ಪಾಲಿಕೆ ಆದಾಯ ಹೆಚ್ಚಳಕ್ಕೆ ಕ್ರಮ ಕೈಗೊಳ್ಳುವಂತೆ ಆಗ್ರಹ

ಬೆಳಗಾವಿ : ಖರ್ಚು ಕಡಿಮೆ ಮಾಡಿ ಆದಾಯ ಹೆಚ್ಚಿಗೆ ಸಂಗ್ರಹವಾಗುವಂತೆ ಕಠಿಣ ಕ್ರಮಗಳನ್ನು ಕೈಗೊಳ್ಳಬೇಕೆಂದು ಪಾಲಿಕೆಯ ಹಿರಿಯ ಸದಸ್ಯರು ನೂತನ ಆಯುಕ್ತ ಇಬ್ರಾಹಿಮ್‌ ಮೈಗೂರ ಅವರಿಗೆ ಸಲಹೆ ಮಾಡಿದ್ದಾರೆ.

ಆಯುಕ್ತರ ಕಚೇರಿಯಲ್ಲಿ ಗುರುವಾರ ಔಪಚಾರಿಕ ಸಭೆ ನಡೆಸಿದ ಸದಸ್ಯರು ಕಂದಾಯ ವಿಭಾಗದವರು ಆಸ್ತಿ ತೆರಿಗೆ ಮತ್ತು ಬಾಕಿ ವಸೂಲಿ ಮಾಡುವಲ್ಲಿ ಕಾಳಜಿ ತೋರುತ್ತಿಲ್ಲ. ಹೀಗಾಗಿ ಅಭಿವೃದ್ಧಿ ಕೆಲಸಗಳಿಗೂ ತೊಂದರೆಯಾಗುತ್ತಿದೆ. ಬರೀ ಖರ್ಚು ಹೆಚ್ಚಾದರೆ ಸಂಪನ್ಮೂಲ ಹೊಂದಿಸುವುದು ಕಷ್ಟವಾಗುತ್ತದೆ. ಕಾರಣ ಈ ಬಗ್ಗೆ ಗಮನಹರಿಸಬೇಕು ಮತ್ತು ಪ್ರಸಕ್ತ ಬಜೆಟ್‌ನಿಂದಲೇ ಇದು ಅನುಷ್ಠಾನಕ್ಕೆ ಬರಬೇಕು ಎಂದು ತಿಳಿಸಿದು. ಆಯುಕ್ತರು ಸೂಕ್ತ ಕ್ರಮ ಜರುಗಿಸುವ ಭರವಸೆ ನೀಡಿದರು.

ಮಾಜಿ ಮಹಾಪೌರರಾದ ಕಿರಣ ಸಾಯಿನಾಕ, ಸರಿತಾ ಪಾಟೀಲ, ಹಿರಿಯ ಸದಸ್ಯ ರಮೇಶ ಸೊಂಟಕ್ಕಿ, ಅಜ್ಜಪ್ಪ ಬಡಿಗೇರ, ಅನುಶ್ರೀ ದೇಶಪಾಂಡೆ, ಮಾಯಾ ಕಡಲೋಲ್ಕರ್‌ ಹಾಗೂ ಉಪಆಯುಕ್ತ ಕಂದಾಯ ಬಿ.ಐ. ಜಗದೀಶ್‌, ಮುಖ್ಯಲೆಕ್ಕಾಧಿಕಾರಿ ರಾಮಪ್ಪ ಹಟ್ಟಿ ಹಾಗೂ ಇತರರು ಉಪಸ್ಥಿತರಿದ್ದರು.