ನಾಯಿ ಉಪಟಳ ತಡೆಯಲು ಕೆನ್ನೀರು ಬಾಟಲಿ ಪ್ರಯೋಗ!

ಸರಳಾ ಸಾತ್ಪುತೆ

Vijaya Karnataka Web

ಬೆಳಗಾವಿ: ‘‘ಉಪ್ಪರಗಿ ಮ್ಯಾಲ ಕೂರಿಸಿದ್ರೂ ನಾಯಿ ತನ್ನ ಬುದ್ದಿ ಬಿಡೋದಿಲ್ಲ’’ ಎಂದು ಗೊಣಗಾಡುತ್ತಾ ಮನೆ ಮುಂದೆ ನಾಯಿಗಳು ಮಾಡುವ ಹೇಸಿಗೆಯನ್ನು ಸ್ವಚ್ಛ ಮಾಡುತ್ತಿದ್ದ ಬೆಳಗಾವಿ ಮಂದಿ ಇದೀಗ ಹೊಸ ಐಡಿಯಾ ಕಂಡುಕೊಂಡಿದ್ದಾರೆ.

ಮನೆಯ ಮುಂದೆ ಕುಂಕುಮ ಮಿಶ್ರಿತ ನೀರಿನ ಬಾಟಲ್‌ ಇಟ್ಟು ನಿಟ್ಟುಸಿರು ಬಿಟ್ಟಿದ್ದಾರೆ. ಇದನ್ನು ಕಂಡವರು ತಮ್ಮ ಊರು ಕೇರಿಗಳಲ್ಲಿಇದೇ ಪ್ರಯೋಗ ಮಾಡುತ್ತಿದ್ದಾರೆ.

ನೊಣದಿಂದ ನಾಯಿ ತನಕ ‘‘ಯಳ್ಳೂರ, ಧಾಮಣೆಯಿಂದ ಈ ಸನ್ನಿ ಆರಂಭವಾಗಿದೆ’’, ಎನ್ನುವ ವಡಗಾವಿ ಪಶು ಚಿಕಿತ್ಸಾಲಯದ ಮುಖ್ಯ ವೈದ್ಯಾಧಿಕಾರಿ ಡಾ. ವಿನಯಕುಮಾರ ಸಂಗ್ರೋಳೆ, ‘‘ಸದ್ಯ ರಾಜಹಂಸಗಡ, ನಂದಿಹಳ್ಳಿ, ನಾಗೇನಹಟ್ಟಿ ವರೆಗೂ ಈ ಸನ್ನಿ ಹರಡಿದೆ’’, ಎನ್ನುತ್ತಾರೆ.

ವಡಗಾವಿ, ಖಾಸಬಾಗ ಪ್ರದೇಶಗಳಲ್ಲಂತೂ ಎಲ್ಲರೂ ಈ ಪ್ರಯೋಗ ಮಾಡುತ್ತಿದ್ದಾರೆ. ಮೊದಮೊದಲು ಹಳ್ಳಿಗಳಲ್ಲಿ ನೊಣಗಳ ಕಾಟ ತಪ್ಪಿಸಲು ಕುಂಕುಮ ಮಿಶ್ರಣದ ನೀರನ್ನು ಬಾಟಲಿಗಳಲ್ಲಿ ತುಂಬಿಡಲು ಆರಂಭಿಸಿದ ಜನ, ಈಗ ನಾಯಿ ಹೇಸಿಗೆ ಮಾಡುವುದನ್ನು ತಪ್ಪಿಸಲೂ ಈ ಮಾರ್ಗೋಪಾಯ ಕಂಡುಕೊಂಡಿದ್ದಾರೆ.

ಇದು ಪೆಟ್ರೋಲ್‌ ಎಂದು ತಿಳಿದು ನಾಯಿಗಳು ಓಡಿ ಹೋಗುತ್ತವೆ ಎಂಬುದು ಕಲರ್‌ ನೀರು ತುಂಬಿಸಿಡುತ್ತಿರುವವರ ಜಾಣ ತರ್ಕ. ಬಣ್ಣದ ನೀರು ನೋಡಿ ನಾಯಿ ಹೇಸಿಗೆ ಮಾಡೋದಿಲ್ಲಎಂಬುದಕ್ಕೆ ಯಾವುದೇ ಲಾಜಿಕ್‌ ಇಲ್ಲಎನ್ನುತ್ತಾರೆ ಪಶು ತಜ್ಞರು. ಆದರೆ ಈ ಪ್ರಯೋಗಕ್ಕೆ ಮಾರು ಹೋಗಿರುವ ಮಂದಿ ಇದನ್ನು ಒಪ್ಪುತ್ತಿಲ್ಲ. ನೀರ ಇಟ್ಟಮೇಲೆ ನಮ್ಮ ಮನೆ ಅಂಗಣ ಶುಚಿಯಾಗಿದೆ ಎಂದು ದೃಢವಾಗಿ ಹೇಳುತ್ತಿದ್ದಾರೆ.