ಮಳೆಗಾಗಿ ದೇವ, ದೇವತೆಯರಿಗೆ ಜಲಾಭಿಷೇಕ

ಹುಕ್ಕೇರಿ: ಈ ವರ್ಷ ಉತ್ತಮ ಮಳೆಯಾಗಲಿ ಎಂದು ತಾಲೂಕಿನ ಎಲಿಮುನ್ನೋಳಿ ಗ್ರಾಮದ ಜನರು ದೇವರಿಗೆ ಹರಕೆ ಹೊತ್ತು ಗ್ರಾಮದೇವತೆ ಮಹಾಲಕ್ಷ್ಮೀ ದೇವಿ, ರಾಮಲಿಂಗೇಶ್ವರ ದೇವಸ್ಥಾನ ಸೇರಿದಂತೆ ಗ್ರಾಮದ ಎಲ್ಲ ದೇವಸ್ಥಾನಕ್ಕೆ ತೆರಳಿದ ರೈತರು, ಯುವಕರು ದೇವರಿಗೆ ಜಲಾಭಿಷೇಕ ಮಾಡಿದರು.

ಹರಕೆಯಂತೆ ಪ್ರತಿ ಶುಕ್ರವಾರ ಗ್ರಾಮದಲ್ಲಿ ಕೃಷಿ ಚಟುವಟಿಕೆ, ಮನೆಗಳಲ್ಲಿ ಕುಟ್ಟುವ, ಬೀಸುವ ಕೆಲಸ, ಭೂಮಿಯಲ್ಲಿ ಎತ್ತುಗಳ ದುಡಿಮೆಯನ್ನು ನಿಷೇಧಿಸಲಾಗಿದ್ದು, ಕರಿದ ಪದಾರ್ಥವನ್ನೂ ಈ ದಿನ ಮಾಡುವಂತಿಲ್ಲ.

ಅಲ್ಲದೆ ಶುಕ್ರವಾರದ ದಿನ ಗ್ರಾಮದಿಂದ ಬೇರೆಕಡೆಗೆ ಕೆಲಸಕ್ಕೆ ಹೋಗುವವರು ಊಟದ ಬುತ್ತಿಯನ್ನು ಸಹ ತೆಗೆದುಕೊಂಡು ಹೋಗುವಂತಿಲ್ಲ. ಹೀಗೆ ಐದು ಶುಕ್ರವಾರಗಳ ನಿಯಮ ಪಾಲಿಸಿ ಕೊನೆಯ ಶುಕ್ರವಾರ ಎಲ್ಲ ದೇವಸ್ಥಾನಗಳಿಗೆ ತೆರಳಿ ಜಲಾಭಿಷೇಕ ಪೂಜೆ ಪ್ರಾರ್ಥನೆ, ಭಜನೆ ಮತ್ತು ಪಲ್ಲಕ್ಕಿ ಉತ್ಸವ ಹಮ್ಮಿಕೊಂಡು ಮಳೆರಾಯನನ್ನು ಪಾರ್ಥಸುತ್ತಾರೆ. ಕೊನೆಯಲ್ಲಿ ಗ್ರಾಮದ ಸಾರ್ವಜನಿರಿಗೆ ಪ್ರಸಾದ ವ್ಯವಸ್ಥೆ ಮಾಡಿವುದರೊಂದಿಗೆ ಹರಕೆ ತೀರಿಸುವುದು ವಿಶೇಷ.