ಕಾಮನ್‌ವೆಲ್ತ್‌ ಜುಡೋ: ಸೀನಿಯರ್‌ ವಿಭಾಗದಲ್ಲೂ ಗೀತಾಗೆ ಬೆಳ್ಳಿ

ಬೆಳಗಾವಿ : ಕಾಮನವೆಲ್ತ್‌ ಜುಡೋ ಸ್ಪರ್ಧೆಯಲ್ಲಿ ಮತ್ತೊಂದು ಬೆಳ್ಳಿ ಗೆಲ್ಲುವ ಮೂಲಕ ಬೆಳಗಾವಿಯ ಗೀತಾ ದಾನಪ್ಪಗೋಳ ಕಾಮನ್‌ವೆಲ್ತ್‌ನ ಜುಡೋ ಸೀನಿಯರ್‌ ವಿಭಾಗದಲ್ಲಿ ಪ್ರಶಸ್ತಿ ಗೆದ್ದ ಕರ್ನಾಟಕದ ಮೊದಲ ಕ್ರೀಡಾಪಟು ಎನಿಸಿಕೊಂಡಿದ್ದಾರೆ.

ರಾಜಸ್ಥಾನದ ಜೈಪುರದ ಸವಾಯ್‌ ಮಾನಸಿಂಗ್‌ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಕಾಮನ್‌ವೆಲ್ತ್‌ ಕ್ರೀಡಾಕೂಟದಲ್ಲಿ ಶುಕ್ರವಾರ ನಡೆದ ಜ್ಯೂನಿಯರ್‌ ವಿಭಾಗದಲ್ಲಿ ಬೆಳ್ಳಿ ಗೆದ್ದಿದ್ದ ಗೀತಾ ದಾನಪ್ಪಗೋಳ ಶನಿವಾರ ನಡೆದ ಸೀನಿಯರ್‌ ವಿಭಾಗದಲ್ಲೂ ಬೆಳ್ಳಿ ಗೆದ್ದು ರಾಜ್ಯದ ಕೀರ್ತಿ ಹೆಚ್ಚಿಸಿದ್ದಾರೆ.

ಗೋಕಾಕ ತಾಲೂಕಿನ ನಾಗನೂರು ಗ್ರಾಮದ ಗೀತಾ ಕೆಂಚೆಪ್ಪ ದಾನಪ್ಪಗೊಳ ಸೀನಿಯರ್‌ (44 ಕೆಜಿ) ವಿಭಾಗದ ಸೆಮಿಫೈನಲ್‌ನಲ್ಲಿ ಶ್ರೀಲಂಕಾದ ಕ್ರೀಡಾಪಟುವನ್ನು ಮಣಿಸಿ ಫೈನಲ್‌ಗೆ ಏರಿದ್ದರು. ಫೈನಲ್‌ ಪಂದ್ಯದಲ್ಲಿ ಭಾರತ 'ಎ' ತಂಡವನ್ನು ಪ್ರತಿನಿಧಿಸಿದ್ದ ದೆಹಲಿಯ ಟವಿಟಾ ತಾರಿಹಾಳ ಅವರೊಂದಿಗೆ ನಡೆದ ಸ್ಪರ್ಧೆಯಲ್ಲಿ ಸೋಲು ಕಂಡರೂ ಬೆಳ್ಳಿ ಗೆದ್ದ ಕರ್ನಾಟಕದ ಮೊದಲ ಜುಡೋ ಕ್ರೀಡಾಪಟು ಎನ್ನುವ ದಾಖಲೆ ಬರೆದಿದ್ದಾರೆ.

ಗೀತಾ ದಾನಪ್ಪಗೋಳ ಅವರಿಗೆ ಜುಡೋ ಕೋಚ್‌ ತ್ರೀವೇಣಿ ಎಂ.ಎನ್‌ ತರಬೇತಿ ನೀಡಿದ್ದಾರೆ.