ಮೀಸಲಾತಿ ಪ್ರಮಾಣ ಹೆಚ್ಚಳಕ್ಕೆ ಆಗ್ರಹ

ರಾಮದುರ್ಗ: ಪರಿಶಿಷ್ಟ ಪಂಗಡಕ್ಕೆ ಶೈಕ್ಷಣಿಕ, ಔದ್ಯೋಗಿಕ ಹಾಗೂ ಸರಕಾರಿ ಸೌಲಭ್ಯಗಳನ್ನು ನೀಡುವಲ್ಲಿಯೂ ರಾಜ್ಯ ಸರಕಾರ ಶೇ. 7.5ರಷ್ಟು ಮೀಸಲಾತಿ ಸೌಲಭ್ಯ ಕಲ್ಪಿಸಬೇಕೆಂದು ಒತ್ತಾಯಿಸಿ ರಾಜ್ಯ ಪರಿಶಿಷ್ಟ ಪಂಗಡ ನೌಕರರ ಸಂಘದ ತಾಲೂಕು ಘಟಕ ಹಾಗೂ ವಾಲ್ಮೀಕಿ ನಾಯಕ ಸಮಾಜ ಮತ್ತು ವಾಲ್ಮೀಕಿ ಯುವ ಪಡೆಯ ಪದಾಧಿಕಾರಿಗಳು ಗುರುವಾರ ತಹಸೀಲ್ದಾರರ ಮೂಲಕ ರಾಜ್ಯ ಸರಕಾರಕ್ಕೆ ಮನವಿ ಸಲ್ಲಿಸಿದರು.

ಇಂಡಿಯನ್‌ ಕಾನ್‌ಸ್ಟಿಟ್ಯೂಷನ್‌ ಆರ್ಟಿಕಲ್‌ 340, 341, ಮತ್ತು 342, 1949 ರ ಪ್ರಕಾರ ಜಾತಿ ಹಾಗೂ ಜನಸಂಖ್ಯೆಗೆ ಅನುಗುಣವಾಗಿ ಮೀಸಲಾತಿ ನೀಡುವುದು ಸಾಮಾಜಿಕ ನ್ಯಾಯ ಒದಗಿಸಿದಂತೆ. ಕಾರಣ ಕರ್ನಾಟಕ ರಾಜ್ಯದಲ್ಲಿ ಕೇಂದ್ರ ಸರಕಾರ ನೀಡುತ್ತಿರುವ ಸೌಲಭ್ಯಗಳ ಮಾದರಿಯಲ್ಲಿ ಶೇಕಡಾವಾರು ಮೀಸಲಾತಿ ಸೌಲಭ್ಯ ಒದಗಿಸಿ ಪರಿಶಿಷ್ಟ ಪಂಗಡದ ಜನತೆಯ ಹಿತ ಕಾಯುವಲ್ಲಿ ಮುಂದಾಗಬೇಕೆಂದು ಅವರು ಮನವಿ ಮೂಲಕ ಸರಕಾರವನ್ನು ಒತ್ತಾಯಿಸಿದ್ದಾರೆ.

ಪರಿಶಿಷ್ಟ ಪಂಗಡ ನೌಕರರ ಸಂಘದ ತಾಲೂಕಾಧ್ಯಕ್ಷ ಅಶೋಕ ಬಿ. ಏಣಿ, ಕಾರ್ಯದರ್ಶಿ ಪಿ.ಡಿ. ಕಾಲವಾಡ, ವಾಲ್ಮೀಕಿ ಸಮಾಜದ ತಾಲೂಕು ಘಟಕದ ಅಧ್ಯಕ್ಷ ವೆಂಕನಗೌಡ ಪಾಟೀಲ, ಕಾರ್ಯದರ್ಶಿ ಗೋವಿಂದಪ್ಪ ಆರ್‌. ಮಡ್ಡಿ, ವಾಲ್ಮೀಕಿ ಯುವ ಪಡೆಯ ಅಧ್ಯಕ್ಷ ರಂಗಪ್ಪ ತಳವಾರ, ಕಾರ್ಯದರ್ಶಿ ಜಯರಾಂ ಕೋಣಿ, ಈರಣ್ಣ ಕನಕನ್ನವರ, ಮಾರುತಿ ಕುರಿ, ಅಶೋಕ ನಾಯಕರ, ಶಂಕರ ಚಿಪ್ಪಲಕಟ್ಟಿ, ಬೆನ್ನಪ್ಪ ಕೇಳನೇರಿ ಸೇರಿದಂತೆ ಇತರರಿದ್ದರು.