ಕಲಾವಿದರ ಸುಪ್ತಕಲೆ ಪ್ರದರ್ಶಿಸಲು ವೇದಿಕೆ ಸಜ್ಜು

ಇಚಲಕರಂಜಿ: ಕಳೆದ ಎರಡು ದಶಕಗಳಿಂದ ಅತ್ಯಂತ ಯಶಸ್ವಿಯಾಗಿ ನಡೆಸಿಕೊಂಡು ಬರುತ್ತಿರುವ 'ಇಚಲಕರಂಜಿ ಫೆಸ್ಟಿವಲ್‌' ಸೆ.18ರಂದು ಪ್ರಾರಂಭವಾಗುತ್ತಿದೆ.

ಸುದ್ದಿಗೋಷ್ಠಿಯಲ್ಲಿ ಈ ಕುರಿತು ವಿವರಿಸಿದ ಫೆಸ್ಟಿವಲ್‌ ಅಧ್ಯಕ್ಷ ವಿಲಾಸರಾವ ಗಾತಾಡೆ, ಮನರಂಜನೆಯ ಜತೆಗೆ ಕಲಾವಿದರಲ್ಲಿನ ಸುಪ್ತಕಲೆ ಪ್ರದರ್ಶಿಸಿಸಲು ವೇದಿಕೆ ಸಜ್ಜಾಗಿದ್ದು ಸೆ. 18ರಂದು ಬೆಳಗ್ಗೆ ಗಣೇಶನ ಆರತಿಯೊಂದಿಗೆ ಫೆಸ್ಟಿವಲ್‌ ಪ್ರಾರಂಭವಾಗಲಿದೆ. ಮಧ್ಯಾಹ್ನ ಮಹಿಳೆಯರಿಂದ ಝಿಮ್ಮಾ ಫುಗಡಿ, ನಂತರ 'ಅಮ್ಹಿ ದೋN' ಸಂಜೆ ಶಾಹಿರ್‌ ಜಾಧವ ಅವರಿಂದ ಜಾನಪದ ಹಾಡುಗಳ ಮನರಂಜನೆ ಕಾರ್ಯಕ್ರಮಗಳು ನಡೆಯಲಿವೆ.

19ರಂದು ಮುಕ್ತ ಮಹಿಳಾ ಗುಂಪಿನಿಂದ ಮೆಹಂದಿ ಸ್ಪರ್ಧೆ, ನಂತರ ಸಿಹಿ, ಖಾರ, ಮೋದಕ ಪಾಕಕಲೆ ಸ್ಪರ್ಧೆ, ಮಧ್ಯಾಹ್ನ ಮರಾಠಿ ಲಾವಣಿ ಸ್ಪರ್ಧೆ, ಸಂಜೆ ಬಾಲ ವಾದ್ಯ ವೃಂದದಿಂದ ಸಂಗೀತ ಕಾರ್ಯಕ್ರಮ ಲಾವಣಿ ಸ್ಪರ್ಧೆಗಳು ನಡೆಯಲಿದ್ದು ಕೇವಲ ಮಹಿಳೆಯರಿಗೆ ಮಾತ್ರ ಪ್ರವೇಶವಿರುವುದಾಗಿ ತಿಳಿಸಿದರು.

20 ರಂದು ಮಧ್ಯಾಹ್ನ 3ರಿಂದ ಮಹಿಳೆಯರ ಸೌಂದರ್ಯ ಸ್ಪರ್ಧೆ 'ಮಿಸ್‌ ಇಚಲಕರಂಜಿ ಫೆಸ್ಟಿವಲ್‌' ಹಾಗೂ 'ಮಿಸೆಸ್‌ ಇಚಲಕರಂಜಿ' ಫೆಸ್ಟಿವಲ್‌, ಸಂಜೆ 7 ರಿಂದ ಸಾಧಕರಿಗೆ ಪ್ರಶಸ್ತಿ ನೀಡಿ ಸನ್ಮಾನಿಸಲಾಗುವುದು. 21ರಂದು ಮ್ಯಧ್ಯಾಹ್ನ ಡಾನ್ಸ್‌ ಸ್ಪರ್ಧೆ ನಡೆಯಲಿದೆ. 22ರಂದು ಬೆಳಗ್ಗೆ 5ರಿಂದ 7ನೇ ತರಗತಿವರೆಗಿನ ಸಣ್ಣ ಗುಂಪು, ಹಾಗೂ 8ರಿಂದ 10 ನೇ ತರಗತಿವರೆಗಿನ ದೊಡ್ಡ ಗುಂಪು ಹೀಗೆ ಎರಡು ಗುಂಪುಗಳಲ್ಲಿ ಚಿತ್ರಕಲೆ ಸ್ಪರ್ಧೆ, ಮಧ್ಯಾಹ್ನ 'ಶ್ರೀ ಶರೀರ ಸೌಷ್ಠವ ಸ್ಪರ್ಧೆ ನಡೆಯಲಿದೆ. ಇದಕ್ಕಾಗಿ ವಯೋಮಾನ ಆಧಾರಿತ ಐದು ಗುಂಪುಗಳನ್ನು ಮಾಡಲಾಗಿದೆ. ರಾತ್ರಿ 8ರಿಂದ 10ರವರೆಗೆ ಪದ್ಮಾಕರ ಕುರಕುಟೆಯವರಿಂದ ಗಾನಲಹರಿ ಕಾರ್ಯಕ್ರಮ ನಡೆಯಲಿದೆ.

23ರಂದು ಅನಂತ ಚತುದರ್ಶಿ ನಿಮಿತ್ತ ಬೆಳಗ್ಗೆಯಿಂದ ಸಂಜೆಯವರೆಗೆ ಗಣೇಶ ವಿಸರ್ಜನೆ ಕಾರ್ಯಕ್ರಮ ನಡೆಯಲಿದೆ. ಗಣೇಶನಿಗೆ ವಿದಾಯ ಮೆರವಣಿಗೆಯಲ್ಲಿಯ ಮಂಡಳಗಳಿಗೆ ಶ್ರೀಫಲ, ವೀಳ್ಯದೆಲೆ ವಿತರಣೆ ಝೇಂಡಾ ಚೌಕ್‌ನಲ್ಲಿ ನಡೆಯಲಿದೆ. ಕಳೆದ 22ವರ್ಷಗಳಿಂದ ಕಲೆ, ಕ್ರೀಡೆ, ಸಾಂಸ್ಕೃತಿಕ, ಪ್ರಬೋಧನೆ, ಸೇರಿದಂತೆ ನಾನಾ ರಂಗಗಳಲ್ಲಿನ ಕಲಾವಿದರನ್ನು ಉತ್ತೇಜಿಸಲುಪ್ರಕಾಶ ಅವಾಡೆಯವರ ನೇತೃತ್ವದಲ್ಲಿ ಇಚಲಕರಂಜಿ ಫೆಸ್ಟಿವಲ್‌ ಪ್ರಾರಂಭಿಸಲಾಗಿದೆ ಎಂದು ವಿಲಾಸ ಗಾತಾಡೆ ತಿಳಿಸಿದರು.

ಸುದ್ದಿಗೋಷ್ಠಿಯಲ್ಲಿ ಕಾರ್ಯಾಧ್ಯಕ್ಷ ಅಹಮ್ಮದ್‌ ಮುಜಾವರ, ಕಾರ್ಯದರ್ಶಿ ಶೇಖರ ಶಹಾ, ಜಿಪಂ ಸದಸ್ಯ ರಾಹುಲ್‌ ಅವಾಡೆ ಉಪಸ್ಥಿತರಿದ್ದರು.