ಕ್ರೂಸರ್‌ಧ- ಲಾರಿ ಡಿಕ್ಕಿ: ಬಾಲಕಿ ಸಾವು, 9 ಜನರಿಗೆ ಗಾಯ

ಇಚಲಕರಂಜಿ : ಸಮೀಪದ ಹಾತಕಣಂಗಲೆ- ವಡಗಾವ ರಸ್ತೆಯಲ್ಲಿ ಭಾನುವಾರ ಬೆಳಗ್ಗೆ ಲಾರಿ ಹಾಗೂ ಕ್ರೂಸರ್‌ ನಡುವೆ ಸಂಭವಿಸಿದ ಡಿಕ್ಕಿಯಲ್ಲಿ ಎರಡು ವರ್ಷದ ಬಾಲಕಿಯೊಬ್ಬಳು ಮೃತಪಟ್ಟಿದ್ದು, ಒಂಬತ್ತು ಜನರು ತೀವ್ರ ಗಾಯಗೊಂಡಿದ್ದಾರೆ. ಗಾಯಾಳುಗಳ ಪೈಕಿ ನಾಲ್ವರ ಸ್ಥಿತಿ ಚಿಂತಾಜನಕವಾಗಿದೆ.

ಜಮಖಂಡಿ ತಾಲೂಕಿನ ಸಾವಳಗಿ ಗ್ರಾಮದ ಬಾಲಕಿ ಶಿವಾಲಿ ಸಿದ್ದಪ್ಪ ಕುಂಬಾರ (2) ಮೃತ ಬಾಲಕಿ. ಇದೇ ಗ್ರಾಮದ ನಿಲಿಮಾ ಬಸವರಾಜ ಕುಂಬಾರ (25), ಬಸವರಾಜ ಅಶೋಕ ಕುಂಬಾರ (30), ಕಾವೇರಿ ಸಿದ್ದಪ್ಪ ಕುಂಬಾರ (25), ರಾಧಿಕಾ ಭೈರಪ್ಪ ಕುಂಬಾರ(28), ಭೈರಪ್ಪ ಕುಂಬಾರ (32), ರಿತೇಶ ಸಿದ್ದಪ್ಪ ಕುಂಬಾರ (9), ನಿರ್ಮಲಾ ಸುರೇಶ ಕುಂಬಾರ (34), ಪ್ರೇಮಲತಾ ದುರ್ಗಪ್ಪ ಕುಂಬಾರ (40) ಹಾಗೂ ಹಾಜಿಸಾಬ ಮುಲ್ಲಾ (57) ಗಾಯಗೊಂಡವರು.

ಸಾವಳಗಿಯ ಕುಂಬಾರ ಕುಟುಂಬದ ಸದಸ್ಯರು ನವ ದಂಪತಿಯೊಂದಿಗೆ ಶ್ರೀಕ್ಷೇತ್ರ ಜ್ಯೋತಿಬಾ ದೇವರ ದರ್ಶನಕ್ಕಾಗಿ ಕ್ರೂಜರ್‌ ವಾಹನದಲ್ಲಿ ಪ್ರಯಾಣಿಸುತ್ತಿದ್ದಾಗ ಈ ಘಟನೆ ಸಂಭವಿಸಿದೆ. ಇಚಲಕರಂಜಿ ಕುಂಭೋಜ ಸರ್ಕಲ್‌ ಬಳಿ ಡಿಕ್ಕಿ ಸಂಭವಿಸಿದ್ದು ಕ್ರೂಜರ್‌ ವಾಹನ ಸಂಪೂರ್ಣ ನಜ್ಜು ಗುಜ್ಜಾಗಿದೆ. ಅಪಘಾತ ಸಂಭವಿಸುತ್ತಲೇ ಲಾರಿ ಚಾಲಕ ಸ್ಥಳದಿಂದ ಪರಾರಿಯಾಗಿದ್ದಾನೆ. ಡಿಕ್ಕಿಯ ರಭಸಕ್ಕೆ ಲಾರಿ ಪಲ್ಟಿಯಾಗಿದೆ. ಕ್ರೂಜರ್‌ ಚಾಲಕ ನಿದ್ದೆಯ ಮಂಪರಿನಲ್ಲಿದ್ದ ಕಾರಣ ಅಪಘಾತ ಸಂಭವಿಸಿದೆ ಎಂದು ಹಾತಕಣಂಗಲೆ ಠಾಣೆ ಪೊಲೀಸರು ತಿಳಿಸಿದ್ದಾರೆ.