ಕೃಷ್ಣಾ ನದಿಯಲ್ಲಿ ಹೆಚ್ಚಿದ ನೀರಿನ ಹರಿವು: ಉಗಾರ ಬ್ಯಾರೇಜ್‌ ಮುಳುಗಡೆ

ಕಾಗವಾಡ: ಬೆಳಗಾವಿ ಜಿಲ್ಲೆಯಲ್ಲಿ ಹೇಳಿಕೊಳ್ಳುವಂಥ ಮಳೆಯಾಗದಿದ್ದರೂ ಮಹಾರಾಷ್ಟ್ರದ ಕೊಂಕಣ ಪ್ರದೇಶಗಳಲ್ಲಿ ಸುರಿದ ಭಾರೀ ಮಳೆಯಿಂದಾಗಿ ಕೃಷ್ಣಾ ನದಿಗೆ ಮಂಗಳವಾರ ರಾತ್ರಿಯಿಂದ 9 ಅಡಿಗಿಂತಲೂ ಹೆಚ್ಚು ನೀರು ಹರಿದುಬರುತ್ತಿದೆ. ಹೀಗಾಗಿ, ಉಗಾರ ಪಟ್ಟಣದ ಹತ್ತಿರ ನಿರ್ಮಿಸಿದ ಬ್ಯಾರೇಜ್‌ ನೀರಿನಲ್ಲಿ ಮುಳುಗಿದ್ದು, ಬ್ಯಾರೇಜ್‌ ಮೇಲೆ 3 ಅಡಿ ನೀರು ಹರಿದು ಹೋಗುತ್ತಿದೆ.

ಮಂಗಳವಾರ ಸಂಜೆವರೆಗೂ ಉಗಾರ ಬ್ಯಾರೇಜ್‌ ಖಾಲಿ ಇತ್ತು. ಬ್ಯಾರೇಜ್‌ ಕೆಳಗೆ 7 ಅಡಿ ನೀರು ಇತ್ತು. ಬೆಳಗಾಗುವುದರೊಳಗೆ ಬ್ಯಾರೇಜ್‌ ಮೇಲಿಂದ 3 ಅಡಿ ನೀರು ಹರಿದು ಹೋಗುತ್ತಿದ್ದುದನ್ನು ಕಂಡ ರೈತರು ಅಚ್ಚರಿ ವ್ಯಕ್ತಪಡಿಸಿದರು.

ನದಿಗೆ ನೀರು ಬಂದಿದ್ದರಿಂದ ರಾಜಾಪುರ ಬ್ಯಾರೇಜ್‌ನಿಂದ ಹಿಪ್ಪರಗಿ ಅಣೆಕಟ್ಟೆಯವರೆಗೆ ನದಿಯ ಎರಡೂ ದಡದಲ್ಲಿ ರೈತರು ಹೊಲಕ್ಕೆ ನೀರು ಸೆಳೆಯಲು ಅಳವಡಿಸಿರುವ ನೂರಾರು ಪಂಪ್‌ಸೆಟ್‌ಗಳು ಮುಳುಗಿಹೋಗಿವೆ.