ಟರ್ಪಂಟೈನ್‌ ಆಯಿಲ್‌ ಸೇವಿಸಿ ಮಗು ಸಾವು

ಬೆಳಗಾವಿ: ತಾಲೂಕಿನ ಬಾಳೇಕುಂದ್ರಿ ಬಿ.ಕೆ. ಗ್ರಾಮದಲ್ಲಿ ಬಣ್ಣಕ್ಕೆ ಬೆರೆಸುವ ಟರ್ಪಂಟೈನ್‌ ಆಯಿಲ್‌ ಕುಡಿದು ಒಂದೂವರೆ ವರ್ಷದ ಮಗು ಮೃತಪಟ್ಟಿದೆ.

ಗ್ರಾಮದ ನಿಧಾ ಇಮ್ರಾನ್‌ ಜಮಾದಾರ ಮೃತ ಮಗು. ಲಾಕ್‌ಡೌನ್‌ ಕಾರಣದಿಂದ ಮನೆಯಲ್ಲಿಯೇ ಇದ್ದ ಮಗುವಿನ ತಂದೆ ಇಮ್ರಾನ್‌ ಮನೆ ಮುಂದೆ ನಿಂತಿದ್ದ ಚಕ್ಕಡಿಗೆ ಬಣ್ಣ ಬಳಿಯಲು ಮುಂದಾಗಿದ್ದರು. ಬಣ್ಣದಲ್ಲಿಮಿಶ್ರಣ ಮಾಡಲು ಟರ್ಪಂಟೈನ್‌ ಆಯಿಲ್‌ ಬಳಕೆ ಮಾಡಿದ್ದರು. ಬಣ್ಣದ ಡಬ್ಬಿ ಜತೆಗೆ ಇಟ್ಟಿದ ಟರ್ಪಂಟೈನ್‌ ಆಯಿಲ್‌ ಬಾಟಲ್‌ ಕುಡಿಯುವ ನೀರಿನ ರೀತಿ ಕಂಡಿದ್ದರಿಂದ ಮಗು ಅದನ್ನು ಕುಡಿದಿದೆ.

ಅಸ್ವಸ್ಥಗೊಂಡ ಮಗುವನ್ನು ತಕ್ಷಣ ಬೆಳಗಾವಿ ನಗರದ ಖಾಸಗಿ ಆಸ್ಪತ್ರೆಗೆ ದಾಖಲಿಸಿದರೂ ಚಿಕಿತ್ಸೆ ಫಲಿಸದೆ ಮೃತಪಟ್ಟಿದೆ ಎಂದು ಪ್ರಕರಣದ ವಿಚಾರಣೆ ನಡೆಸಿರುವ ಮಾರಿಹಾಳ ಠಾಣೆ ಪೊಲೀಸರು ಮಾಹಿತಿ ನೀಡಿದ್ದಾರೆ.