20ರಿಂದ ಬೆಳಗಾವಿ-ಮುಂಬೈ ವಿಮಾನ ಸೇವೆ

ಬೆಳಗಾವಿ : ಸ್ಪೈಸ್‌ಜೆಟ್‌ ವಿಮಾನ ಸಂಸ್ಥೆಯು ಜೂನ್‌ 20ರಿಂದ ವಾರದ ಏಳು ದಿನ ಬೆಳಗಾವಿ-ಮುಂಬಯಿ ನಡುವೆ ಒಂದು ಮತ್ತು ಬೆಂಗಳೂರು-ಬೆಳಗಾವಿ ಮಧ್ಯೆ ಎರಡು ವಿಮಾನ ಸೇವೆ ಆರಂಭಿಸಲು ಟಿಕೆಟ್‌ ಬುಕಿಂಗ್‌ ಆರಂಭಿಸಿದೆ.

ಬೆಳಗಾವಿ-ಮುಂಬಯಿ ನಡುವೆ ವಿಮಾನ ಸಂಚಾರ ಆರಂಭಿಸಬೇಕು ಎಂದು ಸಾಕಷ್ಟು ಬೇಡಿಕೆ ಇತ್ತು. ಆದರೆ, ಉಡಾನ್‌ ಯೋಜನೆಯಿಂದ ಮುಂಬಯಿ ವಿಮಾನ ನಿಲ್ದಾಣದಲ್ಲಿ ಸ್ಥಳಾವಕಾಶ ಕೊರತೆಯಿಂದ ಬೆಳಗಾವಿ-ಮುಂಬಯಿ ವಿಮಾನ ಆರಂಭವಾಗಿರಲಿಲ್ಲ ಎಂದು ಹೇಳಲಾಗುತ್ತಿತ್ತು. ಈಗ ಜನರ ಬಹು ಬೇಡಿಕೆಯ ಮಾರ್ಗದಲ್ಲಿ ಜೂನ್‌ 20ರಿಂದ ವಿಮಾನ ಸೇವೆ ಆರಂಭವಾಗುತ್ತಿದೆ. ಈ ವಿಮಾನವು ಪ್ರತಿ ದಿನ ಮಧ್ಯಾಹ್ನ 12.25ಕ್ಕೆ ಬೆಳಗಾವಿಯಿಂದ ಹೊರಟು ಮಧ್ಯಾಹ್ನ 1.40ಕ್ಕೆ ಮುಂಬಯಿ ತಲುಪಲಿದೆ. ಮಧ್ಯಾಹ್ನ 2.50ಕ್ಕೆ ಮುಂಬಯಿ ಇಂದ ಹೊರಟು 4.05ಕ್ಕೆ ಬೆಳಗಾವಿಗೆ ಬರಲಿದೆ.

ಇದರ ಜತೆಗೆ ಸ್ಪೈಸ್‌ಜೆಟ್‌ ಜೂನ್‌ 20ರಿಂದ ಬೆಳಗಾವಿ-ಬೆಂಗಳೂರು ಮಧ್ಯೆ ಪ್ರತಿ ದಿನ ಎರಡು ವಿಮಾನ ಸೇವೆ ಆರಂಭಿಸುತ್ತಿದೆ. ಬುಧವಾರ ಮಾತ್ರ ಒಂದು ವಿಮಾನ ಸಂಚರಿಸಲಿದೆ. ದಿನದ ಮೊದಲ ವಿಮಾನ ಸಂಜೆ 4.25ಕ್ಕೆ ಬೆಳಗಾವಿಯಿಂದ ಹೊರಟು ಸಂಜೆ 5.45ಕ್ಕೆ ಬೆಂಗಳೂರು ತಲುಪಲಿದೆ. ಇನ್ನೊಂದು ವಿಮಾನ ಸಂಜೆ 6.25ಕ್ಕೆ ಬೆಳಗಾವಿಯಿಂದ ಹೊರಟು 7.25ಕ್ಕೆ ಬೆಂಗಳೂರು ತಲುಪಲಿದೆ. ಬುಧವಾರ ಮಧ್ಯಾಹ್ನದ ಒಂದು ವಿಮಾನ ಮಾತ್ರ ಸಂಚರಿಸಲಿದೆ.

ಜತೆಗೆ ಪ್ರತಿದಿನ ಬೆಳಗ್ಗೆ 10.45ಕ್ಕೆ ಬೆಂಗಳೂರಿನಿಂದ ಹೊರಡುವ ವಿಮಾನ ಮಧ್ಯಾಹ್ನ 12.05ಕ್ಕೆ ಬೆಳಗಾವಿಗೆ ಬರಲಿದೆ. ಸಂಜೆ 4.45ಕ್ಕೆ ಹೊರಡುವ ವಿಮಾನ ಸಂಜೆ 6.05ಕ್ಕೆ ಬೆಳಗಾವಿ ತಲುಪಲಿದೆ. ಬುಧವಾರ ಬೆಳಗಿನ ವಿಮಾನ ಮಾತ್ರ ಬೆಂಗಳೂರಿನಿಂದ ಬೆಳಗಾವಿಗೆ ಬರಲಿದೆ. ಸ್ಪೈಸ್‌ಜೆಟ್‌ ಈ ಮಾರ್ಗದಲ್ಲಿ ಈಗಾಗಲೇ ಟಿಕೆಟ್‌ ಬುಕಿಂಗ್‌ ಆರಂಭಿಸಿದೆ.