ಬೆಳಗಾವಿ; ನಾಲ್ಕು ನಾಮಪತ್ರ ತಿರಸ್ಕೃತ, ಚಿಕ್ಕೋಡಿಯಲ್ಲಿ ಎಲ್ಲವೂ ಸ್ವೀಕೃತ

ಬೆಳಗಾವಿ: ಬೆಳಗಾವಿ ಹಾಗೂ ಚಿಕ್ಕೋಡಿ ಲೋಕಸಭೆ ಕ್ಷೇತ್ರಗಳ ನಾಮಪತ್ರಗಳ ಪರಿಶೀಲನೆ ಕಾರ್ಯ ಶುಕ್ರವಾರ ನಡೆದಿದ್ದು ಬೆಳಗಾವಿ ಕ್ಷೇತ್ರಕ್ಕೆ ಸಲ್ಲಿಕೆಯಾಗಿದ್ದ ಒಟ್ಟು 76 ನಾಮಪತ್ರಗಳ ಪೈಕಿ ನಾಲ್ಕು ನಾಮಪತ್ರಗಳು ತಿರಸ್ಕೃತಗೊಂಡಿವೆ. ಚಿಕ್ಕೋಡಿಯಲ್ಲಿ 13 ಅಭ್ಯರ್ಥಿಗಳು ಸಲ್ಲಿಸಿದ್ದ 22 ನಾಮಪತ್ರಗಳೂ ಸ್ವೀಕೃತಗೊಂಡಿವೆ.

ಒಂದು ಪ್ರತಿ ನಾಮಪತ್ರ ಸಲ್ಲಿಸಿದ್ದ ಪ್ರಗತಿಶೀಲ ಸಮಾಜವಾದ ಪಕ್ಷ (ಲೋಹಿಯಾ)ದ ಅಭ್ಯರ್ಥಿ ಬೈಲಹೊಂಗಲ ಪಟ್ಟಣದ ದಯಾನಂದ ಗುರುಪುತ್ರಯ್ಯಚಿಕ್ಕಮಠ, ನ್ಯಾಷನಲ್‌ ವುಮೆನ್ಸ್‌ ಪಾರ್ಟಿಯ ಖ್ರುಷಿದ್‌ಬಾನು ಅಸ್ಲಂ ನದಾಫ್‌ ನಾಮಪತ್ರಗಳು ತಿರಸ್ಕೃತಗೊಂಡಿವೆ. ಈ ಇಬ್ಬರೂ ಅಭ್ಯರ್ಥಿಗಳು ತಲಾ ಒಂದು ನಾಮಪತ್ರ ಸಲ್ಲಿಸಿದ್ದರು.

ತಲಾ ಎರಡು ಪ್ರತಿ ನಾಮಪತ್ರ ಸಲ್ಲಿಸಿದ್ದ ಇಂಡಿಯನ್‌ ನ್ಯಾಷನಲ್‌ ಕಾಂಗ್ರೆಸ್‌ ಪಕ್ಷದ ಮೋಹನ ಯಲ್ಲಪ್ಪ ಮೋರೆ ಹಾಗೂ ಪಕ್ಷೇತರ ಅಭ್ಯರ್ಥಿ ಓಂಕಾರಸಿಂಗ್‌ ಬಾಟಿಯಾ ಅವರ ಒಂದೊಂದು ನಾಮಪತ್ರ ತಿರಸ್ಕೃತಗೊಂಡಿವೆ.

ಬಿಜೆಪಿಯ ಸುರೇಶ ಅಂಗಡಿ, ಕಾಂಗ್ರೆಸ್‌ನ ಡಾ.ವಿ.ಎಸ್‌.ಸಾಧುನವರ ಸೇರಿದಂತೆ ರಾಜಕೀಯ ಪಕ್ಷಗಳು ಹಾಗೂ ಪಕ್ಷೇತರಾಗಿ ನಾಮಪತ್ರ ಸಲ್ಲಿಸಿದ್ದ 65 ಅಭ್ಯರ್ಥಿಗಳ 72 ನಾಮಪತ್ರಗಳು ಕ್ರಮಬದ್ಧವಾಗಿವೆ ಎಂದು ಸಹಾಯಕ ಚುನಾವಣಾಧಿಕಾರಿ ಡಾ.ಎಚ್‌.ಬಿ.ಬೂದೆಪ್ಪ ತಿಳಿಸಿದ್ದಾರೆ.

ಚಿಕ್ಕೋಡಿ ಲೋಕಸಭಾ ಕ್ಷೇತ್ರದಲ್ಲಿ ಸಲ್ಲಿಕೆಯಾಗಿರುವ ನಾಮಪತ್ರಗಳ ಪರಿಶೀಲನೆ ಕಾರ್ಯವನ್ನು ಶುಕ್ರವಾರ ನಡೆಸಿದ್ದು, 13 ಅಭ್ಯರ್ಥಿಗಳು ಸಲ್ಲಿಸಿರುವ 22 ನಾಮಪತ್ರಗಳು ಸ್ವೀಕೃತಗೊಂಡಿದ್ದು, ಯಾವುದೇ ನಾಮಪತ್ರ ತಿರಸ್ಕೃತಗೊಂಡಿರುವುದಿಲ್ಲ ಎಂದು ಚುನಾವಣಾಧಿಕಾರಿ ಡಾ. ಕೆ.ವಿ.ರಾಜೇಂದ್ರ ತಿಳಿಸಿದ್ದಾರೆ.