ಕಾಕತಿ ಬಳಿ ಟೆಂಪೋ ಪಲ್ಟಿ: 9 ಜನರಿಗೆ ಗಾಯ

ಬೆಳಗಾವಿ : ವಂಟಮೂರಿಯಿಂದ ಬೆಳಗಾವಿ ನಗರದತ್ತ ಬರುತ್ತಿದ್ದ ಪ್ರಯಾಣಿಕರ ಟೆಂಪೋವೊಂದು ಕಾಕತಿ ಸಮೀಪದ ಮುಕ್ತಿಮಠದ ಬಳಿ ಪಲ್ಟಿಯಾದ ಪರಿಣಾಮ 9 ಜನರು ಗಾಯಗೊಂಡಿದ್ದಾರೆ.

ಹುಕ್ಕೇರಿ ತಾಲೂಕಿನ ರಾಜಕಟ್ಟಿ ಗ್ರಾಮದ ಬಸವಪ್ಪ ಈರಪ್ಪ ಪಣಗುದ್ದಿ (39), ಸಿದ್ಧಪ್ಪ ಈರಪ್ಪ ಪಣಗುದ್ದಿ (33), ಲಗಮಪ್ಪ ಮ್ಯಾಕಲ್‌ (35), ಶಹಾಬಂದರ ಗ್ರಾಮದ ಬಸವರಾಜ ಜಕ್ಕಪ್ಪ ಜಕ್ಕಣ್ಣವರ (34), ಬಸವಣ್ಣಿ ಫಕ್ಕೀರಪ್ಪ ಚಿಂದಿಮರದ (54), ಶಿರೂರ ಗ್ರಾಮದ ನಾಗರಾಜ ಮಾರುತಿ ನಾಯಿಕ್‌ (22), ಇಸ್ಲಾಂಪುರದ ಶಂಕರಯ್ಯ ಭೀಮಗೌಡ ಕಲಹಟ್ಟಿ (30), ಶಂಕರಯ್ಯ ಎಸ್‌.ಹಿರೇಮಠ (45), ಮಲ್ಲೇಹೊಳ ಗ್ರಾಮದ ರೇಣುಕಾ ಸಿದ್ಧಪ್ಪ ನಾಯಿಕ್‌ (35) ಗಾಯಗೊಂಡ ಪ್ರಯಾಣಿಕರು.

ಮಂಗಳವಾರ ಬೆಳಗ್ಗೆ ವಂಟಮೂರಿ ಮತ್ತು ಗಟಗುದ್ದಿ ಗ್ರಾಮಗಳಿಂದ ಪ್ರಯಾಣಿಕರನ್ನು ಹೊತ್ತು ರಾಷ್ಟ್ರೀಯ ಹೆದ್ದಾರಿ ಮೇಲೆ ಬರುತ್ತಿದ್ದ ಟೆಂಪೊ ಭೂತರಾಮನಹಟ್ಟಿ ಸಮೀಪದ ಮುಕ್ತಿಮಠದ ಬಳಿ ಚಾಲಕನ ನಿಯಂತ್ರಣ ತಪ್ಪಿ ಡಿವೈಡರ್‌ಗೆ ಡಿಕ್ಕಿ ಹೊಡೆದು ಪಲ್ಟಿಯಾಗಿದೆ. ಗಾಯಗೊಂಡವರ ಪೈಕಿ ಓರ್ವ ಪ್ರಯಾಣಿಕನ ಸ್ಥಿತಿ ಗಂಭೀರವಾಗಿದ್ದು, ಇನ್ನುಳಿದವರಿಗೆ ಸಣ್ಣ ಪುಟ್ಟ ಗಾಯಗಳಾಗಿವೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಘಟನೆ ಕುರಿತು ಕಾಕತಿ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.