ಶ್ರೀಶೈಲದಿಂದ ಮರಳಿದ ಪಾದಯಾತ್ರಿಗಳಿಗೆ ಅದ್ಧೂರಿ ಸ್ವಾಗತ

ತೆಲಸಂಗ : ಗ್ರಾಮದಿಂದ ಪಾದಯಾತ್ರೆ ಮೂಲಕ ಮಲ್ಲಿಕಾರ್ಜುನ ದೇವರ ಕಂಬಿ ಹೊತ್ತು ಆಂಧ್ರದ ಶ್ರೀಶೈಲ ಮಲ್ಲಿಕಾರ್ಜುನ ದೇವಸ್ಥಾನಕ್ಕೆ ತೆರಳಿದ್ದ ಭಕ್ತಾದಿಗಳು ಸೋಮವಾರ ಮರಳಿ ಗ್ರಾಮ ಪ್ರವೇಶಿಸುತ್ತಿದ್ದಂತೆ ಅದ್ಧೂರಿಯಾಗಿ ಬರಮಾಡಿಕೊಳ್ಳಲಾಯಿತು.

ಭಾನುವಾರ ರಾತ್ರಿಯೇ ಗ್ರಾಮದ ಹೊರವಲಯದಲ್ಲಿರುವ ಬನದ ಮಲ್ಲಿಕಾರ್ಜುನ ದೇವಸ್ಥಾನದಲ್ಲಿ ತಂಗಿದ್ದ ಯಾತ್ರಾರ್ಥಿಗಳು ಬೆಳಗ್ಗೆ ಮೆರವಣಿಗೆ ಮೂಲಕ ಗ್ರಾಮ ಪ್ರವೇಶಿಸಿದರು.

ಬೆಳಗ್ಗೆ 10ರಿಂದ ಸಂಜೆ 6ರವರೆಗೆ ಗ್ರಾಮದ ಶರಣರಬಾವಿ ಹಿರೇಮಠದ ತೋಟದಲ್ಲಿ ಭಕ್ತರ ದರ್ಶನಕ್ಕೆ ಅವಕಾಶ ಮಾಡಿಕೊಡಲಾಯಿತು. ಉರಿ ಬಿಸಿಲನ್ನು ಲೆಕ್ಕಿಸದೆ ಗ್ರಾಮದ ಭಕ್ತರು ತಂಡೋಪತಂಡವಾಗಿ ಆಗಮಿಸಿ ಕಂಬಿ ಮಲ್ಲಯ್ಯನ ದರ್ಶನ ಪಡೆದರು.

ಸಂಜೆ ಶರಣಬಾವಿ ತೋಟದಿಂದ ಗ್ರಾಮದಲ್ಲಿನ ಮಲ್ಲಿಕಾರ್ಜುನ ದೇವಸ್ಥಾನಕ್ಕೆ ಆಗಮಿಸಲಾಯಿತು. ಈ ವೇಳೆ ದಿವಿಟಗಿ ಸೇವೆ ಮಾಡಿದ ವಿಜಯ ಪತ್ತಾರ, ಮಲ್ಲಯ್ಯಾ ಮಠಪತಿ, ಶ್ರೀಶೈಲ ಮಠಪತಿ, ರವಿ ಮಠಪತಿ, ರವಿ ರೋಡಗಿ, ಶೇಖರ ರೋಡಗಿ, ಗಂಗಪ್ಪ ಪತ್ತಾರ, ಮಲ್ಲಪ್ಪ ಅರ್ಜುನಗಿ, ಸುಭಾಷ ಖೊಬ್ರಿ, ಮಾಲಪ್ಪ ಟೋಪಾನಗೋಳ, ಸಂಜಯ ಹುಜರೆ, ಕಾಸಪ್ಪ ಹಳ್ಳದ ಸೇರಿದಂತೆ ಅನೇಕರು ಪಾಲ್ಗೊಂಡಿದ್ದರು.