ಅಧಿಕಾರ ಒಂದು, ಅಧಿಕಾರಿಗಳಿಬ್ಬರು !

ಉಗಾರ : ಉಗಾರ ಖುರ್ದ ಪುರಸಭೆ ಮುಖ್ಯಾಧಿಕಾರಿಗಳಾಗಿ ಇಬ್ಬರು ಅಧಿಕಾರಿಗಳು ಒಂದೇ ಕ್ಯಾಬಿನ್‌ನಲ್ಲಿ ಕುಳಿತು ಕೆಲಸದ ಆದೇಶ ನೀಡುತ್ತಿರುವುದರಿಂದ ಸಿಬ್ಬಂದಿ ಸಹಿತ ಪುರಸಭೆ ಅಧ್ಯಕ್ಷ , ಸದಸ್ಯರು ಚಿಂತೆಗೀಡಾಗಿದ್ದಾರೆ!

ಬುಧವಾರ ಉಗಾರ ಪುರಸಭೆಯಿಂದ ವರ್ಗಾವಣೆಗೊಂಡು ಹೋಗಿರುವ ಮುಖ್ಯಾಧಿಕಾರಿ ಕಮಲವ್ವಾ ಭಾಗೋಜಿ ಮರಳಿ ಮುಖ್ಯಾಧಿಕಾರಿ ಎಂದು ಅವರ ಕ್ಯಾಬಿನ್‌ನಲ್ಲಿ ಕುಳಿತಿದ್ದನ್ನು ಕಂಡು ಶೇಡಬಾಳ ಪಟ್ಟಣ ಪಂಚಾಯತಿಯಿಂದ ವರ್ಗಾವಣೆಗೊಂಡು ಬಂದಿರುವ ಮೋಹನ ರಾಜಾಪುರೆ ತಬ್ಬಿಬ್ಬಾದರು.

ಉಗಾರ ಪುರಸಭೆಗೆ ಮುಖ್ಯಾಧಿಕಾರಿಗಳಾಗಿ ಕಳೆದ 14 ತಿಂಗಳಗಳಿಂದ ಕಮಲವ್ವಾ ಭಾಗೋಜಿ ಅಧಿಕಾರ ವಹಿಸಿಕೊಂಡಿದ್ದರು. ನ.21 ರಂದು ಕಮಲವ್ವಾ ಅವರನ್ನು ವರ್ಗಾವಣೆಗೊಳಿಸಿ, ಶೇಡಬಾಳ ಪಟ್ಟಣ ಪಂಚಾಯಿತಿ ಅಧಿಕಾರಿ ಮೋಹನ ರಾಜಾಪುರೆಯವರಿಗೆ ಉಗಾರ ಪುರಸಭೆ ಹೆಚ್ಚಿನ ಕಾರ್ಯಭಾರ ಒಪ್ಪಿಸಿರುವ ಬಗ್ಗೆ ಜಿಲ್ಲಾಧಿಕಾರಿ ಆದೇಶ ಹೊರಡಿಸಿದರು. ಅದರಂತೆ ಮೋಹನ ರಾಜಾಪುರೆ ನ.30 ರಂದು ಜಿಲ್ಲಾಧಿಕಾರಿ ಕಾರ್ಯಾಲಯಕ್ಕೆ ಹಾಜರಾಗಿ ಡಿಸೆಂಬರ್‌ ಡಿ.3 ರಂದು ಉಗಾರ ಪುರಸಭೆ ಮುಖ್ಯಾಧಿಕಾರಿಯಾಗಿ ಅಧಿಕಾರ ವಹಿಸಿಕೊಂಡರು.

ಜಿಲ್ಲಾಧಿಕಾರಿ ಕಮಲವ್ವಾ ಭಾಗೋಜಿಯವರಿಗೆ ನೀಡಿದ ಆದೇಶದಲ್ಲಿ ವರ್ಗಾವಣೆ ನಂತರ ಬೇರೆ ಯಾವುದೇ ಸ್ಥಳ ಉಲ್ಲೇಖಿಸದಿರುವುದನ್ನು ಧಾರವಾಡ ಹೈಕೋರ್ಟ್‌ನಲ್ಲಿ ಪ್ರಶ್ನಿಸಿದ್ದರು. ಜಿಲ್ಲಾಧಿಕಾರಿ ಹೊರಡಿಸಿರುವ ಆದೇಶಕ್ಕೆ ಹೈಕೋರ್ಟ್‌ ತಡೆಯಾಜ್ಞೆ ನೀಡಿದ್ದರಿಂದ ತಾವು ಬುಧವಾರ ಉಗಾರದಲ್ಲಿ ಮುಖ್ಯಾಧಿಕಾರಿಯಾಗಿ ಮರಳಿ ಹಾಜರಾಗಿರುವುದಾಗಿ ಕಮಲವ್ವಾ ಭಾಗೋಜಿ ಹೇಳಿಕೊಂಡಿದ್ದಾರೆ.

ಇಂಥದ್ದೇ ಪ್ರಕರಣವೊಂದು ವಾರದ ಹಿಂದಷ್ಟೇ ಬೆಳಗಾವಿ ಸಬ್‌ ರಿಜಿಸ್ಟ್ರಾರ್‌ ಕಚೇರಿಯಲ್ಲಿ ನಡೆದಿದ್ದನ್ನು ಸ್ಮರಿಸಬಹುದು.

ಅಧ್ಯಕ್ಷರು, ಸದಸ್ಯರು ಚಿಂತೆಯಲ್ಲಿ :
ಉಗಾರ ಖುರ್ದ ಪುರಸಭೆ ಅಧ್ಯಕ್ಷ ಶಶಿಕಾಂತ ಕಾಂಬಳೆಯವರು ಪುರಸಭೆ ಅಧಿಕಾರಿ ಹುದ್ದೆಗಾಗಿ ಇಬ್ಬರು ಅಧಿಕಾರಿಗಳಲ್ಲಿಯ ಪೈಪೋಟಿ ಕಂಡು ಚಕಿತರಾದರು. 23 ಸದಸ್ಯರನ್ನು ಹೊಂದಿರುವ ಪಟ್ಟಣ ಪಂಚಾಯಿತಿಯಲ್ಲಿನ ಈ ಗೊಂದಲ ಎಲ್ಲರನ್ನೂ ಚಿಂತೆಗೀಡುಮಾಡಿದೆ. ಸ್ಥಾಯಿ ಸಮಿತಿ ಅಧ್ಯಕ್ಷ ಮದನ ದೇಶಿಂಗೆ, ಪುರಸಭೆ ಸದಸ್ಯ ಮಂಜುನಾಥ ತೇರದಾಳೆ, ಲಾಜಂ ಸೈಯದ್‌ ಸೇರಿದಂತೆ ಅನೇಕರು ಈ ಗೊಂದಲ ಶೀಘ್ರ ನಿವಾರಣೆಗೆ ಆಗ್ರಹಿಸಿದ್ದಾರೆ.