ಕೌಟುಂಬಿಕ ಕಲಹಕ್ಕೆ ವ್ಯಕ್ತಿ ಕೊಲೆ

ಇಚಲಕರಂಜಿ: ಇಲ್ಲಿನ ಜವಾಹರ ನಗರದಲ್ಲಿ ಸೋಮವಾರ ಕೌಟುಂಬಿಕ ಕಲಹವೊಂದು ವ್ಯಕ್ತಿಯ ಕೊಲೆಯಲ್ಲಿ ಪರ್ಯವಸಾನವಾಗಿದೆ.

ಧೋಂಡಿರಾಮ ಮಾರುತಿ ರಾವಣ (55) ಮೃತಪಟ್ಟವರು. ಕೊಲೆ ಆರೋಪಿ, ಮೃತ ವ್ಯಕ್ತಿಯ ಅಳಿಯ ಅಜಿತ್‌ ಬಾಳಾಸಾಹೇಬ ಪಾಟೀಲ ಘಟನೆಯ ನಂತರ ಪರಾರಿಯಾಗಿದ್ದಾನೆ. ಘಟನೆಯಲ್ಲಿ ಹಲ್ಲೆಗೊಳಗಾದ ಅತ್ತೆ ರಾಧಾ (50) ಹಾಗೂ ಆರೋಪಿ ಪತ್ನಿ ರೂಪಾಲಿ (31) ಸಹ ಗಾಯಗೊಂಡಿದ್ದಾರೆ.

ಘಟನೆಯ ವಿವರ: 10 ವರ್ಷಗಳ ಹಿಂದೆ ಧೋಂಡಿರಾಮರ ಪುತ್ರಿ ರೂಪಾಲಿ ಜತೆ ಅಜಿತ್‌ ಮದುವೆಯಾಗಿದ್ದ. ಇವರಿಗೆ ಐದು ವರ್ಷದ ಮಗಳಿದ್ದಾಳೆ. ವಿವಾಹದ ನಂತರ ಇವರಿಬ್ಬರ ಮಧ್ಯೆ ಸತತ ಜಗಳವಾಗುತ್ತಿತ್ತು. ಭಾನುವಾರ ರಾತ್ರಿ ಮತ್ತೆ ಕಲಹ ಉಂಟಾಗಿ, ವಿಕೋಪಕ್ಕೆ ತಿರುಗಿ ಅಜಿತ್‌ ಹರಿತವಾದ ಆಯುಧದಿಂದ ಮಾವ, ಅತ್ತೆ ಮತ್ತು ಪತ್ನಿ ಮೇಲೆ ಹಲ್ಲೆ ಮಾಡಿದನೆನ್ನಲಾಗಿದೆ. ಧೋಂಡಿರಾಮ ತಲೆಗೆ ಗಂಭೀರ ಸ್ವರೂಪದ ಪೆಟ್ಟು ಬಿದ್ದಿದ್ದರಿಂದ ಅತೀವ ರಕ್ತಸ್ರಾವವಾಗಿ ಮೃತಪಟ್ಟಿದ್ದಾರೆ.

ಗಾಯಗೊಂಡವರನ್ನು ಹೆಚ್ಚಿನ ಚಿಕಿತ್ಸೆಗಾಗಿ ಕೊಲ್ಲಾಪುರದ ಸಾರ್ವಜನಿಕ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಘಟನೆ ಕುರಿತು ಶಿವಾಜಿನಗರ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.