ಜು.5ರಂದು ಅರಬಾವಿ ಗ್ರಾಮದೇವಿಯರ ಜಾತ್ರೆ ಸಂಪನ್ನ

ಬೆಳಗಾವಿ: ಜೂನ್‌ 22ರಿಂದ ಆರಂಭಗೊಂಡಿರುವ ಗೋಕಾಕ ತಾಲೂಕು ಅರಬಾವಿಯ ಗ್ರಾಮದೇವತೆಯರ ಜಾತ್ರಾ ಮಹೋತ್ಸವವು ಜು.5ರವರೆಗೆ ನಡೆಯಲಿದೆ.

ಜು.1 ರಂದು ಮಧ್ಯಾಹ್ನ 3 ಗಂಟೆಗೆ ಶ್ರೀದೇವಿಯರನ್ನು ಮಹಿಳೆಯರ ಕುಂಭ, ಆರತಿ ಹಾಗೂ ವಾದ್ಯವೈಭವಗಳೊಂದಿಗೆ ಸ್ಥಳೀಯ ಕನ್ನಡ ಹೆಣ್ಣುಮಕ್ಕಳ ಶಾಲಾ ಆವರಣದ ಮಂಟಪಕ್ಕೆ ತಂದು ಕೂರಿಸಲಾಗುವುದು. ಹಿರಿಯರಿಂದ ದೇವಿಯರ ಉಡಿ ತುಂಬುವ ಕಾರ್ಯ ಜರುಗುವುದು. ರಾತ್ರಿ 9 ರಿಂದ ಬೆಳಗಿನ ಜಾವದವರೆಗೆ ವಾದ್ಯವೈಭವಗಳೊಂದಿಗೆ ಶ್ರೀದೇವಿಯರ ಹೊನ್ನಾಟ ನಡೆಯುತ್ತದೆ. ನಂತರ ಶ್ರೀದೇವಿಯರನ್ನು ಶಾಲಾ ಆವರಣದ ಮಂಟಪಕ್ಕೆ ತಂದು ಕೂರಿಸಲಾಗುವುದು.

ಜು.2 ರಂದು ಬೆಳಗ್ಗೆ ನಿತ್ಯದಂತೆ ಪೂಜಾ ಕೈಂಕರ್ಯ, ಉಡಿ ತುಂಬುವುದು, ಊರಿನ ಎಲ್ಲ ದೇವತೆಗಳಿಗೆ ಅಭಿಷೇಕ, ನೈವೇದ್ಯ, ಮಹಾಪ್ರಸಾದಗಳು ನಡೆಯುತ್ತವೆ. ರಾತ್ರಿ 9 ಗಂಟೆಗೆ ವಾದ್ಯವೈಭವಗಳೊಂದಿಗೆ ಶ್ರೀದೇವಿಯರ ಹೊನ್ನಾಟ ನಡೆದು ಕೊನೆಗೆ ಮಹಾಲಕ್ಷ್ಮೇ ದೇವಸ್ಥಾನದಲ್ಲಿ ಶ್ರೀದೆವಿಯರನ್ನು ಕೂರಿಸಲಾಗುವುದು.

ಜು.3 ರಂದು ಬೆಳಗ್ಗೆ ನಿತ್ಯದಂತೆ ಪೂಜೆ, ಉಡಿತುಂಬುವುದು, ಮಹಾಪ್ರಸಾದ ನಡೆಯುತ್ತದೆ. ರಾತ್ರಿ 9 ಗಂಟೆಗೆ ಚೌಡಕಿ ಪದಗಳು, ಲಲಿತಾ ಬಾಗವ್ವಗೋಳ ಮತ್ತು ಸಂಗಡಿಗರು ಹಾಗೂ ಗೌರವ್ವ ಸಂಗಡಿಗರು ಕಾರ್ಯಕ್ರಮ ನಡೆಸಿಕೊಡುವರು.

ಜು.4 ರಂದು ಬೆಳಗ್ಗೆ ನಿತ್ಯದಂತೆ ಪೂಜೆ, ಉಡಿ ತುಂಬುವುದು, ನೈವೇದ್ಯ, ಮಹಾಪ್ರಸಾದ, ರಾತ್ರಿ 10 ಗಂಟೆಗೆ ಬಸವೇಶ್ವರ ನಾಟ್ಯ ಸಂಘದವರಿಂದ ಭಕ್ತಿ ಪ್ರಧಾನ ನಾಟಕ ಪ್ರದರ್ಶನ ನಡೆಯುತ್ತದೆ.

ಜು. 5 ರಂದು ನಿತ್ಯದ ಪೂಜಾ ಕಾರ್ಯಹಾಗೂ ಮಹಾಪ್ರಸಾದ ಇದೆ. ಮಧ್ಯಾಹ್ನ 3 ಗಂಟೆಗೆ ಶ್ರೀದೇವಿಯರನ್ನು ವಾದ್ಯವೈಭವದೊಂದಿಗೆ ಶ್ರೀದೇವಿ ಮಂದಿರಕ್ಕೆ ಕರೆತರಲಾಗುವುದು ಎಂದು ಜಾತ್ರಾ ಸಂಘಟಕರು ತಿಳಿಸಿದ್ದಾರೆ.