ಗಡಿ ಭಾಗದ ಚೆಕ್‌ಪೋಸ್ಟ್‌ ಬಳಿಯೇ ಅಂತ್ಯಸಂಸ್ಕಾರ

ನಿಪ್ಪಾಣಿ: ಮಹಾರಾಷ್ಟ್ರದಲ್ಲಿಸಂಭವಿಸಿದ ಅಪಘಾತದಲ್ಲಿ ಮೃತಪಟ್ಟಿದ್ದ ರಾಜ್ಯದ ವ್ಯಕ್ತಿಯೊಬ್ಬರ ಶವವನ್ನು ಸ್ವಗ್ರಾಮಕ್ಕೆ ಸಾಗಿಸಲು ಅನುಮತಿ ಸಿಗದೇ ಇರುವುದರಿಂದ ಗಡಿ ಭಾಗದ ಕೊಗನೊಳಿಯ ಚೆಕ್‌ಪೋಸ್ಟ್‌ ಸಮೀಪದಲ್ಲೇ ಅಂತ್ಯ ಸಂಸ್ಕಾರ ನೆರವೇರಿಸಲಾಯಿತು.

ಬೆಳಗಾವಿ ಜಿಲ್ಲೆಯ ಬೈಲಹೊಂಗಲದ ಲಿಂಗರಾಜ ಬಸವಪ್ರಭು ಬೆಳಗಾವಿ (53)ಅವರು ಮುಂಬಯಿಯ ಎಲ್‌ ಆ್ಯಂಡ್‌ ಟಿ ಕಂಪನಿಯಲ್ಲಿಎಂಜಿನಿಯರ್‌ ಆಗಿ ಕೆಲಸ ಮಾಡುತ್ತಿದ್ದರು. ಬುಧವಾರ ಠಾಣೆ ಬಳಿ ಸಂಭವಿಸಿದ ಅಪಘಾತದಲ್ಲಿ ಅವರು ಮೃತಪಟ್ಟಿದ್ದರು.

ಈ ಹಿನ್ನೆಲೆಯಲ್ಲಿಅವರ ಸಂಬಂಧಿಕರು ಪಾರ್ಥಿವ ಶರೀರವನ್ನು ಸ್ವಗ್ರಾಮ ಬೈಲಹೊಂಗಲಕ್ಕೆ ಒಯ್ಯಲು ಅಲ್ಲಿನ ಅಧಿಕಾರಿಗಳಿಂದ ಅನುಮತಿ ಪಡೆದಿದ್ದರು. ಅದರಂತೆ ಗುರುವಾರ ಬೆಳಗ್ಗೆ 9 ಗಂಟೆಗೆ ನಿಪ್ಪಾಣಿ ಬಳಿಯ ಕೊಗನೊಳಿಯ ಚೆಕ್‌ಪೋಸ್ಟ್‌ಗೆ ಬಂದಾಗ, ಕೊರೊನಾ ಸೋಂಕಿನ ಭೀತಿಯಿಂದ ಅಧಿಕಾರಿಗಳು ಪಾರ್ಥಿವ ಶರೀರವನ್ನು ಊರಿಗೆ ಸಾಗಿಸಲು ಅವಕಾಶ ಇಲ್ಲಎಂದು ತಿಳಿಸಿದರು.

ಈ ಹಿನ್ನೆಲೆಯಲ್ಲಿದೂಧಗಂಗಾ ನದಿ ತೀರದ ಬಳಿಯೇ ಲಿಂಗರಾಜ ಅವರ ಅಂತ್ಯಕ್ರಿಯೆ ನೆರವೇರಿಸಲಾಯಿತು. ಲಿಂಗರಾಜರ ಅವರ ಪತ್ನಿ ಸುಜಾತಾ, ಪುತ್ರ ಹಾಗೂ ಪುತ್ರಿ, ತಂದೆ, ಸಂಬಂಧಿಕರು ಹಾಗೂ ಅಧಿಕಾರಿಗಳು ಈ ವೇಳೆ ಉಪಸ್ಥಿತರಿದ್ದರು.

ಕೆಲ ದಿನಗಳ ಹಿಂದೆ ಹುಕ್ಕೇರಿ ತಾಲೂಕಿನ ಬೆಲ್ಲದ ಬಾಗೇವಾಡಿಯ ವ್ಯಕ್ತಿಯೊಬ್ಬರು ಮುಂಬಯಿಯಲ್ಲಿಹೃದಯಾಘಾತದಿಂದ ನಿಧನರಾಗಿದ್ದರು. ಅಂದು ಕೂಡ ವ್ಯಕ್ತಿಯ ಶವವನ್ನು ಸ್ವಗ್ರಾಮಕ್ಕೆ ಒಯ್ಯಲು ಅವಕಾಶ ನಿರಾಕರಿಸಿದ್ದರಿಂದ ಚೆಕ್‌ಪೋಸ್ಟ್‌ ಬಳಿ ನದಿ ತೀರದಲ್ಲಿಅಂತ್ಯ ಸಂಸ್ಕಾರ ನೆರವೇರಿಸಲಾಗಿತ್ತು.