ಬಾಲಕ ಸಾವು, ಡೆಂಗೆ ಶಂಕೆ

ನಿಪ್ಪಾಣಿ: ಇಲ್ಲಿನ ಚಿಮಗಾಂವಕರ ಗಲ್ಲಿಯ 11 ವರ್ಷದ ಬಾಲಕ ಆಸೀಮ ಮೊಹಸೀನ ಬಾಗವಾನ ಸೋಮವಾರ ಶಂಕಿತ ಡೆಂಗೆ ಜ್ವರದಿಂದ ಬಳಲಿ ಸಾವಿಗೀಡಾಗಿದ್ದಾನೆ. ಈ ಘಟನೆಯಿಂದ ಸ್ಥಳೀಯರಲ್ಲಿಭೀತಿಯ ವಾತಾವರಣ ಸೃಷ್ಟಿಯಾಗಿದೆ.

ಕಳೆದ ಗುರುವಾರವೇ ಬಾಲಕನಿಗೆ ಜ್ವರ ಕಂಡುಬಂದಿದ್ದು, ಖಾಸಗಿ ಆಸ್ಪತ್ರೆಯಲ್ಲಿಚಿಕಿತ್ಸೆ ನಡೆದಿತ್ತು. ಆದರೆ ವೈದ್ಯರು ಬಾಲಕನನ್ನು ಕೊಲ್ಲಾಪುರಕ್ಕೆ ಸ್ಥಳಾಂತರಿಸಲು ಸೂಚಿಸಿದ್ದರಿಂದ ಆತನನ್ನು ಕೊಲ್ಲಾಪುರದ ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಆದರೆ ಚಿಕಿತ್ಸೆ ಫಲಿಸದೆ ಬಾಲಕ ಸೋಮವಾರ ಬೆಳಗ್ಗೆ ಮೃತಪಟ್ಟಿದ್ದಾನೆ.

ಈ ಕುರಿತು ತಾಲೂಕು ವೈದ್ಯಾಧಿಕಾರಿ ಡಾ. ವಿ.ವಿ. ಶಿಂಧೆ ಅವರನ್ನು ಸಂಪರ್ಕಿಸಿದಾಗ ''ಬಾಲಕನ ಸಾವಿನ ಕುರಿತು ಯಾವುದೇ ನಿಖರ ವರದಿ ಸಿಕ್ಕಿಲ್ಲ. ಕೊಲ್ಲಾಪುರದ ಖಾಸಗಿ ಆಸ್ಪತ್ರೆಯ ವರದಿ ಪರಿಶೀಲನೆ ನಂತರವೇ ಸಾವಿನ ಕುರಿತು ಪತ್ತೆಯಾಗಲಿದೆ. ಮಂಗಳವಾರ ಆರೋಗ್ಯ ಇಲಾಖೆಯ ಅಧಿಕಾರಿಗಳು ಕೊಲ್ಲಾಪುರಕ್ಕೆ ತೆರಳಿ ಪರಿಶೀಲನೆ ನಡೆಸಲಿದ್ದಾರೆ'', ಎಂದು ತಿಳಿಸಿದರು.

ಇಡಿ ನಗರದ ಕೊಳಕು, ತ್ಯಾಜ್ಯ ವಸ್ತುಗಳು, ಚರಂಡಿ ನೀರು ಬಾಗವಾನ ಹಳ್ಳದಲ್ಲಿಹರಿಯುತ್ತದೆ. ಎರಡೂವರೆ ವರ್ಷದಿಂದ ಬಾಗವಾನ ಹಳ್ಳ ಮತ್ತು ಪರಿಸರವನ್ನು ಸ್ವಚ್ಛಗೊಳಿಸದ ಪರಿಣಾಮ ಬಾಲಕ ಶಂಕಿತ ಡೆಂಗೆಗೆ ಬಲಿಯಾಗಿದ್ದಾನೆ.
- ಜುಬೇರ ಬಾಗವಾನ. ನಗರಸಭೆ ಮಾಜಿ ಸದಸ್ಯ