ಹಣಕ್ಕಾಗಿ ಬೇಡಿಕೆ: ಮತ್ತೊಬ್ಬನ ಬಂಧನ

ಬೆಳಗಾವಿ: ಭ್ರಷ್ಟಾಚಾರ ನಿಗ್ರಹ ದಳ (ಎಸಿಬಿ) ಅಧಿಕಾರಿ ಹಾಗೂ ಪತ್ರಕರ್ತರೆಂದು ಹೇಳಿ ಸರಕಾರಿ ಅಧಿಕಾರಿಗೆ ಹಣಕ್ಕಾಗಿ ಬೇಡಿಕೆ ಇಟ್ಟಿದ್ದ ಪ್ರಕರಣಕ್ಕೆ ಸಂಬಂಧಿಸಿದಂತೆ ತಲೆಮರಿಸಿಕೊಂಡಿದ್ದ ಮತ್ತೊಬ್ಬ ಆರೋಪಿಯನ್ನು ಪೊಲೀಸರು ಬುಧವಾರ ಬಂಧಿಸಿದ್ದಾರೆ.

ಇಲ್ಲಿನ ವೀರಭದ್ರ ನಗರದ ಜಾಕೀರ ಹುಸೇನ್‌ ಮನಿಯಾರ್‌ (45) ಬಂಧಿತ ವ್ಯಕ್ತಿ. ಅ.19 ರಂದು ನಗರದ ಪ್ರಾದೇಶಿಕ ಸಾರಿಗೆ ಅಧೀಕ್ಷಕ ಶರಣಪ್ಪ ಹುಗ್ಗಿ ಅವರಿಗೆ ಕರೆ ಮಾಡಿ, ನಿಮ್ಮ ವಿರುದ್ಧ ಭ್ರಷ್ಟಾಚಾರದ ದೂರು ಬಂದಿದೆ. ಅದನ್ನು ಪ್ರಕರಣ ದಾಖಲಿಸದೆ ಬಗೆಹರಿಸಲು ಹಣ ನೀಡಬೇಕು. ಇಲ್ಲಿದಿದ್ದರೆ ಪ್ರಕರಣ ದಾಖಲಿಸಿ ಮಾಧ್ಯಮದಲ್ಲಿಪ್ರಸಾರ ಮಾಡಲಾಗುವುದು ಎಂದು ಬೆದರಿಕೆ ಹಾಕಿದ್ದ ಆರೋಪದಲ್ಲಿಇಬ್ಬರ ಮೇಲೆ ನಗರದ ಮಾರ್ಕೆಟ್‌ ಪೊಲೀಸ್‌ ಠಾಣೆಯಲ್ಲಿಪ್ರಕರಣ ದಾಖಲಾಗಿತ್ತು. ಇದಕ್ಕೆ ಸಂಬಂಧಿಸಿದಂತೆ ಪೊಲೀಸರು ಟಿಳಕವಾಡಿಯ ಶಾಂತಿ ನಗರದ ನಿವಾಸಿ ಅತುಲ್‌ ವಿಶ್ವಾಸ ಕದಂ (36) ಎಂಬಾತನನ್ನು ಬಂಧಿಸಿದ್ದರು. ಈ ವೇಳೆ ತಲೆಮರಿಸಿಕೊಂಡಿದ್ದ ಜಾಕೀರ ಮನಿಯಾರ್‌ನನ್ನು ಪೊಲೀಸರು ಬುಧವಾರ ಬಂಧಿಸಿ, ವಿಚಾರಣೆ ನಡೆಸಿದ್ದಾರೆ.