ತಹಸೀಲ್ದಾರರಿಂದ ಸರಕಾರಕ್ಕೆ ವಂಚನೆ: ಆರೋಪ

ಬೆಳಗಾವಿ : ರಾಯಬಾಗ ತಾಲೂಕಿನ ಹಿಂದಿನ ತಹಸೀಲ್ದಾರ ಕೆ.ಎನ್‌. ರಾಜಶೇಖರ ನಿಯಮಗಳನ್ನು ಗಾಳಿಗೆ ತೂರಿ ಖಾಸಗಿ ವ್ಯಕ್ತಿಗೆ 12 ಎಕರೆ, 24 ಗುಂಟೆ ಗಾಯರಾಣ ಜಮೀನು ಮಂಜೂರು ಮಾಡಿ ಸರಕಾರಕ್ಕೆ ವಂಚನೆ ಮಾಡಿರುವುದಾಗಿ ಮಾಹಿತಿ ಹಕ್ಕು ಕಾರ್ಯಕರ್ತ ಭೀಮಪ್ಪ ಗಡಾದ ಆರೋಪಿಸಿದ್ದಾರೆ.

ಸುದ್ದಿಗೋಷ್ಠಿಯಲ್ಲಿ ಮಂಗಳವಾರ ಮಾತನಾಡಿದ ಅವರು, ಮಾಹಿತಿ ಹಕ್ಕಿನಡಿ ಈ ವಿಷಯವಾಗಿ ತಾವು ಪಡೆದುಕೊಂಡಿರುವ ನಾನಾ ದಾಖಲೆ ಮತ್ತು ಅವುಗಳ ವಿವರ ನೀಡಿದರು.

ಸುಲ್ತಾನಪುರ ಗ್ರಾಮದ ರಿ.ಸ.ನಂ. 82/2ರ ಈ ಜಮೀನು ಅಕ್ರಮ-ಸಕ್ರಮದಲ್ಲಿ ದುಂಡಪ್ಪ ದುರ್ಗಪ್ಪ ಮುರಗೋಡ ಎನ್ನುವವರಿಗೆ ಮಂಜೂರಾಗಿದೆ. ಆದರೆ ಅಕ್ರಮ-ಸಕ್ರಮದಲ್ಲಿ ಗಾಯರಾಣ ಜಮೀನು ಮಂಜೂರು ಮಾಡಲು ಬರುವುದಿಲ್ಲವೆಂದು ತಿಳಿಸಲಾಗಿದೆ. ಮಾಜಿ ಪ್ರಧಾನಿ ಎಚ್‌.ಡಿ. ದೇವೇಗೌಡರ ಕುಟುಂಬದ ಸಂಬಂಧಿ ಎಂದು ಹೇಳಿಕೊಳ್ಳುವ ಕೆ.ಎನ್‌. ರಾಜಶೇಖರ, 'ಡಿ' ದರ್ಜೆ ನೌಕರರಾಗಿ ಸಚಿವಾಲಯದಲ್ಲಿ ಸೇರಿಕೊಂಡಿದ್ದು, ಪದೋನ್ನತಿ ಹೊಂದುತ್ತ ಶಾಖಾಧಿಕಾರಿಯಾಗಿದ್ದರು. ನಂತರ ತಮ್ಮ ರಾಜಕೀಯ ಪ್ರಭಾವ ಬಳಸಿ ರಾಯಬಾಗಕ್ಕೆ ತಹಸೀಲ್ದಾರರಾಗಿ ನೇಮಕಗೊಂಡಿದ್ದರು ಎಂದು ಗಡಾದ ಹೇಳಿದರು.

ಪದೋನ್ನತಿ ಹೊಂದಿದ 'ಡಿ' ದರ್ಜೆ ನೌಕರರೊಬ್ಬರು ತಹಸೀಲ್ದಾರ ಆಗಿದ್ದು ಹಾಗೂ ಇಷ್ಟೊಂದು ಜಮೀನಿಗೆ ಮಂಜೂರಾತಿ ಆದೇಶ ನೀಡಿರುವುದು ಇಡೀ ಕಂದಾಯ ಇಲಾಖೆ ಬೆಚ್ಚಿ ಬೀಳುವಂತೆ ಮಾಡಿದೆ. ಅಕ್ರಮ-ಸಕ್ರಮ ಯೋಜನೆಯಲ್ಲೂ ಎರಡು ಎಕರೆಗಿಂತ ಹೆಚ್ಚಿಗೆ ಜಮೀನು ಮಂಜೂರು ಮಾಡಲು ಬರುವುದಿಲ್ಲ. ಆದರೆ ಇಲ್ಲಿ ಎಲ್ಲ ನಿಯಮಗಳನ್ನೂ ಗಾಳಿಗೆ ತೂರಲಾಗಿದೆ ಎಂದು ದೂರಿದರು. ಈ ಸಂಬಂಧ, ಚಿಕ್ಕೋಡಿ ಉಪವಿಭಾಗಾಧಿಕಾರಿಗಳು ತನಿಖೆ ನಡೆಸುತ್ತಿದ್ದಾರೆ ಎಂದು ತಿಳಿಸಿದರು.

ಚನ್ನಪ್ಪ ಅಥಣಿ, ಈರಣ್ಣ ಕೊಣ್ಣೂರ, ವಿಲೀನ ತಾರಿಹಾಳ, ಮಲ್ಲಪ್ಪ ತೆರದಾಳ ಹಾಗೂ ಇತರರು ಸುದ್ದಿಗೋಷ್ಠಿಯಲ್ಲಿ ಉಪಸ್ಥಿತರಿದ್ದರು.