ಎಂ.ಕೆ.ಹುಬ್ಬಳ್ಳಿ - ಬೈಲಹೊಂಗಲ ರಸ್ತೆ ದುರಸ್ತಿಗೆ ಆಗ್ರಹ

ಎಂ.ಕೆ.ಹುಬ್ಬಳ್ಳಿ : ಕಳೆದ ವಾರ ಎಡೆಬಿಡದೆ ಸುರಿದ ಮಳೆಯಿಂದ ಪಟ್ಟಣ ಹಾಗೂ ಸುತ್ತಮುತ್ತಲಿನ ಪ್ರದೇಶದ ಅನೇಕ ರಸ್ತೆಗಳು ಹಾಳಾಗಿದ್ದು ಇವುಗಳನ್ನು ಶೀಘ್ರ ದುರಸ್ತಿ ಮಾಡಬೇಕೆಂದು ಸಾರ್ವಜನಿಕರು ಆಗ್ರಹಿಸಿದ್ದಾರೆ.

ಪಟ್ಟಣದಿಂದ ಬೈಲಹೊಂಗಲ, ಕಾದರವಳ್ಳಿ ಕ್ರಾಸ್‌ದಿಂದ ತುರಮರಿ, ಗಿರಿಯಾಲದಿಂದ ಬೆಣಚನಮರಡಿ, ಚಿಕ್ಕಬಾಗೇವಾಡಿಯಿಂದ ಇಲ್ಲಿಗೆ ಬರುವ ಅನೇಕ ರಸ್ತೆಗಳಲ್ಲಿ ತಗ್ಗುಗಳು ನಿರ್ಮಾಣವಾಗಿದ್ದು ಸಂಚಾರಕ್ಕೆ ತೊಂದರೆಯಾಗುತ್ತಿದೆ. ಕೆಲವು ದಿನಗಳ ಹಿಂದೆಯಷ್ಟೆ ರಸ್ತೆ ಕಾಮಗಾರಿ ಮಾಡಿದ ಅನೇಕ ರಸ್ತೆಗಳು ಸಹ ಹಾಳಾಗಿವೆ. ವಾಹನ ಸವಾರರು ವೇಗವಾಗಿ ಬಂದರೆ ಅನಾಹುತ ಗ್ಯಾರಂಟಿ. ಅವಘಡಗಳು ಸಂಭವಿಸುವ ಮೊದಲೇ ಅಧಿಕಾರಿಗಳು ಹಾಗೂ ಜನಪ್ರತಿನಿಧಿಗಳು ರಸ್ತೆ ದುರಸ್ತಿಗೆ ಕ್ರಮ ಕೈಗೊಳ್ಳಬೇಕು ಎಂದು ಸುತ್ತಮುತ್ತಲಿನ ಗ್ರಾಮಸ್ಥರು ಒತ್ತಾಯಿಸಿದ್ದಾರೆ.