ಮನೆಗಳಿಗೆ ನುಗ್ಗುತ್ತಿರುವ ಒಳಚರಂಡಿ ನೀರು

ಬೈಲಹೊಂಗಲ: ಪಟ್ಟಣದ ಪುರಸಭೆ ವಾರ್ಡ್‌ ನಂ. 17ರ ದೇಶನೂರ ಚಾಳದಲ್ಲಿ ಒಳಚರಂಡಿ ನೀರು ರಸ್ತೆ ಮೇಲೆ ಹರಿದು ನಿವಾಸಿಗಳ ಮನೆಗಳಿಗೆ ನುಗ್ಗುತ್ತಿರುವುದನ್ನು ಕೂಡಲೇ ತಪ್ಪಿಸಬೇಕೆಂದು ಈ ಓಣಿಯ ನಿವಾಸಿಗಳು ಪುರಸಭೆ ಮುಖ್ಯಾಧಿಕಾರಿಗಳನ್ನು ಒತ್ತಾಯಿಸಿದ್ದಾರೆ.

ಮನೆಗಳಿಗೆ ನುಗ್ಗುತ್ತಿರುವ ಒಳಚರಂಡಿ ನೀರು ಕಂಡು ಕಾಣದಂತಿರುವ ಸದಸ್ಯ, ಅಧಿಕಾರಿಗಳ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಎರಡು ವರ್ಷಗಳಿಂದ ಒಳಚರಂಡಿ ನೀರು 5ರಿಂದ 6 ಮನೆಗಳ ಅಡುಗೆ ಮನೆಗಳಿಗೆ ನೀರು ನುಗ್ಗುತ್ತಿದೆ. ಈ ಕುರಿತು ಸ್ಥಳೀಯ ಜನಪ್ರತಿನಿಧಿಗಳಿಗೆ ದೂರು ನೀಡಿದರೂ ಯಾವುದೇ ಪ್ರಯೋಜನವಾಗಿಲ್ಲ. ಪುರಸಭೆ ಸಿಬ್ಬಂದಿ ಇತ್ತ ಗಮನ ಹರಿಸಿಲ್ಲ ಎಂದು ತಿಳಿಸಿದರು.

''ಪುರಸಭೆಯವರು ಅವೈಜ್ಞಾನಿಕವಾಗಿ ಒಳಚರಂಡಿ ನಿರ್ಮಿಸಿ ಪೈಪ್‌ಲೈನ್‌ ಅಳವಡಿಸಿದ್ದಾರೆ. ಇದರಿಂದ ಪದೇ ಪದೆ ನೀರು ಬ್ಲಾಕ್‌ ಆಗಿ ದುರ್ನಾತ ಸೂಸುತ್ತಿದೆ. ತ್ಯಾಜ್ಯ ನೀರು ರೋಗ ರುಜಿನುಗಳಿಗೆ ದಾರಿ ಮಾಡಿಕೊಟ್ಟಿದೆ,'' ಎಂದು ವಾರ್ಡ್‌ ನಿವಾಸಿ ಮುನ್ನಾಭಾಯಿ ಜಾಡವಾಲೆ ಆಕ್ರೋಶ ವ್ಯಕ್ತಪಡಿಸುತ್ತಾರೆ. ಒಳಚರಂಡಿ ನೀರು ರಸ್ತೆಗಳ ಮೇಲೆ ಹರಿದಾಗ ಅದರೊಂದಿಗೆ ಕಸದ ರಾಶಿಯೂ ಚೆಲ್ಲಾಪಿಲ್ಲಿಯಾಗಿ ರಸ್ತೆ ಮೇಲೆ ಹರಡುತ್ತಿದೆ. ಇದರಿಂದ ಕಲುಷಿತ ವಾತಾವಣ ಸೃಷ್ಟಿಯಾಗಿದೆ. ಮೇಲಾಧಿಕಾರಿಗಳು ಕೂಡಲೇ ಗಮನ ಹರಿಸಿ ದೇಶನೂರ ಚಾಳ ನಿವಾಸಿಗಳಿಗೆ ಆಗುತ್ತಿರುವ ತೊಂದರೆ ನಿವಾರಿಸಬೇಕು ಎಂದು ಆಗ್ರಹಿಸಿದ್ದಾರೆ.