ಬಾಲಕಿ ಸಾವು: ಡೆಂಗೆ ಶಂಕೆ

ಚಿಕ್ಕೋಡಿ: ಪಟ್ಟಣದಲ್ಲಿ ತೀವ್ರ ಜ್ವರದಿಂದ ಬಳಲುತ್ತಿದ್ದ 12 ವರ್ಷದ ಬಾಲಕಿ ಚಿಕಿತ್ಸೆ ಫಲಿಸದೆ ಮೃತಪಟ್ಟಿದ್ದಾಳೆ. ಮಾತಂಗ ಕೇರಿಯ ಭೂಮಿಕಾ ರಾಜು ಕಾಂಬಳೆ ಮೃತ ಬಾಲಕಿ. ಜ್ವರ ಕಾಣಿಸಿಕೊಂಡಾಗ ಪಟ್ಟಣದ ಆಸ್ಪತ್ರೆಗೆ ದಾಖಲಿಸಿದ್ದ ಪಾಲಕರು ನಂತರ ಜ್ವರದ ತೀವ್ರತೆ ಹೆಚ್ಚಿದಾಗ ಬೆಳಗಾವಿಯ ಖಾಸಗಿ ಆಸ್ಪತ್ರೆಗೆ ದಾಖಲಿಸಿದ್ದರು. ಆದರೂ ಚಿಕಿತ್ಸೆ ಫಲಕಾರಿಯಾಗದೆ ಬುಧವಾರ ಮೃತಪಟ್ಟಿದ್ದಾಳೆ. ''ಭೂಮಿಕಾಳಲ್ಲಿ ಕಾಣಿಸಿಕೊಂಡಿರುವ ಜ್ವರ ಸಂಶಯಾಸ್ಪದ ಡೆಂಗೆ ಎಂದು ದಾಖಲಾಗಿದ್ದು, ಈ ಕುರಿತು ಪರಿಶೀಲನೆ ನಡೆಸಲಾಗುತ್ತಿದೆ'', ಎಂದು ಜಿಲ್ಲಾ ವೈದ್ಯಾಧಿಕಾರಿ ಡಾ.ಅಪ್ಪಾಸಾಹೇಬ ನರಟ್ಟಿ ತಿಳಿಸಿದ್ದಾರೆ.