ರಂಗಾಯಣಗಳ ನಿರ್ದೇಶಕರ ವಜಾ ಆದೇಶ ಹಿಂಪಡೆಯಲು ಆಗ್ರಹ

ಬೆಳಗಾವಿ: ರಾಜ್ಯ ಸರಕಾರ ರಂಗಾಯಣಗಳ ನಿರ್ದೇಶಕರುಗಳನ್ನು ವಜಾಗೊಳಿಸಿರುವುದು ನ್ಯಾಯ ಸಮ್ಮತವಾಗಿಲ್ಲ. ಈ ಹಿನ್ನೆಲೆಯಲ್ಲಿಮುಖ್ಯಮಂತ್ರಿಗಳು ಮಧ್ಯಪ್ರವೇಶ ಮಾಡಿ ವಜಾ ಆದೇಶ ಹಿಂಪಡೆಯಬೇಕೆಂದು ರಂಗಕರ್ಮಿ ಡಾ. ಡಿ.ಎಸ್‌. ಚೌಗಲೆ ಆಗ್ರಹಿಸಿದ್ದಾರೆ.

ಈ ಕುರಿತು ಪ್ರಕಟಣೆ ನೀಡಿರುವ ಅವರು, ರಂಗಾಯಣ ಸ್ವಾಯತ್ತ ಸಂಸ್ಥೆ. ಅದಕ್ಕೆ ಅದರದೇ ಆದ ಬೈಲಾ ಇದೆ. ಸರಕಾರ ರಂಗ ಸಮಾಜದ ಸದಸ್ಯರು, ನಿರ್ದೇಶಕರನ್ನು ನೇಮಿಸುವಾಗ ಅವರ ಪ್ರತಿಭೆಯನ್ನು ಪರಿಗಣನೆಗೆ ತಗೆದುಕೊಳ್ಳುತ್ತದೆ. ಇಂಥವರು ಯಾವುದೇ ರಾಜಕೀಯ ಪಕ್ಷಕ್ಕೆ ಸಂಬಂಧಿಸಿರುವುದಿಲ್ಲ. ಕೇವಲ ಸಾಂಸ್ಕೃತಿಕ ರಾಯಭಾರಿಯಾಗಿರುತ್ತಾರೆ. ಜನರ ದನಿಯಾಗಿ ರಂಗಾಭಿವ್ಯಕ್ತಿ ಮಾಡುತ್ತಾರೆ. ಇಂಥವರನ್ನು ಏಕಾಏಕಿಯಾಗಿ ವಜಾಗೊಳಿಸಿರುವುದು ಕೆಟ್ಟ ಸಂಪ್ರದಾಯಕ್ಕೆ ನಾಂದಿ ಹಾಡಿದಂತಾಗಿದೆ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.