ಹಾಡಹಗಲು 10 ತೊಲೆ ಚಿನ್ನಾಭರಣ ಕಳ್ಳತನ

ಕಾಗವಾಡ : ಹಾಡಹಗಲು ಮನೆ ಬೀಗ ಮುರಿದ ಕಳ್ಳರು ಮನೆಯಲ್ಲಿಯ 10 ತೊಲೆ ಚಿನ್ನಾಭರಣ ಕದ್ದಿದ್ದಾರೆ.

ಇಲ್ಲಿನ ಬೆಳಗಾವಿ-ಸಾಂಗಲಿ ರಾಜ್ಯ ಹೆದ್ದಾರಿ ಹತ್ತಿರದ ಮಲಗೌಡ ರಾವಸಾಬ ಪಾಟೀಲ ಎಂಬುವರ ತೋಟದಲ್ಲಿ ಮನೆಯಲ್ಲಿ ಕಳ್ಳತನ ನಡೆಸಲಾಗಿದೆ. ಕಬ್ಬಿಣ ರಾಡ್‌ನಿಂದ ಮನೆ ಬೀಗ ಒಡೆದು ಒಳ ಪ್ರವೇಶಿಸಿದ ಕಳ್ಳರು ಟ್ರೆಜರಿ ಮುರಿದು ಹಣ, ಚಿನ್ನಾಭರಣಕ್ಕಾಗಿ ತಪಾಸಣೆ ಮಾಡಿದ್ದಾರೆ. ನಂತರ ಪಕ್ಕದಲ್ಲಿದ್ದ ಮಂಚದ ಡ್ರಾವರಿನಲ್ಲಿನ ಚಿನ್ನಾಭರಣ ದೋಚಿಕೊಂಡು ಹೋಗಿದ್ದಾರೆ.

ಮನೆಯಿಂದ ಪಟ್ಟಣದೊಳಗೆ ಹೋಗಿ ಮರಳಿ ಬಂದಾಗ ಮನೆಯವರಿಗೆ ಕಳ್ಳತನವಾಗಿರುವುದು ಗೊತ್ತಾಗಿದ್ದು, ಕೂಡಲೇ ಕಾಗವಾಡ ಪೊಲೀಸ್‌ ಠಾಣೆಗೆ ಮಾಹಿತಿ ನೀಡಿದ್ದಾರೆ. ಪಿಎಸ್‌ಐ ಹನುಮಂತ ಶಿರಹಟ್ಟಿ ಹಾಗೂ ಸಿಬ್ಬಂದಿ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲಿಸಿದ್ದಾರೆ. ಡಿವೈಎಸ್‌ಪಿ ಆರ್‌.ಬಿ. ಬಸರ್ಗಿ, ಸಿಪಿಐ ಆಲಿಸಾಬ ನೇತೃತ್ವದಲ್ಲಿ ಶ್ವಾನ ದಳ, ಬೆರಳಚ್ಚು ತಪಾಸಣೆ ತಂಡ ಭೇಟಿ ನೀಡಿ ಪರಿಶೀಲಿಸಿದ್ದು, ಕಳ್ಳರ ಪತ್ತೆಗೆ ತನಿಖೆ ಮುಂದುವರಿದಿದೆ.