ಪೊರಕೆ ವ್ಯಾಪಾರಸ್ಥ ಕುಟುಂಬದ ಅಂಧ ಬಾಲಕಿಗೆ ಶೇ.81 ಅಂಕ

ಬೆಳಗಾವಿ : ಪೊರಕೆ ಮಾರುವ ಕುಟುಂಬದ ಅಂಧ ಮಗಳು ಕಡುಬಡತನದ ನಡುವೆಯೂ ದ್ವಿತೀಯ ಪಿಯುಸಿಯಲ್ಲಿ ಶೇ. 81 ರಷ್ಟು ಫಲಿತಾಂಶ ಗಳಿಸುವ ಮೂಲಕ ಗಮನಸೆಳೆದಿದ್ದಾರೆ.

ರಾಯಬಾಗ ತಾಲೂಕಿನ ಸವಸುದ್ದಿ ಗ್ರಾಮದ ಮೇಘಾ ಸದಾಶಿವ ಭಜಂತ್ರಿ ಈ ಸಾಧನೆ ಮಾಡಿದ ವಿದ್ಯಾರ್ಥಿನಿ. ಇವರ ತಂದೆ ಸದಾಶಿವ, ತಾಯಿ ಮಂಜುಳಾ ಅವರ ಐದು ಮಕ್ಕಳಲ್ಲಿ ಮೇಘನಾ ಸೇರಿ ಇಬ್ಬರು ಹೆಣ್ಣು ಮಕ್ಕಳು ಅಂಧರು. ಪೊರಕೆ ಮಾರಿ ಬಂದ ಹಣದಲ್ಲಿಯೇ ಜೀವನ ನಡೆಸುವ ಈ ಕುಟುಂಬದಲ್ಲಿ ಮೇಘಾ ದ್ವಿತೀಯ ಪಿಯುಸಿ ಪರೀಕ್ಷೆಯಲ್ಲಿ ಉತ್ತಮ ಅಂಕ ಗಳಿಸಿ ಹೆತ್ತವರ ಶ್ರಮಕ್ಕೆ ಪ್ರತಿಫಲ ತಂದಿದ್ದಾರೆ.

ಬೆಳಗಾವಿಯ ಆರ್‌ಪಿಡಿ ಕಾಲೇಜಿನ ವಿದ್ಯಾರ್ಥಿನಿ ಮೇಘಾ ಮುಂದೆ ಸಂಗೀತದಲ್ಲಿ ಬಿಎ ಮತ್ತು ಕಂಪ್ಯೂಟರ್‌ ಶಿಕ್ಷಣ ಪಡೆಯುವ ಆಸೆ ಹೊಂದಿದ್ದಾರೆ. ಆರ್ಥಿಕ ನೆರವು ಸಿಕ್ಕರೆ ಮಗಳ ಶಿಕ್ಷಣ ಮುಂದುವರಿಸುವ ಬಯಕೆ ಅವರ ಹೆತ್ತವರದ್ದು. ಮೇಘಾ ಅವರ ಸಂಪರ್ಕ ಸಂಖ್ಯೆ: 9108831401