ವಿದ್ಯುತ್‌ ಕಂಬಕ್ಕೆ ಗೂಡ್ಸ್‌ ವಾಹನ ಡಿಕ್ಕಿ

ಕುಡಚಿ: ಭಿರಡಿ ಗ್ರಾಮದ ಬನಹಟ್ಟಿಗಲ್ಲಿಯ ರಸ್ತೆ ತಿರುವೊಂದರ ಜನನಿಬಿಡ ಪ್ರದೇಶದಲ್ಲಿ ಮಂಗಳವಾರ ಸಂಜೆ ಗೂಡ್ಸ್‌ ಬುಲೆರೋ ವಾಹನವೊಂದು ನಿಯಂತ್ರಣ ತಪ್ಪಿ ವಿದ್ಯುತ್‌ ಕಂಬಕ್ಕೆ ಡಿಕ್ಕಿ ಹೊಡೆದ ಪರಿಣಾಮ ಕಂಬ ತುಂಡಾಗಿದ್ದು ಸಂಭವನೀಯ ಅನಾಹುತ ತಪ್ಪಿದೆ.

ವಿದ್ಯುತ್‌ ಪ್ರವಹಿಸುತ್ತಿದ್ದ ತಂತಿಗಳನ್ನು ಹೊತ್ತಿದ್ದ ಕಂಬ ಅದೃಷ್ಟವಶಾತ್‌ ವಾಹನದ ಟಾಪ್‌ ಮೇಲೆ ಬಿದ್ದಿದ್ದು ನೆಲಕ್ಕುರುಳಿದ್ದರೆ ಅನಾಹುತಕ್ಕೆ ಕಾರಣವಾಗಲಿತ್ತು.

ಜುಗೂಳದ 'ಜಂಗಲ್‌ವಾಲೇ ಬಾಬಾ' ಎಂದೇ ಖ್ಯಾತಿ ಪಡೆದಿರುವ ಜೈನ ಮುನಿಗಳು ತಮ್ಮ ನೂರಾರು ಶಿಷ್ಯರೊಂದಿಗೆ ನಡೆಯುತ್ತ ಈ ಭಾಗದಲ್ಲಿ ಸಂಚರಿಸಿ ಗ್ರಾಮದ ಬಸದಿಗೆ ಆಗಮಿಸಿದ್ದರು. ಈ ಸಂದರ್ಭದಲ್ಲಿ ಅವರ ಸಾಹಿತ್ಯ, ಸಾಮಗ್ರಿ ತುಂಬಿದ ವಾಹನ ಕಂಬಕ್ಕೆ ಅಪ್ಪಳಿಸಿದೆ. ಸ್ಥಳೀಯರ ಸಕಾಲಿಕ ತುರ್ತು ಕರೆಗೆ ಹೆಸ್ಕಾಂನವರು ತಕ್ಷ ಣ ವಿದ್ಯುತ್‌ ಸರಬರಾಜು ಕಡಿತಗೊಳಿಸಿದ್ದರಿಂದ ಅವಘಡ ತಪ್ಪಿದೆ. ಗ್ರಾಪಂ ಸದಸ್ಯ ಕಲ್ಮೇಶ ನಿಡವಣಿ, ಮಲ್ಲಿಕಾರ್ಜುನ ಪತ್ರಾವಳಿ, ಕಾಡಯ್ಯಾ ಹಿರೇಮಠ, ಪ್ರಕಾಶ ಬರಗಾಲೆ ಮೊದಲಾದವರು ಸೇರಿ ವಾಹನದ ಮೇಲೆ ಬಿದ್ದಿದ್ದ ಕಂಬ ತೆರವುಗೊಳಿಸಲು ಶ್ರಮಿಸಿದರು. ಸ್ಥಳಕ್ಕೆ ಹೆಸ್ಕಾಂ ಹಾಗೂ ಗ್ರಾಪಂ ಸಿಬ್ಬಂದಿ ಭೇಟಿ ನೀಡಿದ್ದರು. ಈ ಕುರಿತು ಯಾವುದೇ ಪ್ರಕರಣ ದಾಖಲಾಗಿಲ್ಲ.