ಎನ್‌ಡಿಆರ್‌ಎಫ್‌ ಯೋಧರಿಗೆ ರಕ್ಷಾ ಬಂಧನದೊಂದಿಗೆ ಬೀಳ್ಕೊಡುಗೆ

ಚಿಕ್ಕೋಡಿ : ತಮ್ಮ ಪ್ರಾಣವನ್ನೇ ಪಣಕ್ಕಿಟ್ಟು ಪ್ರವಾಹದಲ್ಲಿ ಸಿಲುಕಿದ ಜನರನ್ನು ರಕ್ಷ ಣೆ ಮಾಡಿದ ಎನ್‌ಡಿಆರ್‌ಎಫ್‌ ಯೋಧರನ್ನು ಚಿಕ್ಕೋಡಿ ಮತ್ತು ನಿಪ್ಪಾಣಿ ತಾಲೂಕಿನ ಜನರು ಎಂದಿಗೂ ಮರೆಯುವುದಿಲ್ಲ ಎಂದು ಶಾಸಕಿ ಶಶಿಕಲಾ ಜೊಲ್ಲೆ ಹೇಳಿದರು.

ಇಲ್ಲಿನ ಬಿಜೆಪಿ ಕಾರ್ಯಾಲಯದಲ್ಲಿ ಬುಧವಾರ ಆಯೋಜಿಸಿದ್ದ, ಸತತ 15 ದಿನಗಳ ಕಾಲ ನದಿ ತೀರದಲ್ಲಿಯೇ ಇದ್ದು ಪ್ರವಾಹದಲ್ಲಿ ಸಿಲುಕಿದ ಜನರ ರಕ್ಷ ಣೆ ಮಾಡಿ ತೆರಳುತ್ತಿರುವ ಎನ್‌ಡಿಆರ್‌ಎಫ್‌ ಯೋಧರಿಗೆ ರಾಖಿ ಕಟ್ಟುವ ಕಾರ್ಯಕ್ರಮದ ನೇತೃತ್ವ ವಹಿಸಿ ಅವರು ಮಾತನಾಡಿದರು.

ದೂರದ ಕೊಲ್ಕತ್ತಾದಿಂದ ಬಂದು ನಮ್ಮೊಂದಿಗೆ 15 ದಿನಗಳ ಕಾಲ ಇದ್ದು, ನದಿ ತೀರದ ಹಳ್ಳಿಗಳಲ್ಲಿ ಪ್ರವಾಹದಲ್ಲಿ ಸಿಲುಕಿರುವ ಜನರ ಜೀವನ ರಕ್ಷ ಣೆಯಲ್ಲಿ ಮಹತ್ತ ಪಾತ್ರ ವಹಿಸಿ ಜನರ ಮೆಚ್ಚುಗೆಗೆ ಪಾತ್ರರಾಗಿರುವ ಎನ್‌ಡಿಆರ್‌ಎಫ್‌ ಯೋಧರ ಕಾರ್ಯ ನಿಜಕ್ಕೂ ಶ್ಲಾಘನೀಯ ಎಂದರು.

ಕೋಲ್ಕತ್ತಾದ 2ನೇ ರೆಜಿಮೆಂಟ್‌ನ ಡೆಪ್ಯುಟಿ ಕಮಾಂಡರ್‌ ರಘುವೀರಸಿಂಗ್‌ ಮಾತನಾಡಿ, ಪ್ರವಾಹ ಸೇರಿದಂತೆ ನಾನಾ ಆಪತ್ತಿನಲ್ಲಿ ಸಿಲುಕಿದ ಜನರ ರಕ್ಷ ಣೆ ಮಾಡುವುದು ನಮ್ಮ ಕರ್ತವ್ಯವಾಗಿದೆ. ಆದರೆ ಚಿಕ್ಕೋಡಿಯ ಸಹೋದರಿಯರು ಇಂದು ರಾಖಿ ಕಟ್ಟುವ ಮೂಲಕ ನಮ್ಮ ಕುಟುಂಬದ ಪ್ರೀತಿ ತೋರಿದ್ದು ಭಾವುಕರನ್ನಾಗಿಸಿದೆ ಎಂದರು.

ಸಂಸದ ಅಣ್ಣಾಸಾಹೇಬ ಜೊಲ್ಲೆ, ಎನ್‌ಡಿಆರ್‌ಎಫ್‌ ಅಧಿಕಾರಿ ಅಜಯಸಿಂಗ್‌, ಕರ್ನಾಟಕ ರಾಜ್ಯ ಸೌಹಾರ್ದ ಸಹಕಾರಿ ಮಹಾಮಂಡಳ ಉಪಾಧ್ಯಕ್ಷ ಜಗದೀಶ ಕವಟಗಿಮಠ, ಸಂಜಯ ಅಡಕೆ, ಸಂಜಯ ಅಡಕೆ, ರವಿ ಅಶ್ವತ್ಥಪುರ ಮುಂತಾದವರು ಉಪಸ್ಥಿತರಿದ್ದರು.

ಮಿರ್ಜೆಗಲ್ಲಿ ಮತ್ತು ಜೈನ್‌ಪೇಠದ ಮಹಿಳೆಯರು:
ಚಿಕ್ಕೋಡಿ: ಪಟ್ಟಣದ ಪರಟಿನಾಗಲಿಂಗೇಶ್ವರ ಯಾತ್ರಿ ನಿವಾಸದಲ್ಲಿ ಕಳೆದ 15 ದಿನಗಳಿಂದ ತಂಗಿದ್ದು ಪ್ರವಾಹದಲ್ಲಿ ಸಿಲುಕಿದ್ದ ಸಾವಿರಾರು ಜನರ ಪ್ರಾಣ ರಕ್ಷ ಣೆ ಮಾಡಿದ ಎನ್‌ಡಿಆರ್‌ಎಫ್‌ ಯೋಧರಿಗೆ ಮಿರ್ಜೆಗಲ್ಲಿ ಮತ್ತು ಜೈನ್‌ಪೇಠದ ಮಹಿಳೆಯರು ರಾಖಿ ಕಟ್ಟಿ ಆರತಿ ಮಾಡಿ ಸಿಹಿ ತಿನಿಸುವ ಮುಖಾಂತರ ಗೌರವಿಸಿ ಬೀಳ್ಕೊಟ್ಟರು.

ಭಾರತಿ ಕತ್ತಿ, ವರ್ಷಾ ಮಾಂಗೂರೆ, ಭಾರತಿ ಲಗಾರೆ, ಲಕ್ಷ್ಮೀ ಮಾಳಿ, ಸುಧಾ ಮಾಂಗೂರೆ, ರಾಜಶ್ರೀ ಹಂಜಿ, ಸುನೀತಾ ಗೌರಾಜ, ಸವಿತಾ ಅಲಾಸೆ ಮುಂತಾದ ಮಹಿಳೆಯರು ಸ್ವ ಇಚ್ಛೆಯಿಂದ ಕೈಯಲ್ಲಿ ಆರತಿ ಹಿಡಿದು ಪರಟಿನಾಗಲಿಂಗೇಶ್ವರ ಯಾತ್ರಿ ನಿವಾಸಕ್ಕೆ ಆಗಮಿಸಿ ರಕ್ಷಾ ಬಂಧನದೊಂದಿಗೆ ಕೃತಜ್ಞತೆ ಸಮರ್ಪಿಸಿದರು.