ಪಕ್ಷ ನಿಷ್ಠೆ, ವಿಚಾರಕ್ಕೆ ಬದ್ಧತೆ ದೌರ್ಬಲ್ಯ ಅಲ್ಲ: ಸಂಪುಟ ವಿಸ್ತರಣೆಗೆ ಅಭಯ್ ಪಾಟೀಲ್ ಅಸಮಾಧಾನ!

ಬೆಳಗಾವಿ: ರಾಜ್ಯ ಸಚಿವ ಸಂಪುಟ ವಿಸ್ತರಣೆ ಕುರಿತು ಬಹಿರಂಗವಾಗಿ ಅಸಮಾಧಾನ ಹೊರಹಾಕಿದವರ ಸಾಲಿಗೆ ಇದೀಗ, ಬೆಳಗಾವಿ ದಕ್ಷಿಣ ವಿಧಾನಸಭಾ ಕ್ಷೇತ್ರದ ಶಾಸಕ ಅಭಯ್ ಪಾಟೀಲ್ ಕೂಡ ಸೇರಿದ್ದಾರೆ.

ಈ ಕುರಿತು ಟ್ವೀಟ್ ಮಾಡಿರುವ ಅಭಯ್ ಪಾಟೀಲ್, ಸ್ಥಾನ‌ ಮಾನ ಪಡೆಯಲು ಅನ್ಯ ಮಾರ್ಗಗಳನ್ನು ಅನುಸರಿಸದೆ ಪಕ್ಷಕ್ಕೆ ನಿಷ್ಠೆ ಮತ್ತು ವಿಚಾರಕ್ಕೆ ಬದ್ಧತೆ ಇರುವ ಕಾರ್ಯಕರ್ತರಿಗೆ ಇಂದಿನ ದಿನಮಾನಗಳಲ್ಲಿ ಸ್ಥಾನವಿಲ್ಲ ಎಂದು ಅಸಮಾಧಾನ ಹೊರಹಾಕಿದ್ದಾರೆ.

ವಿಚಾರಕ್ಕೆ ಬದ್ಧತೆ ಮತ್ತು ಪಕ್ಷಕ್ಕೆ ನಿಷ್ಠೆ ದೌರ್ಬಲ್ಯ ಅಲ್ಲ ಎಂದು ಮಾರ್ಮಿಕವಾಗಿ ಹೇಳಿರುವ ಅಭಯ್ ಪಾಟೀಲ್, ವರಿಷ್ಠರ ಇಂದಿನ ನಡೆ ವಿಷಾದಕರ ಸಂಗತಿ ಎಂದು ಹೇಳಿದ್ದಾರೆ.

ಮೇಲ್ನೋಟಕ್ಕೆ ಸಂಪುಟ ಸಂಭ್ರಮ.. ಒಳಗೆ ಮಾತ್ರ ಸಂಕಟ..! ಬಿಎಸ್‌ವೈಗೆ ಬಿಸಿ ಮುಟ್ಟಿಸುತ್ತಾ ಭಿನ್ನದನಿ..?
ಆದರೆ ಅಭಯ್ ಪಾಟೀಲ್ ಎಲ್ಲಿಯೂ ತಮಗೆ ಸಚಿವ ಸ್ಥಾನ ನೀಡಿಲ್ಲ ಎಂದು ನೇರವಾಗಿ ಬೇಸರ ವ್ಯಕ್ತಪಡಿಸದಿರುವುದು ವಿಶೇಷ ಸಂಗತಿ. ಆದರೆ ಸಂಪುಟ ವಿಸ್ತರಣೆಯ ಬಗೆಗೆ ಅವರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಇತ್ತ ಅರವಿಂದ ಬೆಲ್ಲದ ಕೂಡ ಸಂಪುಟ ವಿಸ್ತರಣೆ ಕುರಿತು ಅಸಮಾಧಾನ ವ್ಯಕ್ತಪಡಿಸಿದ್ದು, ಮುಖ್ಯಮಂತ್ರಿ ಬಿಎಸ್ ಯಡಿಯೂರಪ್ಪ ಈ ಹಿಂದೆ ತಮ್ಮನ್ನು ಸಚಿವರನ್ನಾಗಿ ಮಾಡುತ್ತೇವೆ ಎಂದು ಮಾತು ಕೊಟ್ಟಿದ್ದರು ಎಂದು ಹರಿಹಾಯ್ದಿದ್ದಾರೆ.


ಪಕ್ಷ ನಿಷ್ಠರು, ಯುವಕರಿಗೆ ಸಂಪುಟದಲ್ಲಿ ಸ್ಥಾನ ನೀಡದೇ ಅನ್ಯಾಯ ಮಾಡಲಾಗಿದೆ ಎಂದು ಹರಿಹಾಯ್ದಿರುವ ಅರವಿಂದ ಬೆಲ್ಲದ, ಯಡಿಯೂರಪ್ಪ ಕೊಟ್ಟ ಮಾತಿಗೆ ತಕ್ಕಂತೆ ನಡೆದುಕೊಂಡಿಲ್ಲ ಎಂದು ಕಿಡಿಕಾರಿದ್ದಾರೆ.

ಬಿಎಸ್‌ವೈಗೆ ಬ್ಯ್ಲಾಕ್‌ ಮೇಲ್‌ ಮಾಡಿದ್ರಾ ಸಿಪಿವೈ, ನಾಲಗೆ ಮೇಲೆ ನಿಲ್ಲದ ಯಡಿಯೂರಪ್ಪ: ಕುಟುಕಿದ ಹಳ್ಳಿ ಹಕ್ಕಿ
ಒಟ್ಟಿನಲ್ಲಿ ಸಂಪುಟ ವಿಸ್ತರಣೆ ರಾಜ್ಯ ಬಿಜೆಪಿಯಲ್ಲಿ ತೀವ್ರ ಅಸಮಾಧಾನ ಸ್ಫೋಟಗೊಳ್ಳಲು ಕಾರಣವಾಗಿದ್ದು, ಅತೃಪ್ತ ನಾಯಕರ ಮುಂದಿನ ನಡೆಯ ಕುರಿತು ತೀವ್ರ ಕುತೂಹಲ ಕೆರಳಿಸಿದೆ.