ಬೆಳಗಾವಿ-ಬೆಂಗಳೂರು ಮತ್ತೊಂದು ವಿಮಾನ

ಬೆಳಗಾವಿ: ಏರ್‌ಇಂಡಿಯಾ ವಿಮಾನವು ಬೆಳಗಾವಿ-ಬೆಂಗಳೂರು ಮಧ್ಯೆ ಸಂಚಾರ ನಿಲ್ಲಿಸಿರುವ ಅವಧಿಯಲ್ಲೇ ಅದೇ ಮಾರ್ಗದಲ್ಲಿ ಸ್ಪೈಸ್‌ಜೆಟ್‌ ಜೂನ್‌ 20ರಿಂದ ಮತ್ತೊಂದು ವಿಮಾನ ಸಂಚಾರ ಆರಂಭಿಸುತ್ತಿದೆ.

ಏರ್‌ಇಂಡಿಯಾವು ಬೆಳಗಾವಿಯಿಂದ ಬೆಂಗಳೂರು ಮಧ್ಯೆ ಆರಂಭಿಸಿದ್ದ ಏಕೈಕ ವಿಮಾನ ಎ319 ಏರ್‌ಬಸ್‌ ಮೇ 31ರಿಂದ ಹಾರಾಟ ನಿಲ್ಲಿಸಿದೆ. ಬೆಳಗಾವಿ ವಿಮಾನ ನಿಲ್ದಾಣ ಉಡಾನ್‌ ವ್ಯಾಪ್ತಿಗೆ ಒಳಗಾದ ಬಳಿಕ ಬೆಳಗಾವಿಯಿಂದ ಹಾರಟ ನಿಲ್ಲಿಸಿದ ಮೊದಲ ವಿಮಾನ ಇದಾಗಿದೆ. ಈ ವಿಮಾನದಲ್ಲಿ ಶೇ. 95 ರಷ್ಟು ಪ್ರಯಾಣಿಕರು ಪ್ರಯಾಣಿಸುತ್ತಿದ್ದರೂ ಸೇವೆ ನಿಲ್ಲಿಸಿದ್ದಕ್ಕೆ ಈ ಭಾಗದ ಜನರು ಆಕ್ಷೇಪ ವ್ಯಕ್ತಪಡಿಸಿದ್ದರು.

ಆದರೀಗ ಅದೇ ಮಾರ್ಗದಲ್ಲಿ ಸ್ಪೈಸ್‌ಜೆಟ್‌ ವಿಮಾನ ಟಿಕೆಟ್‌ ಬುಕಿಂಗ್‌ ಆರಂಭಿಸಿದೆ. ಜೂನ್‌ 20ರಿಂದ ಬೆಂಗಳೂರು-ಬೆಳಗಾವಿ-ಬೆಂಗಳೂರು ವಿಮಾನ ಸಂಚಾರ ಆರಂಭವಾಗಲಿದೆ. ಬುಧವಾರ ಹೊರತುಪಡಿಸಿ ಉಳಿದೆಲ್ಲ ದಿನ ಸಂಜೆ 6.25ಕ್ಕೆ ಬೆಳಗಾವಿಯಿಂದ ವಿಮಾನ ಹೊರಡಲಿದೆ. ಅದೇ ದಿನ ರಾತ್ರಿ 7.25ಕ್ಕೆ ಬೆಂಗಳೂರು ತಲುಪಲಿದೆ ಎಂದು ಸ್ಪೈಸ್‌ಜೆಟ್‌ ತನ್ನ ಅಧಿಕೃತ ವೆಬ್‌ಸೈಟ್‌ನಲ್ಲಿ ತಿಳಿಸಿದೆ.