ವಿದ್ಯುತ್‌ ಶಾರ್ಟ್‌ ಸಕ್ರ್ಯೂಟ್‌ನಿಂದ ಹೊಟೇಲ್‌ಗೆ ಬೆಂಕಿ

ಸುರೇಬಾನ: ವಿದ್ಯುತ್‌ ಶಾರ್ಟ್‌ ಸಕ್ರ್ಯೂಟ್‌ನಿಂದ ಹೊಟೇಲ್‌ಗೆ ಬೆಂಕಿ ತಗುಲಿ ಎರಡು ಲಕ್ಷ ರೂಪಾಯಿಗೂ ಅಧಿಕ ಮೌಲ್ಯದ ಆಸ್ತಿ-ಪಾಸ್ತಿ ನಷ್ಟವಾದ ಘಟನೆ ಶಿವಪೇಠ ಗ್ರಾಮದಲ್ಲಿನಡೆದಿದೆ.

ಹೊಟೇಲ್‌ ಗ್ರಾಮದ ಮಲ್ಲವ್ವ ನಾಗಪ್ಪ ಕೊಣ್ಣೂರ ಅವರಿಗೆ ಸೇರಿದೆ. ನಿತ್ಯದಂತೆ ಬುಧವಾರ ರಾತ್ರಿ 8 ಗಂಟೆಯ ಸುಮಾರಿಗೆ ಹೊಟೇಲ್‌ ಬಂದ್‌ ಮಾಡಿ ಮನೆಗೆ ತೆರಳಿದ್ದಾರೆ. ಆನಂತರ 11ರ ಸುಮಾರಿಗೆ ಘಟನೆ ನಡೆದಿರಬಹುದು ಎನ್ನಲಾಗಿದೆ. ಹೊಟೇಲ್‌ನಲ್ಲಿದ್ದ ಎಲ್ಲಸಾಮಗ್ರಿಗಳು ಸುಟ್ಟು ಕರಕಲಾಗಿವೆ.

ಘಟನೆಯಿಂದ ಕ್ಷೋಭೆಗೊಳಗಾಗಿರುವ ಮಲ್ಲವ್ವ ''ವಿಧವೆಯಾಗಿರುವ ನಾನು ವಿಕಲಚೇತನ ಮಗಳ ಶಿಕ್ಷಣ ಹೇಗೆ ಕೊಡಿಸಲಿ. ಅಂಗಡಿಗೆ ಬೆಂಕಿ ಹತ್ತಿ ನನ್ನ ಮತ್ತು ಮಗಳ ಬಾಳು ಹಾಳಾಯಿತು'' ಎಂದು ಗೋಳಾಡುತ್ತಿದ್ದಾರೆ.

ಘಟನಾ ಸ್ಥಳಕ್ಕೆ ಕಂದಾಯ ನಿರೀಕ್ಷಕ ಖಾನಾಪೂರ, ಸುರೇಬಾನ ಹೆಸ್ಕಾಂ ಶಾಖೆಯ ಎಸ್‌.ಬಿ. ಮಾನೆ ಭೇಟಿನೀಡಿ ಪರಿಶೀಲಿಸಿದರು. ಹೊಟೇಲ್‌ ಮಾಲಕಿ ಮಲ್ಲವ್ವ ರಾಮದುರ್ಗ ಪೊಲೀಸ್‌ ಠಾಣೆಯಲ್ಲಿಪ್ರಕರಣ ದಾಖಲಿಸಿದ್ದಾರೆ.