ಕಬ್ಬು ಸಾಗಣೆಗೆ ತಡೆ; ಟ್ರ್ಯಾಕ್ಟರ್‌ ಚಾಲಕ ಆಕ್ರೋಶ

ಅಥಣಿ : ಕಬ್ಬು ಬೆಳೆಗಾರರ ಪ್ರತಿಭಟನೆ ಪರಿಣಾಮ ಅಥಣಿ - ಮುರಗುಂಡಿ ನಡುವೆ ಜೇವರ್ಗಿ-ಸಂಕೇಶ್ವರ ರಾಜ್ಯ ಹೆದ್ದಾರಿಯಲ್ಲಿ ಕಬ್ಬು ಸಾಗಿಸುತ್ತಿದ್ದ ಸುಮಾರು 300 ಟ್ರ್ಯಾಕ್ಟರ್‌ಗಳು ಕಳೆದ ಐದು ದಿನಗಳಿಂದ ನಿಂತಿದ್ದು ರೈತರು ಹಾಗೂ ಟ್ರ್ಯಾಕ್ಟರ್‌ ಮಾಲೀಕರು ನಷ್ಟ ಅನುಭವಿಸುವಂತಾಗಿದೆ.

ಕಬ್ಬು ಕಟಾವು ಮಾಡಿದ 36 ಗಂಟೆಯಲ್ಲಿ ನುರಿಕೆ ಮಾಡಬೇಕು. ಇಲ್ಲವಾದರೆ ಕಬ್ಬು ಒಣಗಿ ತೂಕ ಮತ್ತು ಸಕ್ಕರೆ ಇಳುವರಿ ಕಡಿಮೆಯಾಗುತ್ತದೆ. ಆದರೆ, 5 ದಿನಗಳಿಂದ ಕಬ್ಬು ತುಂಬಿದ ಟ್ರ್ಯಾಕ್ಟರ್‌ಗಳು ರಸ್ತೆ ಪಕ್ಕ ನಿಂತಿದೆ. ಇದರಿಂದ ಕಬ್ಬು ಒಣಗುತ್ತಿದೆ. ಹಲ್ಯಾಳದ ಕೃಷ್ಣಾ ಸಹಕಾರಿ ಕಾರ್ಖಾನೆಗೆ ಕಬ್ಬು ಸಾಗಿಸುವ ವಾಹನಗಳನ್ನು ಮಾತ್ರ ಪ್ರತಿಭಟನೆಕಾರರು ಬಿಡುಗಡೆ ಮಾಡುತ್ತಿದ್ದ ಉಳಿದ ಎಲ್ಲ ಕಾರ್ಖಾನೆಗೆ ಕಬ್ಬು ಸಾಗಣೆ ಮಾಡುವ ವಾಹನಗಳನ್ನು ತಡೆದಿದ್ದಾರೆ.

5 ದಿನಗಳಿಂದ ಟ್ರ್ಯಾಕ್ಟರ್‌ ನಿಲ್ಲಿಸಿರುವುದರಿಂದ ತಮಗೆ ನಷ್ಟವಾಗುತ್ತಿದೆ ಎಂದು ಮಂಗಳವಾರ ಚಾಲಕರು ಪ್ರತಿಭಟನೆಕಾರರ ಬಳಿ ಹೇಳಿದರು. ಈ ವೇಳೆ ಪ್ರತಿಭಟನೆಕಾರರು ಮತ್ತು ಟ್ರ್ಯಾಕ್ಟರ್‌ ಚಾಲಕರ ನಡುವೆ ಮಾತಿನ ಚಕಮಕಿ ನಡೆಯಿತು. ಸ್ಥಳದಲ್ಲಿದ್ದ ಪೊಲೀಸರು, ಸಿಎಂ ನೇತೃತ್ವದಲ್ಲಿ ಸಭೆ ನಡೆಯುತ್ತಿದ್ದು ಇಷ್ಟರಲ್ಲೇ ಸಮಸ್ಯೆ ಬಗೆಹರಿಯಲಿದೆ ಎಂದು ಹೇಳಿ ಪರಿಸ್ಥಿತಿ ತಿಳಿಗೊಳಿಸಿದರು.