ಅಹಮದಾಬಾದ್‌, ಪುಣೆ ವಿಮಾನ ಸಂಚಾರ ಆರಂಭ

ಬೆಳಗಾವಿ: ಕೇಂದ್ರ ಸರಕಾರದ ಉಡಾನ್‌ ಯೋಜನೆಯಡಿ ಬೆಳಗಾವಿ ವಿಮಾನ ನಿಲ್ದಾಣದಿಂದ ಪುಣೆ ಮತ್ತು ಅಹಮದಾಬಾದ್‌ ನಡುವೆ ವಿಮಾನ ಸಂಚಾರ ಬುಧವಾರ ಆರಂಭಗೊಂಡಿತು.

ಸ್ಟಾರ್‌ ಏರ್‌ ಕಂಪನಿಯ ಅಹಮದಾಬಾದ್‌ಗೆ ವಿಮಾನ ಸಂಚಾರಕ್ಕೆ ಬೆಳಗಾವಿ ವಿಮಾನ ನಿಲ್ದಾಣದ ನಿರ್ದೇಶಕ ರಾಜೇಶಕುಮಾರ ಮೌರ್ಯ ಕೇಕ್‌ ಕತ್ತರಿಸುವ ಮೂಲಕ ಚಾಲನೆ ನೀಡಿದರು. ಅಹಮದಾಬಾದ್‌ಗೆ ತೆರಳುತ್ತಿರುವ ಪ್ರಯಾಣಿಕರಿಗೆ ಗುಲಾಬಿ ಹೂವು ಕೊಟ್ಟು ಬೀಳ್ಕೊಡಲಾಯಿತು. ಇದೇ ವೇಳೆ ಪುಣೆಗೆ ಹೊಸ ವಿಮಾನ ಸಂಚಾರವೂ ಆರಂಭಗೊಂಡಿತು.

ಈ ವೇಳೆ ಉಪಸ್ಥಿತರಿದ್ದ ಸ್ಟಾರ್‌ ಏರ್‌ ಕಂಪನಿ ಅಧಿಕಾರಿಗಳು, ಸಂಸ್ಥೆಯಿಂದ ಇನ್ನೂ ಹೆಚ್ಚು ಮಾರ್ಗಗಳಲ್ಲಿ ವಿಮಾನ ಆರಂಭಿಸುವುದಾಗಿ ಭರವಸೆ ನೀಡಿದರು.

ಸ್ಟಾರ್‌ ಏರ್‌ ಸೇವೆಯೊಂದಿಗೆ ಬೆಳಗಾವಿ ವಿಮಾನ ನಿಲ್ದಾಣದಿಂದ ಈಗ ನಿತ್ಯ ಆರು ವಿಮಾನಗಳು ಹಾರಾಟ ನಡೆಸುತ್ತಿವೆ. ಸ್ಪೈಸ್‌ಜೆಟ್‌, ಏರ್‌ಇಂಡಿಯಾ ವಿಮಾನಗಳು ಬೆಳಗಾವಿಯಿಂದ ವಿವಿಧ ನಗರಗಳಿಗೆ ಹಾರಾಟ ನಡೆಸುತ್ತಿವೆ.