ಚಿಕ್ಕೋಡಿ ಎಸ್‌ಬಿಐ ಶಾಖೆಗೆ ಹುಸಿ ಬಾಂಬ್‌ ಕರೆ

ಚಿಕ್ಕೋಡಿ : ಹುಸಿ ಬಾಂಬ್‌ ಕರೆ ಹಿನ್ನೆಲೆಯಲ್ಲಿ ಇಲ್ಲಿನ ಸ್ಟೇಟ್‌ ಬ್ಯಾಂಕ್‌ ಆಫ್‌ ಇಂಡಿಯಾದಲ್ಲಿ ಕೆಲ ಕಾಲ ಬ್ಯಾಂಕ್‌ ಸಿಬ್ಬಂದಿ ಹಾಗೂ ಗ್ರಾಹಕರು ಕಂಗಾಲಾಗಿ ಹೊರಗೋಡಿ ಬಂದ ಘಟನೆ ಸೋಮವಾರ ನಡೆಯಿತು.

ಅಪರಿಚಿತ ವ್ಯಕ್ತಿಯೋರ್ವ ಪೊಲೀಸ್‌ ಕಂಟ್ರೋಲ್‌ ರೂಂಗೆ ದೂರವಾಣಿ ಕರೆ ಮಾಡಿ, ಎಸ್‌ಬಿಐ ಶಾಖೆಯಲ್ಲಿ ಬಾಂಬ್‌ ಇಡಲಾಗಿದೆ ಎಂದು ಬೆದರಿಕೆ ಹಾಕಿದ ಹಿನ್ನೆಲೆಯಲ್ಲಿ ಚಿಕ್ಕೋಡಿ ಪೊಲೀಸರು ಬ್ಯಾಂಕ್‌ಗೆ ದೌಡಾಯಿಸಿ ಪರಿಶೀಲನೆ ನಡೆಸಿದರು. ಆದರೆ, ಬಾಂಬ್‌ ಪತ್ತೆಯಾಗಲಿಲ್ಲ. ನಂತರ ಬೆಳಗಾವಿಯಿಂದ ಆಗಮಿಸಿದ ಶ್ವಾನ ದಳ ಹಾಗೂ ಬಾಂಬ್‌ ನಿಷ್ಕ್ರಿಯ ದಳದ ಪೊಲೀಸರು ಪರಿಶೀಲನೆ ನಡೆಸಿ ಹುಸಿ ಬಾಂಬ್‌ ಕರೆ ಎಂದು ಸ್ಪಷ್ಟಪಡಿಸಿದ ನಂತರ ಆತಂಕದ ವಾತಾವರಣ ತಿಳಿಯಾಯಿತು.

ಬಾಂಬ್‌ ಕರೆ ಮಾಡಿದ ವ್ಯಕ್ತಿಯ ಗುರುತು ಪತ್ತೆಯಾಗಿದ್ದು, ಮುಂದಿನ ಕ್ರಮ ಕೈಗೊಳ್ಳಲಾಗುವುದು ಎಂದು ಚಿಕ್ಕೋಡಿ ಸಿಪಿಐ ಬಸವರಾಜ ಮುಕರ್ತಿಹಾಳ ತಿಳಿಸಿದ್ದಾರೆ. ಚಿಕ್ಕೋಡಿ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.