭೇಟಿ ನೀಡಿದ್ದರು. ಆದರೆ ಆಕೆ ಕುಟುಂಬ ಸಮೇತ ಕರ್ನಾಟಕಕ್ಕೆ ವಲಸೆ ಹೋಗಿಯಾಗಿತ್ತು ಎಂದು ತಿಳಿದುಬಂದಿದೆ.