ಅಕ್ರಮ ಬಂಧನ, ಹಲ್ಲೆ: ನಾಲ್ವರಿಗೆ ಶಿಕ್ಷೆ

ಘಟಪ್ರಭಾ : ಜಮೀನು ವಿವಾದದ ಹಿನ್ನೆಲೆಯಲ್ಲಿ ಮಹಿಳೆ ಮತ್ತು ಆಕೆಯ ಪತಿಯನ್ನು ಹಗ್ಗದಿಂದ ಕಟ್ಟಿಹಾಕಿ ಬಾರುಕೋಲು, ಚಪ್ಪಲಿಗಳಿಂದ ಹಲ್ಲೆ ನಡೆಸಿದ ನಾಲ್ವರು ಆಪಾದಿತರಿಗೆ ಇಲ್ಲಿಯ 1ನೇ ಹೆಚ್ಚುವರಿ ಜೆ.ಎಂ.ಎಫ್‌.ಸಿ. ನ್ಯಾಯಾಲಯ ಒಂದು ವರ್ಷ ಜೈಲುವಾಸದ ಶಿಕ್ಷೆ ಹಾಗೂ 10 ಸಾವಿರ ರೂ. ದಂಡ ವಿಧಿಸಿ ಶನಿವಾರ ತೀರ್ಪು ನೀಡಿದೆ.

ಕೌಜಲಗಿ ಗ್ರಾಮದ ಬೀರಪ್ಪಾ ನಿಂಗಪ್ಪಾ ಬೆಳ್ಳಿವಾರಿ, ವಿಠಲ ಮಹಾದೇವ ಬೆಳ್ಳಿವಾರಿ, ಭಾಗವ್ವಾ ಮಹಾದೇವ ಬೆಳ್ಳಿವಾರಿ ಮತ್ತು ಮಹಾದೇವಿ ಬೀರಪ್ಪಾ ಬೆಳ್ಳಿವಾರಿ ಎಂಬುವವರೇ ಶಿಕ್ಷೆಗೊಳಗಾದವರು.

2014ರ ಸೆ.24ರಂದು ಕೌಜಲಗಿ ಹೊರವಲಯದ ಕೃಷಿ ಭೂಮಿಯೊಂದರಲ್ಲಿ ಉಳುಮೆಯಲ್ಲಿ ನಿರತರಾಗಿದ್ದ ಭೀಮಪ್ಪಾ ಬಸಪ್ಪಾ ಬೆಳ್ಳಿವಾರಿ ಹಾಗೂ ಆತನ ಸೊಸೆ ಕಸ್ತೂರಿ ಬಸಪ್ಪಾ ಬೆಳ್ಳಿವಾರಿ ಇವರೊಂದಿಗೆ ಆಪಾದಿತರು ಉಳುಮೆ ವಿಷಯವಾಗಿ ತಂಟೆ-ತಕರಾರು ತೆಗೆದಿದ್ದರು. ನಂತರ ಅವರಿಬ್ಬರನ್ನೂ ಹಗ್ಗದಿಂದ ಕಟ್ಟಿಹಾಕಿ ಚಪ್ಪಲಿ ಹಾಗೂ ಬಾರುಕೋಲಿನಿಂದ ಹಲ್ಲೆ ನಡೆಸಿದ್ದರು. ಈ ಸಂಬಂಧ ಕಸ್ತೂರಿ ಬೆಳ್ಳಿವಾರಿ ಕುಲಗೋಡ ಪೊಲೀಸ್‌ ಠಾಣೆಗೆ ದೂರು ದಾಖಲಿಸಿದ್ದರು.

ತನಿಖೆ ನಡೆಸಿದ ಕುಲಗೋಡ ಠಾಣೆಯ ಆಗಿನ ಸಹಾಯಕ ಪೊಲೀಸ್‌ ಸಬ್‌ ಇನ್‌ಸ್ಪೆಕ್ಟರ್‌ ಬಿ.ಎಸ್‌.ಸಿದ್ನಾಳ ನ್ಯಾಯಾಲಯಕ್ಕೆ ಆರೋಪಿಗಳ ವಿರುದ್ಧ ದೋಷಾರೋಪ ಪಟ್ಟಿ ಸಲ್ಲಿಸಿದ್ದರು. ಪ್ರಕರಣದ ವಿಚಾರಣೆ ನಡೆಸಿದ 1ನೇ ಹೆಚ್ಚುವರಿ ಜೆಎಂಎಫ್‌ಸಿ ನ್ಯಾಯಾಲಯದ ನ್ಯಾಯಾಧೀಶ ವೀರೇಶಕುಮಾರ ಸಿ.ಕೆ. ಅವರು ಶಿಕ್ಷೆ ಪ್ರಕಟಿಸಿ ತೀರ್ಪು ನೀಡಿದ್ದಾರೆ. ಸರಕಾರದ ಪರವಾಗಿ ಎಂ.ಪಿ.ಗಾಂವಕರ ವಾದಿಸಿದ್ದರು.