ಕೆಲಸ ಹಿಡಿಸದ ಕಾರಣ ಸ್ನೇಹಿತನನ್ನೇ ಕೊಂದ!

ಪಣಜಿ: ಸ್ನೇಹಿತನು ತನಗೆ ಕೊಡಿಸಿದ ಕೆಲಸ ಹಿಡಿಸಿಲ್ಲ ಎಂಬ ಕಾರಣಕ್ಕೆ ಆ ಸ್ನೇಹಿತನನ್ನೇ ವ್ಯಕ್ತಿಯೊಬ್ಬ ಕೊಲೆಗೈದ ಘಟನೆ ಗೋವಾ ಬಿಚೋಲಿ ಸಮೀಪದ ನಾನೋಡಾದಲ್ಲಿನಡೆದಿದೆ.

ಕರ್ನಾಟಕದ ವಿಜಯಪುರ ಜಿಲ್ಲೆಸಿಂಧಗಿ ಮೂಲದ ಶಬ್ಬೀರ್‌ ಇಮಾಮಸಾಬ್‌ ಬೈಕಟಿ ಕೊಲೆಯಾದ ವ್ಯಕ್ತಿ. ವಿಜಯಪುರ ಮೂಲದ ಈರಣ್ಣ ಗೌಡ ಆರೋಪಿ.

ಈರಣ್ಣ ನಾಲ್ಕು ದಿನಗಳ ಹಿಂದೆ ಕೆಲಸದ ವಿಷಯಕ್ಕೆ ಸಂಬಂಧಿಸಿದಂತೆ ಶಬ್ಬೀರ್‌ನೊಂದಿಗೆ ಚರ್ಚೆ ನಡೆಸಿದ್ದ. ಶಬ್ಬೀರ್‌, ಈರಣ್ಣನನ್ನು ಕರೆಸಿಕೊಂಡು ಕೆಲಸ ಕೊಡಿಸಿದ್ದ. ಇಬ್ಬರೂ ಒಟ್ಟಿಗೆ ವಾಸ್ತವ್ಯ ಹೂಡಿದ್ದರು. ಆದರೆ ಆ ಕೆಲಸ ಈರಣ್ಣನಿಗೆ ಹಿಡಿಸಿರಲಿಲ್ಲ. ಈ ವಿಚಾರವಾಗಿ ಕುಡಿದ ಅಮಲಿನಲ್ಲಿ ಇಬ್ಬರ ನಡುವೆ ನಡೆದ ಜಗಳ ವಿಕೋಪಕ್ಕೆ ಹೋಗಿ ಈರಣ್ಣ, ಶಬ್ಬೀರನ ಕುತ್ತಿಗೆಗೆ ಚಾಕುವಿನಿಂದ ಇರಿದು ಕೊಲೆಗೈದಿದ್ದಾನೆ.

ಘಟನೆ ನಂತರ ಆರೋಪಿ ಈರಣ್ಣ ವಿಜಯಪುರಕ್ಕೆ ಪಲಾಯನಗೈಯಲು ತಯಾರಿ ನಡೆಸಿದ್ದ. ಅಷ್ಟರಲ್ಲೇ ಕೊಲೆಯ ಮಾಹಿತಿ ಪಡೆದ ಬಿಚೋಲಿ ಪೊಲೀಸರು ಆತನನ್ನು ಬಂಧಿಸಿದ್ದಾರೆ.