ಗೋವಾದಲ್ಲಿ ಕುಡಿವ ನೀರಿಗೆ ಪರದಾಟ

ಪಣಜಿ : ವಾರದ ಹಿಂದೆ ಪೋಂಡಾ ತಾಲೂಕಿನ ಖಾಂಡೆಪಾರ್‌ನಲ್ಲಿ ಗುಡ್ಡ ಕುಸಿತದಿಂದ ಕುಡಿಯುವ ನೀರು ಪೂರೈಸುವ ಮುಖ್ಯ ಪೈಪ್‌ಲೈನ್‌ ಕೊಚ್ಚಿಹೋಗಿದ್ದು ಗೋವಾ ರಾಜಧಾನಿ ಪಣಜಿ ಸೇರಿದಂತೆ ವಿವಿಧ ಕಡೆ ನೀರು ಪೂರೈಕೆ ಸ್ಥಗಿತವಾಗಿದೆ. ಕಳೆದ ಕೆಲ ದಿನಗಳಿಂದ ಪೈಪ್‌ಲೈನ್‌ ದುರಸ್ತಿ ಕಾರ‍್ಯ ಕೈಗೊಂಡಿದ್ದರೂ ಇನ್ನೂ ಪೂರ್ತಿಗೊಂಡಿಲ್ಲ. ಇದರಿಂದ ಕುಡಿಯುವ ನೀರಿನ ಅಭಾವ ಎದುರಾಗಿದೆ.

ಹಲವು ಕಡೆ ಟ್ಯಾಂಕರ್‌ಗಳ ಮೂಲಕ ಕುಡಿಯುವ ನೀರು ಪೂರೈಕೆ ಮಾಡಲಾಗುತ್ತಿದೆಯಾದರೂ ಬೇಡಿಕೆ ಪೂರೆಸಲಾಗುತ್ತಿಲ್ಲ. ಖಾಸಗಿ ಟ್ಯಾಂಕರ್‌ ಮಾಲೀಕರು ಒಂದು ಟ್ಯಾಂಕರ್‌ ನೀರಿಗೆ 1500 ರೂ.ನಿಂದ 2,000 ರೂ. ಹಣ ಪಡೆಯುತ್ತಿದ್ದಾರೆ. ವಾರ್ಡ್‌ಗಳಿಗೆ ಟ್ಯಾಂಕರ್‌ ಬಂದರೆ ನೀರಿಗಾಗಿ ನೂಕುನುಗ್ಗಲು ಉಂಟಾಗುತ್ತಿದೆ.ಪಣಜಿ ನಗರ ಸೇರಿದಂತೆ ಅಲ್ತಿನೊ, ಸಾಂತಕ್ರೂಜ್‌, ಬಾಂಬೋಲಿಂ, ರಾಯಬಂದರ್‌, ಓಲ್ಡ್‌ ಗೋವಾ, ಮೆರಶಿ, ಮಾರ್ಶೆಲ್‌, ಕುಂಬಾರ ಜುವಾ ಸೇರಿದಂತೆ ಹಲವು ಕಡೆ ಕುಡಿಯುವ ನೀರಿನ ಪೂರೈಕೆ ಸ್ಥಗಿತಗೊಂಡಿದೆ.

ಆಸ್ಪತ್ರೆಯಲ್ಲೂ ಹಾಹಾಕಾರ
ಬಾಂಬೋಲಿಂನಲ್ಲಿರುವ ಗೋವಾ ವೈದ್ಯಕೀಯ ಆಸ್ಪತ್ರೆಗೆ ನೀರಿನ ಪೂರೈಕೆ ಇಲ್ಲದೇ ರೋಗಿಗಳು ಪರದಾಡುವಂತಾಗಿದೆ. ಕಳೆದ ಎರಡು ದಿನಗಳಿಂದ ಮಳೆ ಇಲ್ಲದ ಕಾರಣ ಮಳೆಯ ನೀರನ್ನೂ ಹಿಡಿಯಲು ಆಗುತ್ತಿಲ್ಲ. ಪಣಜಿಯಲ್ಲಿ ನೀರಿನ ಕೊರತೆ ಇರುವುದರಿಂದ ಹಲವರು ತಮ್ಮ ಊರಿಗೆ ತೆರಳಿದ್ದಾರೆ.