ಇಂದಿರಾ ಕ್ಯಾಂಟೀನ್‌: ವಿಧಾನಸಭೆಯಲ್ಲಿ ವಿಕ ವರದಿ ಪ್ರತಿಧ್ವನಿ

ಬೆಳಗಾವಿ: ಇಂದಿರಾ ಕ್ಯಾಂಟೀನ್‌ನಲ್ಲಿ ಗುಣ ಮಟ್ಟದ ಉಪಾಹಾರ ಪೂರೈಸದೆ ಇರುವ ಬಗ್ಗೆ 'ಬಡವರ ಅನ್ನಕ್ಕೂ ಕನ್ನ' ಶೀರ್ಷಿಕೆಯಡಿ 'ವಿಕ'ದಲ್ಲಿ ಪ್ರಕಟವಾಗಿದ್ದ ವಿಶೇಷ ವರದಿ ಸೋಮವಾರ ವಿಧಾನಸಭೆಯಲ್ಲಿ ಪ್ರತಿಧ್ವನಿಸಿತು.

ಉತ್ತರ ಕರ್ನಾಟಕ ಅಭಿವೃದ್ಧಿ ಕುರಿತ ವಿಶೇಷ ಚರ್ಚೆಯಲ್ಲಿ ಭಾಗವಹಿಸಿ ಮಾತನಾಡುತ್ತಿದ್ದ ಪ್ರತಿಪಕ್ಷದ ನಾಯಕ ಜಗದೀಶ್ ಶೆಟ್ಟರ್‌ ಈ ವಿಚಾರ ಪ್ರಸ್ತಾಪಿಸಿದರು. 'ಇಂದಿರಾ ಕ್ಯಾಂಟೀನ್‌ ತೆರೆಯುವುದಕ್ಕೆ ನಮ್ಮ ವಿರೋಧ ಇರಲಿಲ್ಲ. ಆದರೆ ಉತ್ತಮ ಆಹಾರ ನೀಡಬೇಕೆಂದು ಹೇಳಿದ್ದೆವು. ಪತ್ರಿಕೆ ಈ ಸಂಬಂಧ ರಿಯಾಲಿಟಿ ಚೆಕ್‌ ನಡೆಸಿದೆ. ಗುಣಮಟ್ಟದ ಆಹಾರ ಪೂರೈಸದೆ ಇರುವುದು ಈ ವೇಳೆ ಗೊತ್ತಾಗಿದೆ' ಎಂದರು.

'ಇಂದಿರಾ ಕ್ಯಾಂಟೀನ್‌ನಲ್ಲಿ ಉತ್ತಮ ಆಹಾರ ನೀಡದೆ ಇರುವುದರ ಬಗ್ಗೆ ತನಿಖೆಯಾಗಬೇಕು. ಜಿಲ್ಲೆ, ತಾಲೂಕಿನಲ್ಲೂ ಇಂದಿರಾ ಕ್ಯಾಂಟೀನ್‌ ಪ್ರಾರಂಭಿಸುವುದಾಗಿ ಸಿಎಂ ಹೇಳಿದ್ದಾರೆ. ಪೌಷ್ಟಿಕಾಂಶದ ಆಹಾರ ನೀಡಲು ಆದ್ಯತೆ ಕೊಡಬೇಕು' ಎಂದು ಒತ್ತಾಯಿಸಿದರು.