ಬೆಳಗಾವಿ: ಬೆಳಗಾವಿ ನಗರ ಸೇರಿ ಹಲವೆಡೆ ಶನಿವಾರ ರಾತ್ರಿ ಲಘು ಭೂಕಂಪ ಸಂಭವಿಸಿದೆ.
ರಾತ್ರಿ 11.47ರ ಸುಮಾರಿಗೆ ಕೆಲ ಸೆಕೆಂಡುಗಳ ಕಾಲ ಜನರಿಗೆ ಕಂಪನದ ಅನುಭವವಾಗಿದೆ. ಮನೆಯಲ್ಲಿನ ಪಾತ್ರೆ ಪಗಡೆಗಳು, ಕುರ್ಚಿ ಅಲುಗಾಡಿದವು ಎಂದು ಹಲವರು ತಮ್ಮ ಅನುಭವ ಹಂಚಿಕೊಂಡಿದ್ದಾರೆ.
ವಿಜಯನಗರ, ಸಹ್ಯಾದ್ರಿನಗರ, ಕುಮಾರಸ್ವಾಮಿ ಬಡಾವಣೆ, ಶಾಹುನಗರ ಸೇರಿದಂತೆ ಹಲವೆಡೆಯ ಜನರಿಗೆ ಕೆಲ ಸೆಕೆಂಡುಗಳ ಕಾಲ ಕಂಪನದ ಅನುಭವವಾಗಿದ್ದು, ನಂತರ ಅದು ಭೂಕಂಪ ಎಂಬುದು ಅರಿವಾಗಿ ಅಚ್ಚರಿಪಟ್ಟರು. ಕೆಲವರು ಪತ್ರಿಕಾ ಕಚೇರಿಗಳಿಗೆ ದೂರವಾಣಿ ಕರೆ ಮಾಡಿ ಖಚಿತಪಡಿಸಿಕೊಂಡರು.
ಬೆಳಗಾವಿಯಲ್ಲಿ ಸಂಭವಿಸಿದ ಭೂಕಂಪದ ಬಗ್ಗೆ ತಡರಾತ್ರಿ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಚರ್ಚೆ ನಡೆಯಿತು. ಹಲವರು ತಮಗಾದ ಅನುಭವವನ್ನು ಸ್ನೇಹಿತರ ಜತೆ ಹಂಚಿಕೊಂಡರು. ಎಲ್ಲರೂ '2-3 ಸೆಕೆಂಡುಗಳಷ್ಟು ಕಾಲ ಕಂಪನದ ಅನುಭವವಾಯಿತು. ಪಾತ್ರೆ, ಕುರ್ಚಿಗಳು ಅಲುಗಾಡಿದವು' ಎನ್ನುತ್ತಾ ನಡೆದ ವಿದ್ಯಮಾನದ ಕುರಿತು ವಿಸ್ಮಯ ವ್ಯಕ್ತಪಡಿಸಿದರು.
ಧಾರವಾಡದಲ್ಲೂ ಕಂಪನ: ಬೆಳಗಾವಿಯಲ್ಲದೆ ಪಕ್ಕದ ಧಾರವಾಡ ಜಿಲ್ಲೆಯಲ್ಲೂ ಭೂ ಕಂಪಿಸಿದ ವರದಿಯಾಗಿದೆ. ಭೂಕಂಪವಾಗುತ್ತಿದ್ದಂತೆಯೇ ಹಲವರು ಮನೆಯಿಂದ ಹೊರಗೋಡಿ ಬಂದರು ಎಂದು ತಿಳಿದುಬಂದಿದೆ. ಕೊಲ್ಲಾಪುರದಲ್ಲೂ ಮೂರ್ನಾಲ್ಕು ಸೆಕೆಂಡುಗಳ ಕಾಲ ಜನರಿಗೆ ಭೂಮಿ ಕಂಪಿಸಿದ ಅನುಭವ ಉಂಟಾಯಿತು.
4.8ರಷ್ಟು ತೀವ್ರತೆ
ಬೆಳಗಾವಿಯಲ್ಲಿ ಶನಿವಾರ ರಾತ್ರಿ ಸಂಭವಿಸಿದ ಭೂಕಂಪದ ಕೇಂದ್ರ ಬಿಂದು ಮಹಾರಾಷ್ಟ್ರದ ಕೊಯ್ನಾ ಪ್ರದೇಶ ಎಂದು ತಿಳಿದುಬಂದಿದೆ. ರಾತ್ರಿ 11 ಗಂಟೆ 44 ನಿಮಿಷ 52 ಸೆಕೆಂಡಿನ ಸುಮಾರಿಗೆ ಭೂಮಿಯ ಮೇಲ್ಮೈ ಪ್ರದೇಶದಿಂದ 10 ಕಿಮೀ ಅಂತರದಷ್ಟು ಆಳದಲ್ಲಿ ಭೂಮಿ ಕಂಪಿಸಿದೆ. ಕಂಪನದ ತೀವ್ರತೆ ಸುಮಾರು 4.8 ಮ್ಯಾಗ್ನಿಟ್ಯೂಡ್‌ನಷ್ಟಿತ್ತು ಎಂದು ಗೊತ್ತಾಗಿದೆ.
ಕೆಲ ಸೆಕೆಂಡುಗಳ ಕಾಲ ಮೇಜು, ಕುರ್ಚಿ ಹಾಗೂ ಕಿಟಕಿ ಅಲುಗಾಡಿದ ಅನುಭವವಾಯಿತು.
- ರವೀಂದ್ರ ತೋಟಿಗೇರ, ನ್ಯಾಯವಾದಿ
ಮನೆಯ 3ನೇ ಮಹಡಿಯಲ್ಲಿ ಕುರ್ಚಿ ಮೇಲೆ ಕುಳಿತುಕೊಂಡಿದ್ದೆ. ಇದ್ದಕ್ಕಿದ್ದಂತೆ 2-3 ಸೆಕೆಂಡುಗಳ ಕಾಲ ಕುರ್ಚಿ ಅಲುಗಾಡಿತು. ಬೆಳಗಾವಿಯ ಮಟ್ಟಿಗೆ ಈ ಭೂಕಂಪನ ಒಂದು ವಿಸ್ಮಯದ ವಿದ್ಯಮಾನ.
- ಶೀತಲ್‌ ಧನಪಾಲ್‌ ಪಾಟೀಲ್‌, ಟಿಳಕವಾಡಿ