ಅಥಣಿ: ದ್ವಿತೀಯ ಪಿಯುಸಿ ಪರೀಕ್ಷೆ ನಡೆಯುತ್ತಿರುವ ಕೆಎಲ್‌ಇ ಸಂಸ್ಥೆಯ ಸ್ಥಳೀಯ ಎಸ್‌ಎಸ್‌ಎಂಎಸ್‌ ಮಹಾವಿದ್ಯಾಲಯದ ಪರೀಕ್ಷಾ ಕೊಠಡಿಗಳಲ್ಲಿ ವಿದ್ಯಾರ್ಥಿಗಳ ನೋಂದಣಿ ಸಂಖ್ಯೆಗಳನ್ನು ತಪ್ಪಾಗಿ ಹಾಕಿದ ಪರಿಣಾಮ ಕೆಲ ಕಾಲ ಗೊಂದಲ ಉಂಟಾಯಿತು.
ಹೀಗಾಗಿ, ಪರೀಕ್ಷೆ ಸಮಯ ಆರಂಭಗೊಂಡರೂ ವಿದ್ಯಾರ್ಥಿಗಳು ಕೊಠಡಿಗಳನ್ನು ಹುಡುಕುವುದರಲ್ಲಿಯೇ ಪರದಾಡಿದರು. ವಿಷಯ ತಿಳಿದ ಪಾಲಕರು ಮಹಾವಿದ್ಯಾಲಯದ ಹೊರಗೆ ಪ್ರಾಚಾರ್ಯ ಮತ್ತು ಸಿಬ್ಬಂದಿ ವಿರುದ್ಧ ಪ್ರತಿಭಟನೆ ನಡೆಸಿದರು. ಪರೀಕ್ಷಾ ಕೊಠಡಿಗಳ ಬಾಗಿಲುಗಳ ಮೇಲೆ ವಿದ್ಯಾರ್ಥಿಗಳ ನೋಂದಣಿ ಸಂಖ್ಯೆಯನ್ನು ಅನುಕ್ರಮವಾಗಿ ನಮೂದಿಸದೇ ಇದ್ದಿದ್ದರಿಂದ 70ಕ್ಕೂ ಹೆಚ್ಚು ವಿದ್ಯಾರ್ಥಿಗಳು ತಮ್ಮ ನೋಂದಣಿ ಸಂಖ್ಯೆ ಹುಡುಕಲು ಪಡಿಪಾಟಲು ಪಟ್ಟರು. ಪರೀಕ್ಷಾ ಸಮಯ ಆರಂಭಗೊಂಡ ನಂತರ ಸಮಸ್ಯೆ ಬಗೆಹರಿಸಿ ಪರೀಕ್ಷೆ ನಡೆಸಲಾಯಿತು.