ಗೂಡ್ಸ್‌ ಟ್ರೇನ್‌ ಚಾಲಕನ ಮೂಲಕ ಬೆಳಗಾವಿ ಮಗುವಿಗೆ ಔಷಧ ಪೂರೈಕೆ: ಸಚಿವ ಸುರೇಶ್‌ ಅಂಗಡಿ ಕಾರ್ಯಕ್ಕೆ ಮೆಚ್ಚುಗೆ

ಬೆಳಗಾವಿ: ಔಷಧ ಸಿಗದೆ ಸಮಸ್ಯೆಗೆ ಒಳಗಾಗಿದ್ದ ಪಾಲಕರ ಸಮಸ್ಯೆಗೆ ರೈಲ್ವೆ ಇಲಾಖೆ ಅಧಿಕಾರಿಗಳು ಮತ್ತು ರೈಲ್ವೆ ಖಾತೆ ರಾಜ್ಯ ಸಚಿವ ಸುರೇಶ ಅಂಗಡಿ ಸ್ಪಂದಿಸಿ ಔಷಧ ತರಿಸಿಕೊಟ್ಟಿದ್ದಾರೆ.

ಪುಣೆಯಲ್ಲಿ ಚಿಕಿತ್ಸೆ ಪಡೆದು ಈಗ ನಗರದಲ್ಲಿರುವ ನಾಲ್ಕು ವರ್ಷದ ಮಗುವಿಗೆ ಔಷಧದ ಸಮಸ್ಯೆ ಎದುರಾಗಿತ್ತು. ಪ್ರತಿಬಾರಿಯೂ ಈ ಔಷಧವನ್ನು ಪುಣೆಯಿಂದಲೇ ತರಿಸಬೇಕಿತ್ತು. ಈಗ ಲಾಕ್‌ಡೌನ್‌ ಇರುವುದರಿಂದ ಖಾಲಿಯಾಗಿದ್ದ ಔಷಧವನ್ನು ತರಿಸಿಕೊಳ್ಳುವುದು ಕಷ್ಟವಾಗಿತ್ತು.

ಮಗುವಿಗೆ ಇದನ್ನು ತುರ್ತಾಗಿ ಕೊಡಲೇಬೇಕಿದ್ದರಿಂದ ಪೋಷಕರು ಕಳವಳಕ್ಕೀಡಾಗಿದ್ದರು. ಹೀಗಾಗಿ ಅವರು ಹುಬ್ಬಳ್ಳಿಯ ರೈಲ್ವೆ ಅಧಿಕಾರಿ ಅನಿಶ್‌ ಹೆಗಡೆ ಅವರನ್ನು ಸಂಪರ್ಕಿಸಿದ್ದರು.

ಈ ಸಂಗತಿ ರೈಲ್ವೆ ಸಚಿವರ ಗಮನಕ್ಕೂ ಬರುತ್ತಿದ್ದಂತೆ, ಅವರು ಔಷಧವನ್ನು ಪುಣೆಯಿಂದ ತರಿಸಿಕೊಡುವಂತೆ ಅಧಿಕಾರಿಗಳಿಗೆ ನಿರ್ದೇಶನ ನೀಡಿದರು. ಅದರಂತೆ ಔಷಧವನ್ನು ಗೂಡ್ಸ್‌ ಟ್ರೇನ್‌ ಚಾಲಕನ ಮೂಲಕ ಬೆಳಗಾವಿ ತಂದು ಮಗುವಿನ ಪಾಲಕರಿಗೆ ನೀಡಲಾಗಿದೆ.